بۇل مەكتەپ وقۋشىلارى ءۇشىن دە, ءبىلىم جۇيەسى ءۇشىن دە ەڭ ءتيىمدى شەشىم. ءتيىستى مينيسترلىك توتەنشە جاعداي ەنگىزىلگەن كۇننەن باستاپ ەلىمىزدەگى ءبىلىم ۇيالارىن قاشىقتان وقۋعا كوشىرۋدى جەدەل جوسپارلاپ, قىزۋ دايىندىققا كىرىستى. ارينە العاش رەت بەتپە-بەت كەلىپ وتىرعان جۇيەنى ەنگىزۋدە كۇتپەگەن كەدەرگىلەر مەن قيىندىقتار بولدى. مۇنى ءبىلىم جانە عىلىم ءمينيسترى ا.ايماعامبەتوۆتىڭ ءوزى دە جاسىرعان جوق. ء«بىز بۇل جۇيەگە توتەنشە جاعداي سالدارىنان كوشىپ وتىرمىز. ەلىمىزدىڭ ورتا ءبىلىم جۇيەسىندە قاشىقتان وقىتۋ بۇرىن-سوڭدى بولماعان, ءتىپتى ء«بىلىم تۋرالى» زاڭدا دا قاراستىرىلماعان. ول ول ما, ينتەرنەت پلاتفورماسى دا دايىن ەمەس. سوندىقتان بۇل ۋاقىتشا قيىندىققا تۇسىنىستىك تانىتىڭىزدار», دەدى مينيستر.
اۋەلدە سىناما ساباق بولىپ, رەسپۋبليكانىڭ تۇكپىر-تۇكپىرىندەگى وقۋشىلاردىڭ قاشىقتان ءبىلىم الۋعا قاتىسۋىن قاداعالاعان مامانداردا سان ءتۇرلى ساۋال تۋىندادى. كەيبىر وتباسىندا كومپيۋتەر جەتىسپەۋشىلىگى, ەندى بىرىندە ينتەرنەتتىڭ جوقتىعى كوزگە كورىنىپ تۇردى. وسى تۇيتكىلدى ەسكەرگەن مينيسترلىك 800 مىڭنان استام كومپيۋتەر, پلانشەت, ايپاد قۇرىلعىسىن ساتىپ الىپ, تۇرمىسى تومەن وتباسى بالالارىنا بەرەتىنىن دە ايتتى. ودان بولەك وڭىردەگى جەرگىلىكتى كاسىپكەرلەر دە جومارتتىق تانىتىپ, وقۋشىلاردىڭ ءبىلىم الۋىنا مۇمكىندىك سىيلادى.
ال الماتى قالاسىنىڭ وقۋشىلارى بۇل جۇيەگە وڭاي توسەلىپ الدى. اسىرەسە, الاتاۋ اۋدانىنا قاراستى №178 ليتسەيىنىڭ ۇستاز قاۋىمى
IV توقسان باستالعان ساتتەن-اق اتا-انا مەن وقۋشىعا قولداۋ ءبىلدىرىپ, ءوزارا اۋىزبىرلىكتە جۇمىس ىستەدى. ءبىلىم بەرۋدىڭ بارلىق پلاتفورماسىن پايدالانىپ, ۇتىمدى جەرىن الۋعا تىرىستى.
№178 ليتسەي ديرەكتورى قايراتبەك شاديەۆتىڭ ايتۋىنشا, قاشىقتان ءبىلىم بەرۋ جۇيەسىندە كوپ نارسە كەرى بايلانىس جاسايتىن مۇعالىمگە, مۇعالىمدى قولدايتىن اتا-اناعا بايلانىستى. «ەگەر ولار ءوزارا اۋىزبىرلىكتە جۇمىس ىستەسە, ناتيجەلى كورسەتكىشكە قول جەتكىزۋگە بولادى», دەيدى مەكتەپ ديرەكتورى. ال ليتسەي ديرەكتورىنىڭ وقۋ ءىسى جونىندەگى ورىنباسارى گۇلجان ساۋىتقىزىنىڭ ايتۋىنشا, الەمدەگى 167 مەملەكەتتىڭ تاجىريبەسىنە سۇيەنىپ, قاشىقتىق جۇيەدە ءبىلىم الىپ جاتقان مەكتەپ وقۋشىلارى كەرى بايلانىس ورناتۋدا Kundelik پلاتفورماسىن كەڭىنەن پايدالانعان. بۇل تۇرعىدا مەكتەپ ۇجىمى ارنايى ساۋالداما دا جۇرگىزدى. «ناتيجەسىنە قاراساق, وقۋشىلار مۇعالىمدەردىڭ ساباق بەرۋ ناتيجەسىن 67,4 پايىزبەن جوعارى باعالادى. مۇعالىمدەر مەن وقۋشىلار ءوزارا كەرى بايلانىس جاساعانى قۋانتتى. دەمەك, ۇستاز قاۋىمى دا, وقۋشىلار دا تسيفرلى ساۋاتىن ارتتىرىپ, ءبىلىم بەرۋ رەسۋرستارىن ءتيىمدى پايدالانۋدى ۇيرەندى دەگەن ءسوز», دەيدى گۇلجان شاجاباەۆا.
ارينە بيىلعى وقۋ جىلى مەكتەپ تۇلەكتەرىنە كۇتپەگەن «توسىنسىي» جاسادى. الدا ۇبت سىناعى كۇتىپ تۇر. قازىر 11-سىنىپ وقۋشىلارى شاما-شارقىنشا وزدەرى دايىندالۋدا. از كۇننەن سوڭ التىن ۇيادان ۇشقالى وتىرعان تۇلەكتەر مەكتەپ ۇجىمى مەن سىنىپ جەتەكشىسىنىڭ قولداۋىنا ءزارۋ ەكەنى تۇسىنىكتى.
№178 ليتسەيىنىڭ 11 «ە» سىنىپ جەتەكشىسى, اعىلشىن ءتىلى ءپانىنىڭ مۇعالىمى تانيا ەرنازارقىزى بەكبولاتوۆا: «ارينە بالالار مەكتەپ بىتىرەتىن ساتتەن ءتاتتى ەستەلىك قالعانىن قالادى. سوڭعى قوڭىراۋ سالتاناتىندا كوز الدىمدا وسكەن ۇل-قىزدارىمدى قولىمنان ۇشىرامىن دەگەن مەنىڭ دە ارمانىم بولدى. بىراق ءار نارسەنىڭ قايىرى بار. ءبىز عانا ەمەس, الەمدەگى ميلليونداعان وقۋشى قاشىقتان وقۋ جۇيەسىنە كوشىپ, سوڭعى قوڭىراۋدى جىلداعىدان وزگەشە وتكىزگەنى وتىر. وسى جاعدايعا بايلانىستى مينيسترلىكتىڭ مەملەكەتتىك ەمتيحاندى الىپ تاستاۋى دا ۇلكەن جەڭىلدىك. سوندىقتان تۇلەكتەر جاڭا ومىرگە قادام باسار الدىندا سابىرلى بولىپ, ۇبت سىناعىنان سۇرىنبەي وتسە دەگەن تىلەگىم بار», دەپ اعىنان جارىلدى.
قاشىقتان ءبىلىم بەرۋ جۇيەسىن ەنگىزبەس بۇرىن الەمدەگى 167 مەملەكەتتىڭ تاجىريبەسىنە سۇيەندىك. قازىر وسى جۇيەمەن ەلىمىزدەگى
5 ملن-نان استام وقۋشى مەن ستۋدەنت ءبىلىم الۋدا. قاشىقتان ءبىلىم بەرۋ – وقۋشىنى جاڭاشىلدىققا, تىڭ ىزدەنىسكە جەتەلەيتىنىن كورسەتتى. ال وسىنداي قىسىلتاياڭ شاقتا جان-جاقتى ءبىلىم بەرۋگە بار كۇش-جىگەرىن سالعان ۇستاز قاۋىمىنا اتا-انالار تاراپىنان العىسى زور.
دينارا مىڭجاسارقىزى,
جۋرناليست
الماتى قالاسى
