ەل ىشىندەگى قوعامدىق تالقىلاۋلار بارىسىندا, حالىقارالىق ۇيىمدار تاراپىنان تۇسكەن ۇسىنىستاردى ەسكەرىپ, زاڭ جوباسىنىڭ كەي نورماسىن ءالى دە پىسىقتاۋ كەرەك ەكەنىن بايقادىق. وسى باعىتتا پارلامەنتتىڭ جوعارعى پالاتاسى بەلسەندى جۇمىستار اتقاردى.
زاڭ جوباسىنىڭ ەرەكشەلىگىنىڭ ءبىرى – بەيبىت جيىندارعا ارنالعان ارنايى ورىنداردىڭ ناقتى سانى قالانىڭ ءاربىر اۋدانىندا, قالانىڭ ورتالىق بولىگىندە ۇشتەن كەم بولماۋى كەرەك دەپ بەلگىلەنۋى. وسىلايشا بەيبىت شەرۋلەرگە رۇقسات ەتىلگەن ارنايى ورىندار سانى نۇر-سۇلتاندا 12-دەن, ءىرى مەگاپوليس الماتىدا 24-تەن كەم بولمايدى.
بۇل بەيبىت جينالىستار وتكىزۋ جونىندەگى كونستيتۋتسيالىق قۇقىقتى قامتاماسىز ەتەدى, مەملەكەتتىك ورگاندارمەن تىعىز قارىم-قاتىناس ورناتۋعا سەپتەسەدى. ياعني ازاماتتاردىڭ كوتەرگەن ماسەلەسىنە بايلانىستى كونسترۋكتيۆتى شەشىمدەر قابىلداۋعا سەپتىگىن تيگىزەدى.
سونىمەن قاتار ۇيىمداستىرۋشى مىندەتىنىڭ تىزبەسىن 10-عا دەيىن قىسقارتۋ دا ماڭىزدى تارماق. بەيبىت جينالىستارعا قاتىسۋشىلاردىڭ ءوز بەت-الپەتىن جاسىرماۋىن, ونىڭ ىشىندە ادامدى تانۋعا كەدەرگى كەلتىرەتىن كيىمدى, وزگە دە قۇرالداردى پايدالانباۋىن تالاپ ەتۋ مىندەتىن تولىق الىپ تاستاۋ ۇسىنىلدى. ويتكەنى قوعامدىق ءتارتىپتى قامتاماسىز ەتۋ ماسەلەسى ىشكى ىستەر ورگاندارىنىڭ قۇزىرەتىنە جاتادى.
گەرمانيادا ميتينگ ۇيىمداستىرۋشىسى زاڭدى تۇلعا رولىندە ءتارتىپتىڭ قامتاماسىز ەتىلۋىنە, رەگلامەنتتىڭ ساقتالۋىنا, جانجالعا جول بەرمەۋگە جاۋاپ بەرەدى. وسى مىندەتتەردى ۇيىمداستىرۋشى ءوز بەتىنشە شەشەدى. الايدا قۇقىق قورعاۋ ورگاندارى قوعامدىق ءتارتىپتى قامتاماسىز ەتۋى قاجەت, سونداي-اق ازاماتتاردىڭ شەرۋ وتكىزۋ قۇقىعىن قورعاۋى ءتيىس.
نيدەرلاندتىڭ قازاقستانداعى توتەنشە جانە وكىلەتتى ەلشىسى اندرە كارستەنس وسى زاڭ جوباسىنا قاتىستى ءوز پىكىرىمەن ءبولىستى. «ميتينگىلەرگە بايلانىستى ماسەلەلەر امبەباپ. بارلىق مەملەكەت وسى جولدى ءجۇرىپ ءوتتى. باسقا مەملەكەتتەر تاجىريبەسىنەن ساباق الىپ, قانداي ماسەلەلەر تۋعانىن, قانداي قاتەلىكتەر جىبەرىلگەنىن ەسكەرۋگە مۇمكىندىك بار. بۇل پروتسەسس ءوز دەڭگەيىندە جۇرگىزىلىپ جاتىر. قازاقستان جاقسى زاڭ جوباسىن جاسايتىنىنا سەنىمدىمىن», دەپ اعىنان جارىلدى.
قورىتا ايتقاندا, جالپى بەيبىت جينالىستاردى ۇيىمداستىرۋ جانە وتكىزۋ تۋرالى زاڭ جوباسى «حالىق ۇنىنە قۇلاق اساتىن مەملەكەت» تۇجىرىمداماسىنىڭ ءىس جۇزىندە جۇزەگە اسىرىلۋىن, قۇجاتتىڭ ليبەرالدانا تۇسكەنىن, وسى سالاداعى الەمدىك تاجىريبەنىڭ جاعىمدى تۇستارى ەسكەرىلگەنىن كورسەتەدى.
اسەل نازاربەتوۆا,
پرەزيدەنت جانىنداعى قسزي حالىقارالىق زەرتتەۋلەر ءبولىمىنىڭ باسشىسى
