توتەنشە جاعداي توقتاتىلسا دا, كارانتين ءتارتىبىن ساقتاۋ قاجەتتىگىن ۇمىتپاعان ءجون. اقپارات قۇرالدارىنا سەنسەك, كورشىلەس قىتايدا ءساۋىر ايىندا ۆيرۋستىڭ ەكىنشى تولقىنى بولعان. ياعني بۇل ساقتىق شارالارىن ساقتانۋ كەرەكتىگىن بىلدىرەدى. رەسەيدەگى جاعداي بارىمىزگە ءمالىم. ءبىر اپتادا عانا ۆيرۋس جۇقتىرعان ادامدار سانى كۇرت ءوسىپ, توعىزىنشى ورىننان ءۇشىنشى ورىنعا كوتەرىلدى. رەسەي – كورشىلەس مەملەكەت, سونىمەن قاتار ەاەو مۇشەسى. ءبىز دە وسى جاعدايدى ەسكەرۋىمىز قاجەت.
پرەزيدەنت مالىمدەمەسىنىڭ نەگىزگى ماقساتى – ەپيدەميالىق جاعدايدان ەكونوميكالىق ساياساتقا قاراي بەت بۇرۋ. ق.توقاەۆ ايتىپ وتكەندەي, ۇكىمەتتىڭ الدىن الا قابىلدانعان شارالارىنىڭ ناتيجەسىندە ۆيرۋستىڭ تارالۋىن تەجەدىك. ەندىگى كەزەكتە پوست-پاندەميالىق كەزەڭدەگى ەكونوميكانى ۇمىتپاۋىمىز قاجەت. ەكونوميكا بۇدان ءارى قالاي داميدى, قانداي تەتىكتەردى قوسۋ قاجەت, قانداي سالالارعا دەن قويۋ قاجەت دەگەن ساۋالدارعا جاۋاپ ىزدەگەن ابزال. قازاقستان بۇدان بىلاي قانداي ەكونوميكالىق ساياساتتى ۇستاناتىنىن دا قازىردەن بەلگىلەۋ كەرەك. قازىر بارلىق الەم اۋىر جاعدايدا. سوندىقتان مۇنىڭ ءبىزدىڭ مەملەكەتكە دە اسەرى بولۋى مۇمكىن. ۇندەۋدىڭ باستى مازمۇنىنا قايتىپ ورالساق, كارانتين شارالارىن ساقتاۋ ءالى دە وزەكتى ەكەنىن ەستەن شىعارماعان ءجون.
ەرلان ماديەۆ,
الەمدىك ەكونوميكا جانە ساياسات ينستيتۋتىنىڭ ساراپشىسى
