ءبىز وتان كۇزەتىندەمىز. تەڭىزدە دە, قۇرلىقتا دا قورعانىسىمىز كۇشتى. ال اۋە قورعانىسىندا كۇنگە دە تىكتەپ قاراي الاتىن قىرانداي قىراعى ءبىزدىڭ زەنيتتىك زىمىران ديۆيزيونى تۇر.
جوعارعى باس قولباسشىسىنىڭ, قورعانىس مينيسترلىگىنىڭ اتقارىپ كەلە جاتقان قىرۋار جۇمىسى ەڭ الدىمەن ەل اسكەرىنىڭ قۋاتىن ارتتىرۋعا نەگىزدەلگەن. اسكەري ادام رەتىندە ونى ءبىر كىسىدەي سەزىنەمىن. كوك تۋىمىز كوكتە جەلبىرەپ تۇرعاندا, ونىڭ مىزعىماستىعىن كوزدەيتىن ساربازدار ۇنەمى ساپتا تۇرادى.
مەنىڭ اتا-انام اسكەري ادامدار ەدى. اكەم دە, شەشەم دە وتان قورعاۋ ءىسىنىڭ بىلىكتى ماماندارى بولدى. سوندىقتان بولار, بالا كۇنىمنەن بەرى نە باعدارلامالاۋشى, بولماسا اسكەري ادام بولاتىنىما سەنىمدى ەدىم. وتباسىلىق يگى ءداستۇردى مەنىڭ دە جالعاستىرعىم كەلدى. الايدا اسكەري ونەردى يگەرۋ ءۇشىن قۇرلىق نەمەسە شەكارا اسكەرى ۋچيليششەلەرىنە بارۋدى كوزدەگەم جوق. ارنايى ماماندىعىم بولسا دەدىم. وسى ماقساتپەن ەلەكترونيكا جانە بايلانىس اسكەري ينجەنەرلىك ينستيتۋتىنا ءتۇستىم. ۇشۋدى اۋديو-تەحنيكالىق قامتاماسىز ەتۋ فاكۋلتەتىنە وقۋعا قابىلداندىم. سەبەبى بالدىرعان كەزىمنەن ناقتى عىلىمعا بەيىمىم بار ەدى.
وقۋىمدى ويداعىداي اياقتاعان سوڭ, ءبىلىمىمدى جەتىلدىرۋ ماقساتىندا بەلورۋسسياداعى اسكەري ينستيتۋتتا ءتالىم الدىم. سەگىز ايعا سوزىلعان وقۋ مەرزىمى اياقتالعان سوڭ, 2009 جىلى قازاقستانعا قايتىپ ورالىپ, 44813 اسكەري بولىمىنە اسكەري قىزمەتكە بەكىدىم. وسىناۋ 11 جىل مەرزىم ارالىعىندا كىشى لەيتەنانت شەنىنەن ديۆيزيون كومانديرى لاۋازىمىنا دەيىن جوعارىلاپ, مايور شەنىنە قول جەتكىزدىم.
اسكەري ديۆيزيون كومانديرى بولۋ – ۇلكەن جاۋاپكەرشىلىكتى جۇكتەيدى. ديۆيزيون وفيتسەرى ينجەنەر بولۋ ءتيىس. ىستەن شىققان تەحنيكانى قالپىنا كەلتىرە ءبىلۋى قاجەت. اسكەري مىندەتىمىز – جاۋدىڭ اۋە شابۋىلىنا تويتارىس بەرۋ. قاجەت بولعان جاعدايدا دۇشپاننىڭ اەروديناميكالىق نىسانالارىنىڭ, تاكتيكالىق, بالليستيكالىق راكەتالارىنىڭ كوزىن جويۋعا قاۋقارلىمىز. ياعني استانامىزدىڭ اشىق اسپانىن ۇدايى كۇزەتىپ تۇرمىز دەسەم دە بولادى. سونداي-اق جاس ساربازداردىڭ جاۋىنگەرلىك تاجىريبەلەرىن دە جەتىلدىرەمىز. شەبەرلىگىمىزدى وقۋ-جاتتىعۋ الاڭدارىندا, پوليگونداردا شىڭداپ, ءتۇرلى اسكەري ويىندارعا, سايىستارعا قاتىسامىز. ماسەلەن, 2016 جىلى رەسەي فەدەراتسياسىندا وتكەن «اسپاننىڭ كىلتى» سايىسىنا قاتىسىپ, جۇلدەلى 3-ورىندى يەلەندىك. سونداي-اق كۇنى كەشە وتان قورعاۋشى كۇنى قارساڭىندا پرەزيدەنت قاسىم-جومارت توقاەۆتىڭ جارلىعىمەن ەلدىڭ ۇلتتىق قاۋىپسىزدىگى مەن قورعانىس قابىلەتىن قامتاماسىز ەتۋگە قوسقان ۇلەسىم ەسكەرىلىپ, «جاۋىنگەرلىك ەرلىگى ءۇشىن» مەدالىمەن ماراپاتتالدىم.
ء ار اسكەري قىزمەتشىنىڭ وتان الدىنداعى باستى پارىزى – تۋعان ەلىنە قالتقىسىز قىزمەت ەتۋ. ەل ساربازدارى بۇل مىندەتتى ابىرويمەن ارقالاپ كەلەدى.
الەكساندر توميلين,
قورعانىس مينيسترلىگى 44813 اسكەري ءبولىمى س-300 زەنيتتىك زىمىران ديۆيزيونىنىڭ كومانديرى, مايور
