ايماقتار • 14 مامىر، 2020

تولەبي اۋدانىنىڭ اكىمى وزەننىڭ ارناسىنان اسۋىنا قاتىستى مالىمدەمە جاسادى (ۆيدەو)

611 رەتكورسەتىلدى

تۇركىستان وبلىسى تولەبي اۋدانىنىڭ اكىمى باۋىرجان وماربەكوۆ قاسقاسۋ وزەنىنىڭ ارناسىنان تاسۋىنا قاتىستى رەسمي مالىمدەمە جاسادى.

«بۇگىن اۋداننىڭ اۋىل-ايماعىندا قاتتى جاۋعان نوسەر جاۋىننىڭ سالدارىنان قاسقاسۋ وزەنى ارناسىنان تاسىپ، اۋىل ىشىندەگى ءتورت كوپىردى شايىپ كەتتى. لەڭگىر قالاسىنداعى بىرنەشە كوشەلەردى سۋ باستى. كيەلىتاس اۋىلدىق وكرۋگى سۇلتان رابات ەلدى مەكەنىندەگى ورتالىق ساۋران كوشەسىنىڭ 150 تۇرعىن ءۇيى بار بولىگىنە سۋ بارىپ، جاعدايدى كۇردەلەندىردى. بىرنەشە ءۇيدىڭ اۋلاسىن، ءۇي ءىشىن سۋ باسقان. قازىر ناقتى قانشا ۇيگە سۋ كىرگەنىن جانە ۇيلەردىڭ جاعدايىن انىقتاپ جاتىرمىز. كوشە تۇرعىندارىن ەۆاكۋاتسيالاپ، لەڭگىر قالالىق كوللەدجىنىڭ جاتاقحاناسىنا ورنالاستىرىپ جاتىرمىز. جۇمىسقا اۋداندىق توتەنشە جاعداي ءبولىمى، وبلىستىق توتەنشە جاعدايلار دەپارتامەنتى مەن اۋدان اكىمدىگى بىرلەسە 180-گە جۋىق ازامات پەن 44 ارنايى تەحنيكانى جۇمىلدىردى. اۋداندىق اكىمدىك جانىنان جەدەل شتاب قۇرىلدى. قازىر جاۋىن توقتادى، سۋدىڭ دەڭگەيى دە باسىلدى. تۇرعىنداردىڭ دەنساۋلىعىنا، ومىرىنە قاۋىپ جوق دەپ ەسەپتەيمىز»،- دەدى اۋدان اكىمى باۋىرجان وماربەكوۆ.

ەسكە سالساق، 13 مامىر كۇنى ساعات 17:05 شامالارىندا تولەبي اۋدانى، جوعارعى قاسقاسۋ اۋىلىندا قاتتى جاۋىننىڭ سالدارىنان قاسقاسۋ وزەنى تاسىپ، اۋىل ىشىندەگى 4 كوپىردى شايعان. 4 تانا جانە 4 قوي سۋعا كەتكەنى حابارلانعان ەدى.

 

سوڭعى جاڭالىقتار

قىرشىن كەتكەن ساڭلاق

سپورت • بۇگىن، 17:35

ۇقساس جاڭالىقتار