دەسەك تە وسى ىندەت ورتاق بالەگە قارسى ۇيىمداسا ءبىلۋدىڭ ەلدەگى اۋقىمىن كورسەتتى. ونىڭ باسقا ەلدەرمەن سالىستىرعانداعى ساپاسى دا بەلگىلى بولدى. ددۇ ۇيىمى ەۋروازيا ايماعى بيۋروسىنىڭ ديرەكتورى حانس كليۋگە قازاقستاننىڭ ىندەتكە قارسى ارەكەتتەرىن جوعارى باعالادى. ء وزىنىڭ تۆيتتەردەگى جازباسىندا ول قازاقستاننىڭ COVID-19-عا قارسى كۇرەسى مەن ونى تۇراقتاندىرۋ جولىنداعى ارەكەتتەرى باسقالارعا ۇلگى بولا الاتىنىن اتاپ ءوتتى. وسىنداي ۇلكەن باعاعا جەتۋ الدىمەن جەرگىلىكتى جانە ورتالىق بيلىكتىڭ ءتيىمدى ارەكەتتەرى ەكەنىن ايتۋ كەرەك. ايتپەسە حالىق وزدىگىنەن كورونوۆيرۋسقا قارسى كۇرەسكە ۇيىمداسا المايدى. ءتىپتى ارالارىنداعى كەيبىر كەراۋىزداردىڭ اسەرىمەن ونى ەلەمەي, جاپپاي سىرقاتقا ۇشىراۋلارى دا مۇمكىن. اتتارىن اتاماي-اق قويايىق, كەيبىر كورشى ەلدەرىمىز سوندايدىڭ كەسىرىنەن كوروناۆيرۋستى ەسەلەپ كوبەيتىپ جاتىر.
ءبىز ءوزىمىز كوزىمىزبەن كورىپ جۇرگەن سولتۇستىك قازاقستان وبلىسىنداعى ىندەتكە قارسى ارەكەتتەر تۋرالى ايتىپ وتەلىك.
كارانتين رەجىمى باستالعان 24 ناۋرىزدان بەرى مۇندا 36 ىندەتكە ۇشىراعان ادام تىركەلدى. سونىڭ 12-ءسى سىرتتان كەلگەندەر. بۇلار مىسىر, ۇلىبريتانيا جانە رەسەيدىڭ ومبى, قورعان, چەليابينسك, تۇمەن وبلىستارىنان كەلگەن جەرلەستەرىمىز. جەرگىلىكتى ادامدار اراسىنان تابىلعان 24 ادامنىڭ ىشىنەن 21 سىرقات پەتروپاۆل قالاسىنان, قالعاندارى مامليۋت, تايىنشا, قىزىلجار, ع.مۇسىرەپوۆ اۋداندارى تۇرعىندارىنان تابىلدى. جىنىسى بويىنشا ناۋقاستاردىڭ 25 ايەل, 11 ەر ادام بولعان.
ىندەتكە ۇشىراعانداردىڭ ءبارى ءبىرىنشى قالالىق اۋرۋحاناداعى ينفەكتسيا بولىمىنە جاتقىزىلدى. مۇنداعى دارىگەرلەر ع.سىزدىقوۆا, ا.قاسىباەۆا, ءا.وماراليەۆ, مەدبيكەلەر شتول, شيروچەنكو, پوبەرەجنيك, سەرگەەۆا, سانيتار-تازالىقشىلار ايتماعامبەتوۆا, قادىروۆا, روجكوۆا, باجەنوۆا, لۋتسەنكولار ءۇي بەتىن كورمەي, ەشكىمگە ارالاستىرىلماي, اۋىسىمنان كەيىن ءۇستى-باستارى ديزەنفەكتسيالانىپ, ارنايى كولىكپەن «التىن وردا» قوناقۇيىندەگى ارناۋلى جاساقتالعان نومىرلەرگە جەتكىزىلىپ, تاماقتى دا سىرتتان جەتكىزىپ وتىردى.
بارلىق سىرقاتتار تابىلعان جەرلەرگە ەپيدەميولوگيالىق زەرتتەۋلەر جۇرگىزىلدى. قازىر پروۆيزوردا 34, كارانتيندە 53 جانە ۇيىندەگى كارانتيندە 408 ادام ۇيىشىلىك كارانتيندە وتىر.
دارىگەرلەردىڭ جۇمىسى سونداي بولسا, پوليتسيا قىزمەتكەرلەرىنىڭ كوشەدەگى, اۋلالارداعى, ازىق-ت ۇلىك دۇكەندەرى مەن قىزمەت ورىندارىن باقىلاۋداعى قىزمەتى دە ءتيىمدى بولدى. تارتىپكە باعىنعىسى كەلمەگەندەردىڭ تالايىنا ايىپپۇلدار سالىندى. وبلىس بويىنشا 43 بلوك-بەكەتتەر اشىلىپ, كارانتين رەجىمىن قاتاڭ ساقتادى.
وبلىس اكىمى قۇمار اقساقالوۆ تەلەديداردان ءجيى بريفينگ بەرىپ, حالىقتى كارانتين رەجىمىن قاتاڭ ساقتاۋعا ۇندەپ وتىردى. ول كەيبىر ەدىرەڭدەپ سويلەيتىن باسشىلارداي ەمەس, حالىقتان ىڭعايسىز جاعداي ءۇشىن كەشىرىم سۇراي وتىرىپ جانە كارانتين ءتارتىبىن ساقتاعاندارىنا العىسىن ايتا وتىرىپ سويلەيتىن. سونىمەن بىرگە اكىم ىندەتتى تەك ءتارتىپ ساقتاعاندا عانا جەڭۋگە بولاتىنىن تاپتىشتەپ وتىردى. ءوزىنىڭ ۇندەۋىندە ول مىندەتتى تۇردە دارىگەرلەر مەن پوليتسەيلەردىڭ قىزمەتتەرىنە العىسىن جەتكىزىپ وتىردى.
«الدىڭعى اربا قالاي جۇرسە كەيىنگىسى دە سولاي جۇرەدى» دەمەكشى ۇلكەن اكىمنىڭ ۇلگىسىمەن كىشى اكىمدەر دە حالىقپەن سويلەسۋدە ديپلوماتيالىق ادەپتى ساقتاپ, جۇمساق سويلەيتىن. مۇنىڭ مىسالىنا قالا اكىمى بولات جۇمابەكوۆتى, ونىڭ ورىنباسارى اسقار ءحابيبۋليندى اتاۋعا بولادى. قالا اكىمى ب.جۇمابەكوۆ ءتىپتى ەرەكشە ءادىس تاۋىپ, قالاداعى ءسوزى ءوتىمدى دەگەن ادامداردى دا كورونوۆيرۋسقا قارسى ۇندەۋلەر ايتۋعا شاقىردى. وسى جولداردىڭ اۆتورىنا دا كارانتيندىك رەجىمدى ساقتاۋدى حالىققا تۇسىنىكتى تىلمەن الەۋمەتتىك جەلىلەردە جەتكىزۋدى وتىنگەن ەدى. ءبىزدىڭ فەيسبۋككە جانە باسقالارعا شىققان ۇندەۋىمىزدى كوپ ادام قولداپ, قوستاعان پىكىرلەر ءبىلدىردى.
مىنە, حالىقپەن جۇمىس ىستەۋدىڭ وسىنداي ۇتىمدى دا ءتيىمدى ادىستەرىن قولدانعاننىڭ جەمىسى شىعار - قازىر سولتۇستىك قازاقستان وبلىسى ىندەتتىڭ تارالۋى جونىنەن ەڭ از ساندى ايماق بولىپ, الدىڭعى ورىنعا شىقتى. ال ىندەت باستالعاندا الدىڭعى ورىنداردىڭ بىرىندە بولعان ەدى. قازىر ينفەكتسيالىق بولىمدە 6 ادام ەمدەلۋدە, ال 29 ادام ءتاۋىر بولىپ شىقتى. ءبىر ادام كوكشەتاۋ قالاسىنداعى اۋرۋحانانىڭ ينفەكتسيالىق بولىمىنە جاتقىزىلعان. سونىمەن بىرگە كارانتيندىك رەجىمنىڭ شەكتەۋلەرى دە مۇندا بارىنشا ازايتىلىپ, حالىق ەركىن تىنىستاي باستادى. ول تۋرالى وتكەن حابارىمىزدا جازعان بولاتىنبىز. وسى جەتىستىكتىڭ ءبارى – تارتىپكە مۇلتىكسىز باعىنعاننىڭ پايداسى, ارينە. ال وعان قول جەتكىزۋدە حالىقتىق ديپلوماتيا دا ءوزىنىڭ ءرولىن اتقاردى. «تارتىپكە باعىنعان قۇل بولمايدى» دەپ باۋىرجان مومىش ۇلى ايتقانداي, ءتارتىپ ساقتالعان جەردە, جەڭىس تە بولادى ەكەن. ەلىمىزدىڭ بارلىق ايماقتارى دا ءتارتىپتى قاتاڭ ساقتاسا جانە وعان قول جەتكىزۋدە حالىقپەن ۇتىمدى جۇمىس ىستەي بىلسە, ىندەتتىڭ كەسىرى وشەتىن سياقتى. بۇل ىستە ازىرگە سولتۇستىك باسقالارعا ۇلگى بولارلىق.
سولتۇستىك قازاقستان وبلىسى
