ۋنيۆەرسيتەتتىڭ Instagram جەلىسىندەگى رەسمي پاراقشاسىندا ۇيىمداستىرىلعان شاراعا 800-دەن استام ستۋدەنت پەن الماتى جانە اقتوبە وبلىستارىنىڭ 32 اۋدانىنداعى ءبىلىم بەرۋ ۇيىمدارىنىڭ وكىلدەرى قاتىستى.
شارا بارىسىندا الماتى وبلىسى ىلە, جامبىل, پانفيلوۆ اۋداندارىنىڭ ءبىلىم بولىمدەرىنىڭ ماماندارى تىكەلەي بايلانىسقا شىعىپ, ستۋدەنتتەر ساۋالدارىنا ەگجەي-تەگجەيلى جاۋاپ بەردى.
ەكى ساعاتتان استام ۋاقىتقا سوزىلعان جارمەڭكەدە جالپى سانى 400-گە جۋىق سۇراق قويىلدى. ساۋالداردىڭ دەنى جاس ماماندارعا قاراستىرىلعان جەڭىلدىكتەر, «ديپلوممەن – اۋىلعا» مەملەكەتتىك باعدارلاماسى, تاپشىلىق تۋدىرىپ وتىرعان ماماندىقتار توڭىرەگىندە بولدى.
ونلاين جارمەڭكەنى قىزدار ۋنيۆەرسيتەتىنىڭ اكادەميالىق ماسەلەلەر جونىندەگى دەپارتامەنت ديرەكتورى قىمبات بالاجانوۆا جۇرگىزىپ وتىردى. سونداي-اق شارادا ۋنيۆەرسيتەتتىڭ وقۋ جانە وقۋ-ادىستەمەلىك جۇمىستار جونىندەگى پرورەكتورى ەركىن جۇمانقۇلوۆا ءسوز سويلەپ, جارمەڭكە پەداگوگيكالىق ماماندىقتار بويىنشا ءبىلىم العان تۇلەكتەردى جۇمىسپەن قامتۋدىڭ بىردەن-ءبىر باستى تەتىگى ەكەندىگىن ايتتى.
– ءداستۇرلى شارا وتاندىق پەداگوگيكالىق جوعارى وقۋ ورىندارىنىڭ بىرىڭعاي قازاقستاندىق ءبىلىم بەرۋ كەڭىستىگىن قالىپتاستىرۋ, جاستاردى جۇمىسقا ورنالاستىرۋ ماسەلەسى بويىنشا ورتاق ديالوگ الاڭىن قۇرۋ, ولارعا جۇمىسقا ورنالاسۋ مۇمكىندىكتەرى تۋرالى اقپارات بەرۋ جانە تۇلەكتەردى تۇراقتى جۇمىسپەن قامتۋعا جاردەمدەسۋ ماقساتىندا ۇيىمداستىرىلىپ وتىر. ەلباسى نۇرسۇلتان نازارباەۆ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا جوعارى وقۋ ورنىنىڭ تابىستىلىعىن باعالاۋدىڭ باستى ولشەمى – وقۋ بىتىرگەن ستۋدەنتتەردىڭ جۇمىسپەن قامتىلۋى, جالاقىسى جوعارى جۇمىسقا ورنالاسۋى ەكەندىگىن اتاپ ءوتتى. وسى ورايدا پەداگوگيكالىق ماماندىقتار بويىنشا بوس جۇمىس ورىندارى جارمەڭكەسى جاستار اراسىندا جۇمىسسىزدىق ماسەلەسىن وڭتايلى شەشۋدىڭ مەحانيزمى بولىپ وتىر, بۇگىندە, – دەدى ەركىن جۇمانقۇلوۆا.
جارمەڭكەدە الماتى جانە اقتوبە وبلىستارىنىڭ ءبىلىم بەرۋ مەكەمەلەرىندە بوس جۇمىس ورىندارىنىڭ ءتىزىمى جاريالانىپ, وسى باعىتتا تولىققاندى اقپارات بەرىلدى. ماسەلەن, اقتوبە وبلىسىنا 251 ءپان مۇعالىمى قاجەت بولسا, الماتى وبلىسىنداعى ءبىلىم بەرۋ ۇيىمدارىندا 1196 پەداگوگ پەن تاربيەشى كەرەك ەكەن.
– بوس جۇمىس ورىندارى جارمەڭكەسىن ۇيىمداستىرۋ جاس ماماندارعا عانا ەمەس, سونداي-اق جۇمىس بەرۋشىلەر ءۇشىن دە ماڭىزدى. تۇلەكتەر وزدەرىن قىزىقتىراتىن بوس ورىندار تۋرالى مالىمەت الۋعا, ال بىزدەر ءۇشىن ولاردىڭ ىسكەرلىك قاسيەتىن باعالاۋعا مۇمكىندىك تۋدىرادى. وسى تاقىلەتتەس شارالار ارقىلى تۇلەكتەرگە اقپارات بەرە الامىز. ورتا مەكتەپكە قىزمەتكە ورنالاسقان جاس مامانعا تاجىريبەسى مول ۇستازدار باعىت-باعدار بەرىپ, جۇمىسىنىڭ قىر-سىرىن تەرەڭ مەڭگەرۋىنە ارقاشان قولۇشىن كورسەتەدى. سوندىقتان جاستار جۇمىس ىستەۋگە دەگەن ىنتا-ىقىلاس تانىتسا, ءبىز ءوز تاراپىمىزدان ءاردايىم قولداۋ كورسەتۋگە دايىنبىز, – دەيدى ءبىلىم بولىمدەرىنىڭ وكىلدەرى.
ستاتيستيكالىق مالىمەتتەر بويىنشا, 2017-2018 وقۋ جىلىندا قازاق ۇلتتىق قىزدار پەداگوگيكالىق ۋنيۆەرسيتەتىن 1548 ستۋدەنت ءتامامداپ, ولاردىڭ 95 پايىزى جۇمىسقا ورنالاسقان. بىلتىرعى تۇلەكتەردىڭ «ەكى قولعا ءبىر كۇرەك تاپقاندارىنىڭ» ۇلەس سالماعى دا وسى كورسەتكىش شاماسىندا.
