وتكەن اپتادا مەملەكەتتىك كوميسسيا 4 مامىردان باستاپ جۇمىسىنا كىرىسەتىن قىزمەت تۇرلەرىنىڭ ءتىزىمىن بەكىتىپ, ولاردىڭ سانيتارلىق-ەپيدەميالىق قاۋىپسىزدىكتى ساقتاۋى قاتاڭ باقىلاۋدا بولاتىنىن ايتتى. نۇر-سۇلتان قالاسىنداعى «دانەنوۆ» ءتىس ەمحاناسى كوميسسيا بەكىتكەندەي تەك الدىن الا جازىلۋمەن عانا ناۋقاستاردى قابىلداي باستادى. ءتىس دارىگەرى تيمۋر دانەنوۆ وزدەرىنىڭ دە, كليەنتتەردىڭ دە قاۋىپسىزدىگى ءۇشىن سانيتارلىق نورمالاردى ەرەجەگە ساي ۇستانىپ وتىرعانىن جەتكىزدى.
«ەڭ الدىمەن مىندەتتى تۇردە جازىلۋ بويىنشا قابىلدايمىز. قابىلداۋدان بۇرىن ولاردىڭ تەمپەراتۋراسىن ولشەيمىز. كلينيكاعا جازىلعان ۋاقىتتان بۇرىن كەلمەۋىن تالاپ ەتەمىز. سونداي-اق ولار مىندەتتى تۇردە ماسكامەن جانە قولعاپپەن كەلۋى كەرەك. ەڭ الدىمەن وتكىر جانە ءىرىڭدى ءتىس اۋرۋلارىن قابىلداۋعا تىرىسامىز. بىزدە ءبىر توسەكتىڭ اۋماعى 14 شارشى مەتر بولۋى كەرەك. ال ەكىنشى توسەككە دە پاتسيەنت قابىلدايتىن بولسا, تاعى 7 شارشى مەتر اۋماقتى ارتىعىمەن قوسامىز. بارلىق قۇرال-جابدىقتارىمىز سانيتارلىق-ەپيدەميالىق تالاپتارعا ساي, ءار قولدانىلعان سايىن دەزينفەكتسيالانادى. ال ءوزىمىز تەك ءبىر رەت قولدانىلاتىن قولعاپتاردى قولدانامىز. كلينيكاعا كۇن سايىن دەزينفەكتسيا جاسايمىز. ءۇش ساعات سايىن كۆارتس قوسامىز», دەگەن ت.دانەنوۆ كارانتين كەزىندە توتەنشە جاعدايعا بايلانىستى بەرىلگەن 42500 تەڭگە تولەماقىنى العانىن, قيىن ساتتە مەملەكەتتىڭ كورسەتكەن كومەگىنە ءدان ريزا ەكەنىن ايتتى.
اسىرەسە كارانتين كەزىندە قىرىق كۇن بويى شاش قىسقارتپاعان ەر ازاماتتاردىڭ شاشتارازعا وتە ءزارۋ بولعانى انىق. سوندىقتان دا «حانشايىم» ءسان سالونىنىڭ شاشتارازشىسى ەربولات سارسەنباي ءبىرىنشى كۇننەن باستاپ-اق كليەنتتەردىڭ وتە كوپ بولعانىن ايتادى. دەگەنمەن تابىستى كوبىرەك تابامىز دەپ سانيتارلىق تالاپتى بۇزۋعا بولمايدى.
«بۇرىن دا كليەنتتەردى تەك الدىن الا جازىلۋمەن قابىلدايتىنبىز. قازىر ءبىر-بىرىنە كەدەرگى بولماۋى ءۇشىن قابىلداۋدىڭ ۋاقىتىن ءسال ۇزارتتىق. سانيتارلىق ەرەجەلەردى قاتاڭ ۇستانامىز. سالوندا ورىندىقتاردىڭ ارالىعى ءبىر جارىم مەتردەن ورنالاستىرىلعان. كليەنتتەردىڭ ماسكا, قولعاپ كيۋىن مىندەتتى تۇردە تالاپ ەتەمىز. كۇندەلىكتى ساعات 10:00-دەن 16:00-گە دەيىن عانا جۇمىس ىستەيمىز. جازىلۋشىلار كۇنىنە ون ادامنان ارتىلمايدى. سوڭعى كىسىنى قابىلداپ بولعانشا شەكتى ۋاقىت تا اياقتالادى. قازىردىڭ وزىندە كىسىلەر 4-5 كۇنگە الدىن الا جازىلىپ قويدى. ءاربىر شەبەردە انتيسەپتيك بار. قول ۇستاسىپ امانداسپايمىز. باس جۋعانعا جانە شاش العانعا جەكە-جەكە ءبىر رەتتىك قولعاپتاردى پايدالانامىز. ءوزىمىز دە تەك ماسكامەن جۇرەمىز. ءار كليەنتتى قابىلداعان سايىن قۇرال-سايماندارىمىزدى دەزينفەكتسيالايمىز. ۋاقىتىمىز دا شەكتەۋلى بولعاندىقتان قازىر نەگىزىنەن ەر كىسىلەردى عانا قابىلداپ جاتىرمىز», دەيدى ە.سارسەنباي.
