ياعني وسى بۋىن وكىلدەرى دەنساۋلىق ساقتاۋ سالاسىنىڭ العا جىلجۋىنا ۇلكەن ۇلەس قوسىپ, وتاندىق دەنساۋلىق ساقتاۋداعى ەڭ جاقسى داستۇرلەردى جوعالتپاي, الەمدىك تاجىريبەنى يگەرىپ, وزدەرىنىڭ كۇندەلىكتى تاجىريبەسىندە مەديتسينالىق كومەك كورسەتۋ ساپاسىن ارتتىرا وتىرىپ, مەيىربيكەلىك كۇتىمدى جەتىلدىرۋ جانە دەنساۋلىق ساقتاۋ جۇيەسىندە شىعىنداردى تومەندەتۋ باعىتى بويىنشا ايتارلىقتاي ەڭبەك ەتىپ كەلەدى. مەيىربيكە تەك قانا دارىگەر بۇيرىعىن ورىنداۋشى عانا ەمەس, ول ويشىل, ۇنەمى ىزدەنىستە جۇرەتىن شىعارماشىل تۇلعا. ونىڭ نەگىزگى ماقساتى – ادام دەنساۋلىعى مەن قورشاعان ورتانى قورعاۋ قاجەتتىگىن قاناعاتتاندىرۋعا نەگىزدەلەدى. ياعني ءبىر سوزبەن ايتقاندا, ەمدەلۋشىنىڭ كۇتىمىن ۇيىمداستىرۋشى, كۇتىمىن ورىنداۋشى, ەمدەلۋشىنىڭ ىقىلاسىن قورعاۋشى, كەڭەسشى, زەرتتەۋشى, مەديتسينالىق توپتىڭ بەلسەندى مۇشەسى. ەندەشە ناۋقاستارعا پسيحولوگيالىق تۇرعىدان دەمەۋشىلىك كورسەتىپ, مەيىرىمدىلىك تانىتىپ جۇرگەن اق جەلەڭدى ابزال جانداردىڭ جان-جاقتىلىعى بۇگىنگى ۋاقىت تالابى.
سونداي-اق مەيىربيكە ءوز قىزمەتى بارىسىندا ۇيىمداستىرۋشىلىق, عىلىمي-زەرتتەۋشىلىك, وقىتۋشىلىق مىندەتتەر سياقتى قاعيداتتاردى باسشىلىققا الا وتىرىپ جۇمىس ىستەيدى. حالىق دەنساۋلىعىن جاقسارتۋ, مەديتسينالىق قىزمەت ساپاسىن ارتتىرۋ, حالىقتى قولجەتىمدى مەديتسينامەن قامتاماسىز ەتۋ, مەديتسينالىق العاشقى جاردەمدى جەتىلدىرۋ, انا مەن بالا دەنساۋلىعىن قورعاۋ, اۋرۋدىڭ الدىن الۋ باعىتىنداعى سكرينينگتىك تەكسەرۋلەر, تۇرعىنداردى سالاۋاتتى ءومىر سالتىنا باۋلۋ, باسقا دا قانشاما شارالاردىڭ جۇزەگە اسىرىلۋىندا مەيىربيكەلەر جۇرەدى. سوندىقتان ناۋقاستى قابىلداعاننان باستاپ, ونى ەمدەۋ بارىسىنداعى بارلىق كۇيبەڭ تىرشىلىكتىڭ بەل ورتاسىندا جۇرەتىن مەيىربيكەلەر ەڭبەگى قوعام الدىندا قاشاندا باعالانا بەرمەك.
ارىپتەستەرىمنىڭ بىلىكتىلىكتەرى تۋرالى ايتار بولسام, 105 مەيىربيكە جوعارى ساناتتى, 27-ءسى ءبىرىنشى, 6-ۋى ەكىنشى ساناتتى ماماندار. ەندى ورتا بۋىن مەديتسينا قىزمەتكەرلەرىنىڭ كاسىبي بىلىكتىلىگىن ارتتىرۋ, شەبەرلىگىن شىڭداۋ, ءبىلىمىن جەتىلدىرۋ باعىتىندا دا كوپتەگەن جۇمىستار اتقارىلىپ جاتىر. مەملەكەت تاراپىنان مەديتسيناسى دامىعان ەلدەرگە بارىپ تاجىريبە جيناقتاپ, جۇمىسىمىزدى جەتىلدىرىپ جاتقان جايىمىز بار. سونىمەن قاتار مەيىربيكەلەرىمىز وڭىرلىك وقۋ ورتالىقتارىندا بىلىكتى مامانداردان ءدارىس الىپ, بىلىمدەرىن جەتىلدىرۋ ۇستىندە. بۇل جۇمىستار الداعى ۋاقىتتا دا جالعاسىن تابا بەرمەك. تاعى ءبىر ايتارى, رەسپۋبليكالىق, وبلىستىق ەمدەۋ ورتالىقتارىنان بىلىكتى ماماندار اۋدانىمىزعا كەلىپ, ءتۇرلى تاقىرىپتاردا شەبەرلىك سىنىپتارىن وتكىزۋدە.
اۋدانىمىزدىڭ دەنساۋلىق ساقتاۋ سالاسىندا تالاي جىل تاپجىلماي تەر توگىپ, ەڭبەگىمەن ەلدىڭ ىستىق ىقىلاسىنا بولەنگەن ارداقتى مەيىربيكەلەرىمىز, سالا ارداگەرلەرى دە از ەمەس. الدىڭعى تولقىن اپالارىمىزدىڭ ۇلاعاتتى ىستەرى مەن ونەگەلى ەڭبەك جولدارى كەيىنگى تولقىنعا ۇلگى بولارى ءسوزسىز. جالپى العاندا مەيىرگەرلىك كاسىپ نەمەسە مەيىربيكە ءىسى دەنساۋلىق ساقتاۋ جۇيەسىنىڭ بولىنبەس بولشەگى.
ءيا, ومىرگە ءسان بەرىپ, تىرشىلىككە ءنار بەرىپ, قالتقىسىز قىزمەتىن ۇسىنىپ, مەيىرىمدىلىك پەن جىلىلىقتىڭ سيمۆولىنا اينالىپ, يگىلىكتى ماماندىق يەسى اتانعان مەيىرگەر ءىسى – قاشاندا سىي-قۇرمەتكە لايىق. ويتكەنى تۇرعىندارعا مەديتسينالىق كومەك كورسەتۋدىڭ تيىمدىلىگى كوپ جاعدايدا مەيىرگەر جۇمىسىنا تىكەلەي بايلانىستى.
مادينا ماحانقىزى,
سوزاق اۋداندىق ورتالىق اۋرۋحاناسىنىڭ باس مەيىربيكەسى
تۇركىستان وبلىسى
