ەرنياز ءساتوۆتىڭ باتىر اتاعىنا ۇسىنىلعانى جونىندە العاش رەت وسى اۋدانداعى «جالاعاش جارشىسى» گازەتى جازدى. ماقالا اۆتورى, گازەت رەداكتورى ءازيز باتىربەكوۆكە حابارلاسىپ, ماسەلەنىڭ ءمان-جايىنا قانىقتىق. ارىپتەسىمىزدىڭ سىلتەۋىمەن باتىردىڭ اعاسىنىڭ قىزى ايجان اپايدى تاپتىق.
– بۇل حاباردى بىزگە Nur Otan پارتياسىنىڭ وبلىستىق فيليالى مەن وبلىستىق قورعانىس ىستەرى جونىندەگى دەپارتامەنت قىزمەتكەرلەرى جەتكىزدى. نەگىزى اكەمىز اتادان ءۇش اعايىندى. ۇلكەنى – مەنىڭ اكەم ءتاجىباي, ورتانشىسى شەرنياز, كىشىسى وسى – ەرنياز. ەرنياز اعامىزدىڭ دەرەگى كەشتەۋ بولسا دا شىقتى, ال شەرنياز حابارسىز كەتتى. اكەم ءتاجىباي وقۋ-اعارتۋ سالاسىندا, ۇزاق جىل پارتيا قىزمەتىندە جەمىستى ەڭبەك ەتكەن, – دەيدى ايجان اپاي.
ەرنياز ءساتوۆ اۋىل مەكتەبىن ءبىتىرىپ, قىزىلوردا قالاسىندا 2 جىلدىق كۋرستا وقىپتى. 1918 جىلى تۋعان ول 21 جاسىندا اسكەرگە الىنىپ, سوعىس باستالعان سوڭ مايداندا قالادى. جەڭىستى جاقىنداتقان جاۋىنگەردىڭ ەرلىگى تۋرالى «پودۆيگ نارودا» جانە «پاميات نارودا» دەپ اتالاتىن رەسەيلىك سايتتاردا جازىلعان.
رەسەيلىك اقپارات قۇرالدارىندا تەگى سياتوۆ دەپ كورسەتىلگەن جەرلەسىمىزدىڭ 1945 جىلدىڭ 9 ناۋرىزىنداعى كيۋسترين قالاسى ءۇشىن بولعان شايقاستا ۇلكەن ەرلىك كورسەتكەنى باياندالادى. ءبىزدىڭ جاۋىنگەرلەرگە باس كوتەرتپەي قويعان جاۋ پۋلەمەتشىسىنىڭ جاتقان جەرىن انىقتاپ, گراناتا تاستاپ جارىپ جىبەرگەن. وسى ۇرىستا جالعىز ءوزى 14 نەمىس ساربازى مەن ءبىر وفيتسەرىنىڭ كوزىن جويىپتى. ۆزۆودىن باستاپ, جاۋ تىلىنا ءوتىپ, 50 ءفاشيستى تۇتقىنداعان ەكەن. ءبىر اتتەگەن-ايى, باتىردىڭ حاتى دا, سۋرەتى دە ساقتالماعان.
ەرلىگى ەلەۋسىز قالعان باتىر ەسىمىن ۇلىقتاۋ باستاماسى Nur Otan پارتياسىنىڭ «ارداگەرلەردى ارداقتايىق» جوباسى اياسىندا قولعا الىنىپ وتىر ەكەن. قوعام قايراتكەرى بەرىك ابدىعالي ۇلىنىڭ «ۇمىتىلعان قاھارماندار» اتتى كىتابىندا ەرنياز ءساتوۆ ەرلىگى لايىقتى باعالانباي قالعان مايدانگەرلەردىڭ ءبىرى رەتىندە اتالادى. كىتاپتا ەرنياز سياقتى كەڭەس وداعىنىڭ باتىرى اتاعىنا ۇسىنىلىپ, بىراق ءارتۇرلى سەبەپتەرمەن بۇل جوعارى ماراپاتتى الا الماي قالعان تاعى 3 قىزىلوردالىق مايدانگەر تۋرالى دەرەك بار.
ەرنياز ءساتوۆتى كەڭەس وداعىنىڭ باتىرى اتاعىنا 1368-ءشى اتقىشتار پولكىنىڭ كومانديرى, پودپولكوۆنيك ۆ.كۋركاتسيشۆيلي 1945 جىلدىڭ 19 ناۋرىزىندا ۇسىنىپتى. ءتورت كۇننەن كەيىن بۇل ۇسىنىسقا 416-ءشى ديۆيزيا كومانديرى, گەنەرال-مايور د.سىزرانوۆ قول قويادى. وسى جىلعى 2 ساۋىردە اسكەري كەڭەستىڭ شەشىمى شىعىپ, ونى 5-ءشى ارميا قولباسشىسى گەنەرال-لەيتەنانت ن.بەرزارين, كەڭەس مۇشەسى, گەنەرال-لەيتەنانت ف. بوكوۆ قولدارىن قويىپ, بەكىتەدى.
بىراق نەگە ەكەنى بەلگىسىز قانداي ۇرىستا دا قايمىعىپ قالماي, الدىڭعى شەپتەن تابىلعان جاۋىنگەردىڭ ەرلىگى «قىزىل جۇلدىز» وردەنىمەن باعالانادى.
پارتيا فيليالىنىڭ قىزمەتكەرلەرى ەرنياز ساتوۆپەن قاتار «ۇمىتىلعان قاھارماندار» كىتابىندا ەسىمدەرى اتالاتىن وردا ەرجانوۆ, ءپىرىمجار بايماحان ۇلى, مۇسا رىسكەلديەۆ سەكىلدى ەرلەر ەسىمىن ماڭگى ەستە قالدىرۋ ماقساتىندا قالالىق, اۋداندىق ونوماستيكالىق كوميسسيالارعا ۇسىنىس ەنگىزدى.
– اعامىزعا بەرىلگەن «قىزىل جۇلدىز» وردەنى جالاعاشقا جەتكەندە اكەم بار ەدى, ءىنىسىنىڭ حابارى شىققانىنا قاتتى قۋانعانىن ءالى ۇمىتپايمىن. ال اجەمىز ءۇمىتاي شەرنياز بەن ەرنيازىن ءومىر بويى جوقتاپ ءوتتى. التىنبەك قورازباەۆ ايتاتىن «قارا كەمپىر» ءانى سوعىستان كەتكەن ۇلىنىڭ حابارىن ۇمىتپەن كۇتكەن كۇللى انالاردىڭ زار-مۇڭى عوي. مەنىڭ اجەم دە جىلاي-جىلاي ەكى كوزدەن قالىپ, 1977 جىلى 90 جاسىندا قايتىس بولدى, – دەيدى باتىردىڭ قارىنداسى.
وسىلايشا جەرلەسىمىزگە سوناۋ 1945 جىلى بەرىلۋى ءتيىس ناگرادانىڭ حابارى 75 جىلدان كەيىن بەلگىلى بولىپ وتىر. بۇل ەرلىكتىڭ ەل جادىنان ەشقاشان وشپەيتىندىگىنىڭ دالەلى بولسا كەرەك.
قىزىلوردا
