«تۇرعىن ءۇي قۇرىلىسى جيناق بانكى» اق قاراماعىندا قۇرىلاتىن «وتباسى بانكى» اتالعان يپوتەكالىق باعدارلامانى قارجىلاندىرۋعا مۇرىندىق بولادى. بۇعان دەيىن ەلىمىزدەگى يپوتەكالىق باعدارلامالاردىڭ تاريحىنداعى ەڭ ءتيىمدىسى – «7-20-25» باعدارلاماسى بولاتىن. ال جاڭا «5-10-20» باعدارلاماسى ەڭ تومەنگى 5 پايىزدىق مولشەرلەمەمەن 10 پايىزدىق باستاپقى جارنا تولەۋ ارقىلى 20 جىلعا بەرىلەتىن ەڭ ءتيىمدى ۇسىنىس بولايىن دەپ تۇر.
بيىل ەلىمىزدە بۇرىن-سوڭدى بولماعان كولەمدە تۇرعىن ءۇي سالىنادى. اتاپ ايتقاندا, 15 ميلليون شارشى مەتر نەمەسە 150 مىڭ پəتەر نارىققا شىعارىلماق. وسى ورايدا باسپانالى بولۋعا نيەتتى ازاماتتار ءتيىمدى يپوتەكالىق باعدارلامالاردى قالت جىبەرمەي قاداعالايتىنى انىق. ەلىمىزدە باسپانانى يپوتەكالىق نەسيە ارىقىلى بەرەتىن باعدارلامالاردىڭ ىشىندە ەڭ تومەنگى 5 پايىزبەن تۇرعىن ءۇي قۇرىلىسى جيناق بانكى بەرىپ كەلدى. بىراق بانكتىڭ شارتى بويىنشا ءۇش جىل كولەمىندە الاتىن ءۇيىڭىزدىڭ 50 پايىزىن ياعني جارتى اقشاسىن جيناپ ۇلگەرۋىڭىز كەرەك. مىسالى, قۇنى 10 ملن تەڭگەنى قۇرايتىن ءۇيدىڭ 5 ملن تەڭگەسىن 3 جىل كولەمىندە اتالعان بانكتىڭ ديپوزيتىندە جيناۋعا ءتيىسسىز. وسى جاعدايدا عانا بانك سىزگە 5 پايىزبەن نەسيە بەرەدى. ال بۇل شارتتار ورىندالماعان جاعدايدا پايىزدىق مولشەرلەمە 7-8,5 پايىزعا كوتەرىلەدى. ەسكەرەتىنى 3 جىل كولەمىندە قوماقتى قاراجات جيناۋ كەز-كەلگەننىڭ قولىنان كەلمەيدى.
سوندىقتان تابىسى ماردىمسىز قاراسى قالىڭ كوپشىلىك ۇزاق ۋاقىتقا جوعارى پايىزبەن نەسيە الۋدى ارتىق سانايدى. شارتتارى شۇبالاڭ, تالاپتارى تاستاي باعدارلامالاردىڭ ىشىندە اقىلعا قونىمدىسى «7-20-25» باعدارلاماسى. ياعني, العاشقى جارنا رەتىندە ءۇيدىڭ 20 پايىزىن تولەپ, 7 پايىزبەن 25 جىلعا باسپانا الۋعا مۇمكىندىك تۋدى. بۇل باعدارلاما 2018 جىلدىڭ 4 شىلدەسىنەن باستاپ ىسكە قوسىلدى. سوڭعى مالىمەت بويىنشا «7-20-25» باعدارلاماسىنا قاتىسۋ ءۇشىن بانكتەر 29 904 ءوتىنىش قابىلداپ, ونىڭ ىشىنەن 175,3 ملرد تەڭگەگە 14 824 نەسيە بەرىلگەنى انىقتالىپ وتىر. وسى رەتتە, 10007 نەسيە بانكتەر تاراپىنان ماقۇلدانباعان. بەرىلگەن نەسيەلەر بويىنشا نۇر-سۇلتان قالاسىندا 63,4 ملرد تەڭگەگە 4514 نەسيە بەرىلسە, الماتى قالاسىندا 42,5 ملرد تەڭگەگە 3135 نەسيە بەرىلدى.
سونىمەن قاتار اقتوبەدە 7,4 ملرد تەڭگەگە 856 نەسيە ماقۇلداندى. بۇعان دەيىن اتالعان باعدارلاما تەك جاڭادان سالىنعان باسپانالارعا ارنالعانى ايتىلعان بولاتىن. باسپانا قورى باسشىلىعى تاراپىنان وڭىرلەردە جاڭا ۇيلەردىڭ جەتىسپەيتىنى تالاي رەت تۇيىتكىلدى ماسەلە رەتىندە جاريالانىپ تا, ايتىلىپ تا كەلدى. ءتىپتى, تۇركىستان وبلىسىندا جاڭا ۇيلەر ەندى سالىنىپ جاتقاندىقتان ءالى ءبىر دە ءبىر نەسيە بەرىلمەگەنى بەلگىلى بولىپ وتىر. تەك «نۇرلى جەر» باعدارلاماسى ارقىلى سالىنىپ بىتكەن ۇيلەر جالعا بەرۋ باعدارلاماسى ارقىلى قىزمەتى اۋىسقاندارعا ۇلەستىرىلەدى ەكەن. ەڭ تومەنگى كورسەتكىشتىڭ ءبىرى - قىزىلوردا وبلىسىنا تيەسىلى. ياعني بۇگىنگى كۇنگە دەيىن 1 ملرد تەڭگەگە 122 نەسيە بەرىلىپ وتىر. كەيبىر وڭىرلەردە كورسەتكىشتىڭ تومەن بولۋى باستاپقى تۇرعىن ءۇيدىڭ جەتىسپەۋشىلىگىندە ەكەنىن «7-20-25» باعدارلاماسىنىڭ باسشىلىعى دا جاسىرمايدى.
