قازاقتىڭ ءبىرتۋار ۇلى, كەڭەس وداعىنىڭ باتىرى, ەكىنشى دۇنيەجۇزىلىك سوعىستىڭ داڭقتى جاۋىنگەرى, اسكەري قولباسشى, ستراتەگ, تاكتيك ءارى جازۋشى باۋىرجان مومىش ۇلىنا ارنالعان مۋرال نۇر-سۇلتان قالاسى, تاشەنوۆ كوشەسى, 10 مەكەن-جايىندا پايدا بولدى.
قابىرعا سۋرەتىندە باۋىرجان مومىش ۇلىنىڭ جاس كەزى بەرىلگەن. باتىردىڭ سۋرەتىن مايداننان تۋعان-تۋىسقاندارى مەن جاقىندارىن كۇتكەن مىڭداعان انالار مەن ساربازداردىڭ جارلارىن بەينەلەيتىن ايەل قولدارى ۇستاپ تۇر. مۇنداي كوركەمدىك شەشىم ۇلى وتان سوعىسى ەشبىر وتباسىن اينالىپ وتپەگەنىن ايقىن جەتكىزگەن.
كومپوزيتسيا مايدانگەرلەردىڭ بەيبىتشىلىك ءۇشىن سوعىسقانىن, ءوز ءۇيى مەن وتانىن قورعاعانىن, بولاشاقتىڭ اشىق اسپانى ءۇشىن كۇرەسكەنىن كوركەم بەينەلەگەن. مۋرالدىڭ اۆتورلارى – قازاقستان بويىنشا 15-تەن استام اۋقىمدى جۇمىستارى بار, Tigrohaudcrew كومانداسىنىڭ گراففيتي-سۋرەتشىلەرى ەرجان تاناەۆ پەن الي زاكير.
جوبا جەتەكشىسى – كريستينا بەكمۋرزاەۆا. بۇعان دەيىن شىعارماشىل توپ ەلوردادا كوروناۆيرۋسپەن كۇرەستە الدىڭعى قاتاردا جۇرگەن دارىگەرلەرگە ارناپ مۋرال سالعان بولاتىن. سۋرەتشىلەر قابىرعا سۋرەتىن سالۋعا ءبىر ايدان استام دايىندالىپ, ءبىر اپتا ۋاقىت جۇمساعان.
