وسىعان بايلانىستى ازاماتتارعا قويىلاتىن تالاپتار تۋرالى قالا اكىمى ورىنباسارى باقتيار ماكەن ءتۇسىندىردى.
«ازاماتتار ءۇي اۋلاسىندا سەرۋەندەۋ ءۇشىن ناقتى ءبىر شارتتار مەن شەكتەۋلەردى ورىنداۋى قاجەت. اتاپ ايتساق, كوشەدە وتباسى مۇشەلەرىن قوسپاعاندا, ءۇش ادامنان كوپ توپ بولىپ جينالۋعا تىيىم سالىنادى. كامەلەتكە تولماعان بالالار اتا-انالارىنىڭ نەمەسە 18 جاسقا تولعان تۋىستارىنسىز اۋلادا جۇرۋىنە رۇقسات ەتىلمەيدى. اۋلادا سەرۋەندەپ جۇرگەن ازاماتتار مەديتسينالىق ماسكا مەن قولعاپ كيۋى كەرەك. تەك ناقتى تۇرعىلىقتى مەكەن-جايدىڭ اۋلاسىندا بولۋى شارت. كوشەدە جۇرۋگە 06.00-دەن 20.00-گە دەيىن رۇقسات ەتىلەدى», – دەدى ب.ماكەن ورتالىق كوممۋنيكاتسيالار قىزمەتىندە وتكەن بريفينگتە.
ەگدە جاستاعى (65 جاستان جوعارى) جانە سوزىلمالى اۋرۋلارى بار ادامدار, اسا قاجەتتىلىك بولماسا سىرتقا شىقپاعانى دۇرىس. ويتكەنى بۇل ساناتتاعى ادامداردىڭ Covid-19 ينفەكتسيسىمەن اۋىرۋ ىقتيمالدىعى جوعارى. سونداي-اق ساياجاي ۋچاسكەلەرىنىڭ يەلەرى دە كارانتين ايماعىنان شىعۋ ءۇشىن بىرقاتار شارتتاردى ساقتاۋى ءتيىس. ولار: كارانتين ايماعىندا 06:00-دەن 20:00-گە دەيىن جەكە كولىكپەن ءجۇرۋ, مەملەكەتتىك ءمور قويىلعان باۋ-باقشا سەرىكتەستىگىنە مۇشەلىك كىتاپشاسىنىڭ نەمەسە جەر ۋچاسكەسىنىڭ ماقساتتى تاعايىنداماسىنىڭ مەملەكەتتىك اكت كوشىرمەسىنىڭ بولۋى. 65 جاستان اسقان ەگدە ادامدار باۋ-باقشا الاڭدارىنا بارماۋى قاجەت. ال, كامەلەتكە تولماعان بالالارعا اتا-اناسى نەمەسە 18 جاسقا تولعان تۋىستارىنسىز ساياجايعا بارۋعا رۇقسات ەتىلمەيدى. ايتا كەتسەك, قالادا 20 مىڭنان استام ادام تۇراتىن 64 باعباندىق بىرلەستىك بار.
