قالالىق بيلىك وكىلدەرى ازاماتتاردىڭ ءومىرى مەن دەنساۋلىعىن ساقتاپ, كوروناۆيرۋس ينفەكتسياسىنىڭ تارالۋىنا جول بەرمەۋ ءۇشىن قاجەتتى بارلىق شارالاردى قولعا الۋدا.
20 ساۋىردەن باستاپ كەيبىر كاسىپورىنداردىڭ جۇمىسىن جالعاستىرۋعا رۇقسات بەرىلگەندىكتەن, كوشەدەگى كولىك قوزعالىسى 10%-عا ارتتى.
قالالىق جەدەل شتاب شەشىمىمەن ءوز جۇمىسىن قايتا باستايتىن كاسىپورىندار سانى كوبەيدى. بۇل ءتىزىمدى اۆتوكولىكتەرگە تەحنيكالىق قىزمەت كورسەتۋ, ۆۋلكانيزاتسيا, اۆتوسالون سياقتى جۇمىس ورىندارى تولىقتىردى.
جۇمىس جاعدايىندا اۆتوكولىك سالونىندا تەك جۇرگىزۋشى عانا بولۋى كەرەك. سونداي-اق اگروتەحنيكالىق سالادا دا جۇمىس ىستەۋگە رۇقسات ەتىلگەن. دەگەنمەن ءار ۇيىم ءوز قىزمەتكەرلەرىنىڭ جۇمىسقا كەلۋى مەن كەرى قايتۋىن ۇيىمداستىرۋعا مىندەتتى.
پوليتسيا كوبىنە جەكە تۇلعالاردىڭ جەڭىل اۆتوكولىكتەرىن توقتاتادى. ۇيىمداردىڭ جۇمىس ۋاقىتى 18:00-دە اياقتالادى. كۇندىز «سەرگەك» بەينەباقىلاۋىنىڭ تالداۋ ناتيجەسى بويىنشا, ترافيكتىڭ تولىق باقىلاۋى قاجەت بولعان جاعدايدا ءموبيلدى پوستتار ورناتىلادى. ساعات 20:00-دەن كەيىن ءموبيلدى پوستتاردا كولىك قوزعالىسى 100% تەكسەرىستەن وتەدى.
بۇگىنگى تاڭدا 1 125 كولىك ايىپپۇل تۇراعىنا قويىلدى. ساعات 22:30-عا دەيىن تەك ازىق-ت ۇلىك ساتىپ الۋمەن اينالىساتىن كولىكتەر عانا جۇرە الادى. ال, ساعات 23.00-دەن كەيىن دەزينفەكتسيا جۇمىستارى ءۇشىن كولىك قوزعالىسىن 5%-عا دەيىن تومەندەتۋ جوسپارلانعان. پوليتسيا قىزمەتكەرلەرىنىڭ جۇمىسى تۇرعىندارعا كارانتين تالاپتارىن ساقتاۋدى تۇسىندىرۋگە باعىتتالعان. توتەنشە جاعداي مەن كارانتين رەجيمىن قاساقانا بۇزعان جاعدايدا قۇقىق بۇزۋشىلارعا زاڭعا سايكەس ناقتى شارالار قابىلدانادى.
«قۇرمەتتى قالا تۇرعىندارى, ازاماتتاردىڭ قاۋىپسىزدىگىن قامتاماسىز ەتۋ ءۇشىن كارانتين تالاپتارىن قاتاڭ ساقتاۋدى تالاپ ەتەمىز. قابىلدانعان شارالارعا تۇسىنىستىك تانىتىپ, پوليتسيا قىزمەتكەرلەرىنىڭ زاڭدى تالاپتارىن ساقتاپ, ينفەكتسيانىڭ الدىن الۋعا كومەكتەسۋلەرىڭىزدى سۇرايمىز. بۇل شارالاردىڭ بارلىعى ءسىزدىڭ جانە جاقىندارىڭىزدىڭ دەنساۋلىعى ءۇشىن قابىلدانىپ جاتىر», – دەيدى پوليتسيا قىزمەتكەرلەرى.
