سونداي-اق وڭىردە شاعىن جانە ورتا بيزنەسپەن شۇعىلدانۋشىلار ۇلەسى ەكونوميكالىق جاعىنان بەلسەندى حالىقتىڭ 33,5 پايىزىن قۇرايدى. بۇل دەرەك رەسپۋبليكالىق ورتاشا كورسەتكىشتەن 3 پايىزعا تومەن. سەبەبى ەكونوميكالىق تۇرعىدا بەلسەندى ازاماتتاردىڭ دەنى وڭىردەگى ءىرى كاسىپورىندارعا شوعىرلانعان.
پاندەميانىڭ سالدارىنان وڭىردەگى شاعىن جانە ورتا بيزنەس سۋبەكتىلەرىنىڭ قابىرعالارىنا قارا تاستاي باتىپ جۇرگەن ماسەلەلەر از ەمەس. كاسىپكەرلىك وكىلدەرى تاراپىنان تۇسكەن ءتۇرلى ساۋالدى تالداعان «اتامەكەن» ۇكپ اقتوبە وبلىستىق بولىمشەسى باستى ماسەلە سالىق تولەمدەرى ەكەنىن انىقتاعان بولاتىن. ايتسە دە مەملەكەت باسشىسى شاعىن كاسىپكەرلىك وكىلدەرىنە قولداۋ كورسەتۋدىڭ بارلىق شارالارىن بەلگىلەپ بەردى. جەڭىلدىكتەر سالىق جانە نەسيە تولەمدەرىنە قاتىستى ماسەلەمەن شەكتەلىپ قالماعانى ايان. بۇل باعىتتا اقتوبە قالاسىنداعى ساۋدا ورتالىقتارىندا كاسىپكەرلەردىڭ جالعا الاتىن ورىندارىنا تولەنەتىن اقى 30-70 پايىزعا دەيىن ازايتىلدى.
– بۇگىنگە دەيىن شاعىن جانە ورتا بيزنەس سۋبەكتىلەرى تاراپىنان نەسيەنى كەيىنگە قالدىرۋ ماسەلەسى بويىنشا 765 تاپسىرىس ءتۇستى. سوعان سايكەس جالپى سوماسى 11 ملرد تەڭگە نەسيە قاراجاتى بويىنشا 694 تاپسىرىس ماقۇلداندى. ءسويتىپ, كاسىپورىندار ءۇشىن ءبىر ايدان ءۇش ايعا دەيىنگى نەسيە قاراجاتتارىن كەيىنگە قالدىرۋ مەرزىمى قاراستىرىلدى, – دەدى «اتامەكەن» وبلىستىق كاسىپكەرلەر پالاتاسىنىڭ ديرەكتورى انار دارجانوۆا.
اقتوبە وبلىسى
