وقشاۋلانعان كىرەبەرىستىڭ تۇرعىندارىنا ەكى اپتا پاتەرلەرىنەن شىعۋىنا تىيىم سالىنىپ, وسى ارالىقتا تاراز قالاسىنىڭ اكىمدىگى پاتەر تۇرعىندارىن ازىق-ت ۇلىك ونىمدەرىمەن قامتاماسىز ەتكەن ەدى. بۇگىن تاراز قالاسىنىڭ اكىمدىگى سول «قاراسۋ القابى» شاعىناۋدانىنداعى تۇرعىن ءۇي كىرەبەرىسىنىڭ كارانتيندىك رەجيمىنىڭ اياقتالعانىن مالىمدەدى.
كارانتينگە جابىلعان تۇرعىندارعا تەك جەرگىلىكتى بيلىك قانا ەمەس, كاسىپكەرلەر مەن بەلسەندى ازاماتتار دا قولداۋ كورسەتكەن بولاتىن. ايتا كەتەيىك, تاراز قالاسىندا 7 ءساۋىر كۇنى كوروناۆيرۋس ينفەكتسياسىن جۇقتىرعان 86 جاستاعى ايەل تىركەلىپ, ناۋقاس انىقتالعان «قاراسۋ القابى» شاعىناۋدانىنداعى كوپپاتەرلى تۇرعىن ءۇيدىڭ كىرەبەرىسى كارانتينگە جابىلعان ەدى. ەپيدەميولوگيالىق تەكسەرۋ بارىسىندا تۇرعىننىڭ 17 ناۋرىز كۇنى الماتى قالاسىنان كەلگەن جاقىن تۋىسىمەن بايلانىستا بولعانى انىقتالىپ, ول ينفەكتسيالىق ستاتسيونارعا جاتقىزىلعان. ال, ونىمەن بايلانىستا بولعان 5 ادام انىقتالىپ, ولار كارانتينگە ورنالاستىرىلعان. اتالعان تۇرعىن ءۇيدىڭ كىرەبەرىسىندە جانە تۇرعىننىڭ تۇرعىلىقتى جەرى بويىنشا دەزينفەكتسيالىق وڭدەۋ شارالارى جۇرگىزىلگەن. وسى كىرەبەرىستەگى پاتەرلەردە تۇراتىن تۇرعىندار 14 كۇنگە وقشاۋلانىپ, ولارعا ۇيىنەن شىعۋعا تىيىم سالىنعان. تاراز قالالىق تاۋارلار مەن كورسەتىلەتىن قىزمەتتەردىڭ ساپاسى مەن قىزمەتتەرىن باقىلاۋ باسقارماسى باسشىسىنىڭ ورىنباسارى عابيت ءابدىلدانىڭ ايتۋىنشا, بۇگىندە بۇل كىرەبەرىستە وقشاۋلانعان 26 تۇرعىننىڭ 11-ءى 18-گە تولماعان بالالار, ال 15-ءى ەرەسەك ادامدار ەكەن. وسى 14 كۇن ىشىندە ولاردىڭ دەنساۋلىق جاعدايلارى جەرگىلىكتى ەمحانادا باقىلانىپ, ەشقانداي اۋىتقۋ بەلگىلەرى بايقالماعان.
«بۇل تۇرعىن ۇيدە ازىق-ت ۇلىك قاجەتتىلىگى بويىنشا ەشقانداي ماسەلە تۋىنداعان جوق. سەبەبى, اكىمدىك تاراپىنان بارلىق جاعداي جاسالدى. قانت, ماي, جۇمىرتقا, كوكونىس, كارتوپ, بارلىعى ءار ازاماتقا نورماعا ساي جەتكىزىلدى. ءبىر سوزبەن ايتقاندا, قاجەتتى قىزمەتتىڭ بارلىعى كورسەتىلدى», دەيدى تاراز قالاسى اكىمدىگى كاسىپكەرلىك جانە ونەركاسىپ ءبولىمىنىڭ باسشىسى اسپانديار سەيسەباەۆ.
ال اتالعان تۇرعىن ءۇي كىرەبەرىسىنىڭ تۇرعىنى اياگوز مايليەۆا ء«بىز سانەپيدقاداعالاۋ مەكەمەسىنىڭ تالاپتارىنا ساي 14 كۇن بويى ۇيدەن شىقپاي, مەديتسينا قىزمەتكەرلەرىنىڭ كۇندەلىكتى باقىلاۋىندا بولدىق. سونىڭ ارقاسىندا باسقا ەشكىمنەن ۆيرۋس شىققان جوق. وسى 14 كۇن ىشىندە قالا اكىمدىگى مەن دەمەۋشىلەردىڭ كومەگىمەن بىزگە كۇندەلىكتى ازىق-ت ۇلىگىمىز بەن ىستىق تاماعىمىز جەتكىزىلىپ وتىردى. سول ءۇشىن ازاماتتارعا العىسىمىزدى ايتامىز», دەدى.
21 ءساۋىر كۇنى تۇنگى ساعات 00.00-دە اتالعان تۇرعىن ۇيدە كارانتيندىك رەجيم اياقتالدى. تۇرعىندار وسى ارالىقتا تەكسەرىس پەن مەديتسينا ماماندارىنىڭ باقىلاۋىندا بولدى. قاتاڭ باقىلاۋ مەن كاسىبي قىزمەتتىڭ ارقاسىندا تۇرعىندار ىندەت جۇقتىرۋدان امان.
جامبىل وبلىسى
