بيىلعى جىلى ەل ۇكىمەتى تاراپىنان جامبىل وڭىرىنە 18,3 مىڭ توننا كەپىلدەندىرىلگەن ديزەل وتىنى بولىنگەن. ونىڭ ىشىندە 3500 توننا ناۋرىز ايىنا, 5000 توننا ءساۋىر ايىنا, 5300 توننا مامىر ايىنا جانە 4500 توننا ماۋسىم ايىنا قاراستىرىلعان. وبلىستىق اۋىل شارۋاشىلىعى باسقارماسىنىڭ مالىمەتىنشە, ناۋرىز ايىندا 3305 توننا, ياعني 94,4 پايىز جانارمايدىڭ قارجىسى اۋدارىلىپ, ونىڭ 2935 تونناسى, ياعني 84 پايىزى جەتكىزىلىپ, 1747 تونناسى ءتيىستى وپەراتورلار ارقىلى شارۋالارعا تاراتىلعان ەكەن.
ال, ءساۋىر ايىنا بولىنگەن 5000 توننا ديزەل وتىنىنىڭ بۇگىندە 3595 تونناسىنا قارجى اۋدارىلعان. ونىڭ 2494 تونناسى جەتكىزىلىپ, 635 توننا ديزەل وتىنى تاراتىلعان. سونىمەن قاتار, ناۋرىز ايىندا وبلىس شارۋاشىلىقتارىنا ارزانداتىلعان ديزەل وتىنىنىڭ 1 ءليترى 175-177 تەڭگە كولەمىندە تاراتىلعان. الايدا, ەلىمىزدە ەنگىزىلگەن توتەنشە جاعدايعا بايلانىستى مەملەكەت باسشىسى قاسىم-جومارت توقاەۆتىڭ ۇندەۋىنە سايكەس, ءساۋىر ايىنان باستاپ ديزەل وتىنىنىڭ ءار ءليترى زاۋىتتاردان 143-144 تەڭگە كولەمىندە بوساتىلۋدا.
ال, اۋىل شارۋاشىلىعى تاۋار وندىرۋشىلەرىنە جانارمايدىڭ 1 ءليترى 158-160 تەڭگە ارالىعىندا تاراتىلۋدا.
جامبىل وبلىسى
