جەتىسۋ جەرىندەگى جۇقپالى ىندەتتىڭ العاشقى وشاعى قاراساي اۋدانىنان انىقتالعان بولاتىن. 21 ناۋرىز كۇنى ستامبۇل – بىشكەك باعىتىنداعى اۋە رەيسى ارقىلى مەككەدەن ۇشىپ كەلگەن جولاۋشىدان كوروناۆيرۋس انىقتالىپ, ول قاسكەلەڭدەگى جۇقپالى اۋرۋلار اۋرۋحاناسىنا وقشاۋلانعان ەدى. سول كۇننەن باستاپ قاراساي اۋدانىنىڭ دارىگەرلەرى داۋاسىز دەرتتىڭ قۇرىعىنا ىلىنگەن ادامنىڭ ءومىرى ءۇشىن كۇرەس باستاعان. دارىگەرلەردىڭ كاسىبي قىزمەتىنىڭ ارقاسىندا ناۋقاستىڭ بەتى بەرى قاراپ, ءساۋىردىڭ ونى كۇنى وعان اۋرۋحانادان شىعۋعا رۇحسات بەرىلدى. بۇل وبلىستاعى كوروناۆيرۋستان ايىققان العاشقى پاتسيەنت ەدى. ونىڭ ءىزىن الا جاقسى حابار تاراي باستادى. قازىر قاسكەلەڭدەگى اۋرۋحانادان ەمدەلىپ شىققان ناۋقاس سانى مەزگىل سايىن كوبەيىپ كەلەدى.
- قاراساي اۋدانىنىڭ جۇقپالى ىندەت وشاعىنا اينالعانىن بىلەسىز, بۇل ءبىر مازاسىز, تاۋەكەلى كوپ مەزگىل بولدى. بىراق, ءبىز مويىمادىق. انتىمىزعا ادال بولدىق, مۇمكىندىكتى قالت جىبەرمەدىك. ناتيجەسىندە كوروناۆيرۋس جۇقتىرعان ادامدار دەرتتەن ايىعا باستادى. العاشقى ناۋقاستىڭ جاعدايى وڭالا باستاعاندا ارىپتەستەرىمىنىڭ ءۇي بەتىن كورمەي, ۇيقىسىز ءجۇرىپ ىستەگەن جۇمىسىتارىنىڭ بەكەر كەتپەگەنىن ۇعىپ, قۋاندىم. اۋىرعان ادامنان قايتا-قايتا اناليز الىپ, ءجىتى تەكسەردىك. ناتيجەسى جاقسى بولىپ, ونى اۋرۋحانادان شىعارۋعا شەشىم قابىلدادىق. بۇل ءبىزدىڭ عانا ەمەس, تۇتاس وبلىستاعى مەديتسينا ماماندارىنىڭ جەڭىسى بولدى. ەندى مۇنداي جاعىمدى جاڭالىق ءجيى ەستىلىپ تۇر. سوڭعى كۇندەردە اۋرۋحانادان بىرنەشە ناۋقاستى شىعارىپ, ەم-دومدى ۇيلەرىندە جاساپ, كۇتىنۋگە جىبەردىك, - دەيدى قاراساي اۋداندىق ورتالىق اۋرۋحاناسى جۇقپالى اۋرۋلار ءبولىمىنىڭ مەڭگەرۋشىسى, ينفەكتسيونيست دارىگەر ساۋلە باراقباەۆا.
الماتى وبىلىسى دارىگەرلەرىنىڭ دەرتپەن كۇرەسۋدەگى دامىلسىز ءىس-ارەكەتىنىڭ جەمىستى بولۋى ۇلكەن جەتىستىككە بالانۋدا. بۇل ايماقتاعى ىندەت تارالۋىنىڭ الدىن الۋ مەن كۇرەسۋ شاراسىنا سەرپىن بەرىپ, مەديتسينا قىزمەتكەرلەرىنىڭ ەڭبەگىنە لايىقتى باعا بەرۋگە دە جول اشتى. قازىر وبلىستا پرەزيدەنت قاسىم-جومارت توقاەۆتىڭ تاپسىرماسىنا وراي قاۋىپپەن بەتبە-بەت كەلىپ وتىرعان دارىگەرلەرگە قارجىلاي وتەماقى تولەۋ جۇزەگە اسىپ جاتىر. وسى ماقساتقا رەسپۋبليكالىق بيۋدجەتتەن بولىنگەن قاراجات ەسەبىنەن 1448 مەديتسينا قىزمەتكەرىنە, ونىڭ ىشىندە 205 دارىگەر مەن 882 ورتا مەديتسينالىق قىزمەتكەرگە, جانە 361 كىشى مەديتسينالىق قىزمەتكەرگە قوسىمشا ەڭبەكاقى بەرىلگەن ەكەن. سونداي-اق, جەرگىلىكتى بيۋدجەتتەن ايماقتاعى 1 023 مەديتسينا قىزمەتكەرىنە سىياقى تاعايىندالدى. ەندىگى وبلىستاعى 178 دارىگەر, 528 ورتا مەديتسينالىق قىزمەتكەر مەن 317 كىشى مەديتسينالىق قىزمەتكەر بۇل قارجىعا يە بولدى.
- ارينە, ءبىزدىڭ جانقيارلىق جۇمىسىمىزدى باعالاپ, ىندەتپەن كۇرەستە العى شەپتە جۇرگەن ارىپتەستەرىمدى ىنتالاندىرىپ جاتقان شاراعا, مەملەكەتتىك قولداۋعا ءدان ريزامىز. وكىنىشكە قاراي, دارىگەرلەردىڭ اراسىندا دا ىندەت جۇقتىرۋى دەرەگى بولدى. بۇل كوروناۆيرۋستىڭ ەشكىمدى ايامايتىن اۋىر ىندەت ەكەنىن كورسەتتى, ياعني, ادامداردىڭ كارانتين ەرەجەسىن بۇزباي, ۇيدەن شىقپاي وتىرعانى بىزگە دە ۇلكەن كومەك بولار ەدى. ويتكەنى, دارىگەر ءۇشىن ناۋقاستى ەمدەۋ مىندەت بولعانىمەن, ادامداردىڭ مۇلدەم اۋىرماعانى ماڭىزدى. مىسالى, ءبىزدىڭ اۋرۋحانادان جاقىندا 70 جاستاعى پاتسيەنت ىندەتتەن ايىعىپ شىقتى. الدىندا «اسىل ارمان» تۇرعىن ءۇي كەشەنىنەن كەلگەن اياعى اۋىر ايەلدى وقشاۋلادىق. ول دا ساۋىعىپ, ۇيىنە باردى. قازىر جۇكتى كەلىنششەك ءبىزدىڭ باقىلاۋىمىزدا. بولاشاق انانىڭ دا, ىشتەگى نارەستەنىڭ جاعدايى جاقسى. مىنە, مەديتسينا قىزمەتكەرى ءۇشىن ناعىز مارتەبەلى ءسات وسى, - دەيدى ينفەكتسيونيست دارىگەر ساۋلە باراقباەۆا.
