كانۆوندو پروۆينتسياسىنىڭ يانيان قالاسىنداعى جاتاقحانادا تۇراتىن, قازاقستاننان كەلگەن زاڭسىز ميگرانت ءالي, ءتۇتىننىڭ ءيىسىن سەزگەن سوڭ, دالىزدەر بويىمەن جۇگىرىپ, ەسىكتەردى قاعىپ, تۇرعىندارعا «وت» دەپ ايقايلاي باستاعان.
قۇتقارىلعان كورشىلەردىڭ ايتۋىنشا, ءالي ءورت سوندىرۋشىلەردى كۇتپەي-اق, تۇرعىندارعا جانىپ جاتقان عيماراتتان شىعۋعا كومەكتەسە باستايدى. ءوز ءومىرىن قاۋىپكە تىگىپ, قازاقستاندىق ازامات 10 تۇرعىنعا كومەكتەسكەن. ءورت سالدارىنان ەكىنشى جانە ءۇشىنشى دارەجەلى كۇيىك العان. وكىنىشكە وراي, 50 جاستاعى ايەلدى قۇتقارۋ مۇمكىن بولمادى. ول تۇتىننەن ۋلانىپ كوز جۇمدى.
ءالي ءوزىنىڭ زاڭسىز ەميگراتسيا فاكتىسى انىقتالىپ, وڭتۇستىك كورەيادان ەكستراديتسيالانامىن دەپ قورقىپ, وقيعاعا ورنىنان كەتىپ قالعان.
الايدا كەيىنىرەك ءاليدىڭ كورشىلەرى دەنساۋلىعىنا بايلانىستى ونى جەرگىلىكتى اۋرۋحاناعا جەتكىزدى. دارىگەرلەر ەمدەلۋگە كەلگەن شەتەلدىكتىڭ تىركەۋ كارتوچكاسىن سۇراعاندا, ءالي ونىڭ ەلدە زاڭسىز جۇرگەنىن مويىندادى. 2017 جىلى ول قازاقستاننان تۋريستىك ۆيزامەن كەلىپ, قۇرىلىسشى بولىپ جۇمىس ىستەپ, اقشا تابۋ ءۇشىن وڭتۇستىك كورەياعا كەلگەن. ءالي تاپقان اقشاسىن اتا-اناسىنا, ايەلى مەن ەكى بالاسىنا جىبەرەدى ەكەن.
ءاليدىڭ مەديتسينالىق ساقتاندىرۋ بولماعانىن بىلگەن كورشىلەر قۇتقارۋشىنىڭ ەمدەلۋىنە قاجەتتى جەتى ميلليون ۆوندى (شامامەن 2,4 ميلليون تەڭگە) جيناي باستادى.
ء«الي 1 مامىردا كورەيادان كەتۋگە ءماجبۇر. بۇل ادىلەتسىزدىك. ول مۇلدە بەيتانىس ادامداردىڭ ءومىرىن ساقتاپ قالدى. ونىڭ ارقاسىندا ون ادام ءومىر ءسۇرىپ جاتىر. وڭتۇستىك كورەيا ءوزىنىڭ ادىلەتتىلىگىمەن تانىمال, بيلىك وعان ەلدە قالۋعا مۇمكىندىك بەرەدى دەپ ۇمىتتەنەمىن, ول بۇعان لايىقتى. سونىمەن قاتار ول وتەماقىعا لايىق», دەدى جاتاقحانا تۇرعىنى.
