ادامداردى وزىڭنەن قورعا. ءوزىڭنىڭ قىزىعۋشىلىعىڭنان. جەر بەتىندە ەكى-اق ادام بار سەكىلدى قورعا. سونى ويلاعاندا, جەر بەتىنە العاش تۇسكەن ادام مەن حاۋانى دا ويلايسىڭ. ادام اتانى كونە تۇركىلەر يالىنۇق دەگەن. وعان ءالى ورالامىز.
جاسىرىنعان كوكتەم عانا ەمەس, ادامدار اراسىندا, ولاردان دا ءبىر نارسەنى جاسىرىپ جۇرگەندەي كۇدىك تە بار. ءبىر اقپاراتتى بۇركەپ وتىرعانداي. الەمدە ءبىر الپاۋىت كۇش ءوز قولىمەن وسىنىڭ ءبارىن جاساپ تۇرعانداي. ۆيرۋستىڭ قايدان شىققانىنان باستاپ, قاشان تىيىلاتىنىنا دەيىن. سترەيزاند ەففەكتىسى دەگەن الەۋمەتتىك فەنومەن بار ەكەن. بەلگىلى ءبىر اقپاراتتى جاسىرعان سايىن ونىڭ تارالۋى ۇلعايا تۇسەدى. ادامداردىڭ ىنتىزارلىعى ارتا بەرەدى. سول باياعى تىيىم سالىنعان جەمىستىڭ ءدامى ءتىلدى كۇيدىرىپ بارادى.
ادەبيەتتە جورج ءپولتيدىڭ 36 سيۋجەتى ياعني درامالىق سيتۋاتسياسى دەگەن ۇعىم بار. جەر جارالعالى 80 ميلليارد ادام ءومىر سۇرسە, سونىڭ 8 ميلليونى جازۋشى بولسا دا, بار جازارى – وسى 36 سيتۋاتسياعا قۇرىلادى. مۇنىڭ كوبىسى ءدىني كىتاپتاردا تۇر. ماحاببا مەن ناراحا, ىزگىلىك پەن ز ۇلىمدىق, ادالدىق پەن ارامدىق, سەرت پەن ساتقىندىق, كەك پەن كەتىسۋ دەگەندەي. كانوندىق سيتۋاتسيالار, سيۋجەتتەر.
سونىڭ ءبىرى – تىيىم سالىنعان دۇنيەگە قۇمارلىق, قىزىعۋشىلىق. «گىلگامەشتەگى» ەنكيدۋدى سۇلۋدىڭ ارباۋى, زەۆستىڭ سىيلاعان قۇتىسىن پاندورانىڭ اشۋى, ادام مەن حاۋانىڭ تىيىم سالىنعان جەمىستى جەۋى. وسى جەردە ەرەكشە اتاپ وتەتىن نارسە بار, ول – قاسيەتتى كىتاپتارعا ورتاق ءبىر سيۋجەتتىڭ مانىندەگى ەكى بولەكتىك. بيبليادا, ەۆانى جىلان بەينەسىندەگى ءازازىل ارباپ, تانىم داراعىنداعى تىيىم سالىنعان جەمىستى (الما, ءجۇزىم, ت.ب.) جەگىزىپ, كەيىن ونى ەۆا ادامعا ۇسىنسا (وسىدان ايەل وبرازىنداعى ازازىلدىك سيپات, كەرى تۇسىنىكتەر قالىپتاسقان), قۇراندا ادام مەن حاۋا جەمىستى بىرگە جەيدى. ءبىرى ەكىنشىسىن اربامايدى. كۇنا – ورتاق.
ال گرەك ميفولوگياسى جايىنا كەلسەك, پاندورا – زەۆستىڭ جاراتىپ, جەر بەتىنە جىبەرگەن العاشقى ادام سيپاتىنداعى ايەل وبرازى. پاندورا قۇتىسى نەمەسە جاشىگى – اشۋعا تىيىم سالىنعان بۇيىم. الايدا, پاندورا قىزىعۋشىلىقپەن وسى قۇتىنا اشىپ جىبەرەدى. قۇتىنىڭ ىشىندەگى بارلىق ناۋبەت – اۋرۋ مەن دەرت, قايعى مەن قاسىرەت, اشتىق پەن قۋاڭشىلىق, زوبالاڭ مەن زارلىق, اشكوزدىك پەن زالىمدىق قۇتىدان شىعىپ, جەر بەتىنە تارالىپ كەتەدى. قۇتىنىڭ ىشىندە جالعىز ءۇمىت قانا قالادى.
جيىرما ءبىرىنشى عاسىردىڭ پاندورا قۇتىسى قالاي اشىلدى؟ كىم اشتى؟ جەۋگە تىيىم سالىنعاندى كىم جەدى؟ اتى جامان ىندەت جارقانات ەتىن جەگەن ادامنان تارالدى دەگەن اقپارات بار. دەمەك, ءبىزدىڭ زاماندا اشىلعان پاندورا قۇتىسى سول بولعانى ما؟..
بەتپەردە كيگەن كوكتەم. ءوز قالاۋىمىز بەن قىزىعۋشىلىعىمىزدان قورعانايىق. ءاربىر ادامنىڭ قولىندا پاندورا قۇتىسى بار.
