ءىس-شارا 2025–2026 جىلدارعا ارنالعان يۋنەسكو-نىڭ تەحنيكالىق گرانتى اياسىندا جۇزەگە اسىرىلىپ جاتقان ەكى كۇندىك باعدارلامانىڭ العاشقى كۇنىندە ءوتىپ وتىر. قازىرگى ۋاقىتتا گرانت قاناتقاقتى رەجىمدە قازاقستاننىڭ بەس وڭىرىندە – جەتىسۋ, اتىراۋ, شىعىس قازاقستان, قاراعاندى جانە قىزىلوردا وبلىستارىندا ىسكە اسىرىلىپ جاتىر. اتالعان وڭىرلەردە گرانتتى ءتيىمدى باسقارۋدى قاداعالاپ, ونىڭ ورىندالۋىنا تۇراقتى مونيتورينگ جۇرگىزەتىن ارنايى جۇمىس توپتارى قۇرىلعان.
جيىندا پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا ۇلتتىق مادەني داستۇرلەردى جۇيەلى تۇردە مەملەكەتتىك قولداۋدىڭ ماڭىزىن اتاپ ءوتىپ, وسى باعىتتا ناقتى تاجىريبەلىك شەشىمدەر ازىرلەۋ قاجەتتىگىنە توقتالدى.
وڭىرلەر الدىندا قازاقتىڭ ءداستۇرلى مادەنيەتىنىڭ ۇمىت قالعان ەلەمەنتتەرىن جاڭعىرتۋ جانە ولاردى كەڭىنەن ناسيحاتتاۋدىڭ زاماناۋي تاسىلدەرىن, سونىڭ ىشىندە تسيفرلىق مەديانى ەنگىزۋ مىندەتى تۇر.
«مەملەكەت باسشىسى ۇلتتىق قۇرىلتايدا اتاپ وتكەندەي, شىنايى پاتريوتيزم – تۋعان جەرگە دەگەن جاناشىرلىق پەن قوعامعا قىزمەت ەتۋگە دايىن بولۋدان كورىنەتىن ناقتى ءىس-ارەكەتتەر. وتباسىندا ۇقىپتىلىقپەن ساقتالىپ, ۇرپاقتان-ۇرپاققا جالعاسىپ كەلە جاتقان بىرەگەي مۇرا مەملەكەت تاراپىنان ناقتى قولداۋعا يە بولىپ, زاماناۋي مادەني ورتادا تولىققاندى دامۋى قاجەت. 2003 جىلعى كونۆەنتسيا «جاندى مۇرا» تۇجىرىمداماسى رەتىندە ءبىزدىڭ قوعامنىڭ قۇندىلىقتارىمەن تولىق ۇيلەسەدى», دەدى ا.بالاەۆا.
يۋنەسكو-نىڭ 2003 جىلعى كونۆەنتسيا حاتشىلىعىنىڭ باسشىسى فۋميكو وحيناتا حالىقارالىق كومەك تەتىگىنىڭ كونۆەنتسيانى ىسكە اسىرۋداعى نەگىزگى قۇرالداردىڭ ءبىرى رەتىندەگى ماڭىزىن ەرەكشە اتاپ ءوتتى.
«قازاقستاننىڭ ماتەريالدىق ەمەس مادەني مۇراسىنىڭ ۇلتتىق ءتىزىمى جاڭارتىلىپ, ەلدىڭ ءارتۇرلى وڭىرلەرىندەگى جەرگىلىكتى قاۋىمداستىقتاردىڭ الەۋەتى نىعايتىلعانىن كورۋ – قۋانىشتى جايت. ءبىز قازاقستاندىق مەملەكەتتىك ورگاندار مەن قاۋىمداستىقتاردىڭ جۇمىسىن جوعارى باعالايمىز جانە بۇل تاجىريبە وزگە ەلدەردى دە حالىقارالىق كومەك تەتىگىن بەلسەندىرەك پايدالانۋعا ىنتالاندىرادى دەپ سەنەمىز», دەدى ف.وحيناتا.
تالقىلاۋ قورىتىندىسى بويىنشا دوڭگەلەك ۇستەل بارىسىندا ايتىلعان ۇسىنىستار جۇيەلەندىرىلىپ, الداعى جۇمىستا ەسكەرىلەتىنى اتالىپ ءوتتى.
بۇگىندە يۋنەسكو جوباسىنىڭ ءبىرىنشى كەزەڭىن ىسكە اسىرۋ اياسىندا قولدانىستاعى ۇلتتىق تىزىمدەگى 79 ەلەمەنتتىڭ 56-سى قۇجاتتالعان, ماتەريالدىق ەمەس مادەني مۇرانىڭ 277 يەسىمەن سۇحبات جۇرگىزىلگەن.
سونىمەن قاتار بەس قاناتقاقتى وڭىردە وقىتۋ سەمينارلارى وتكىزىلدى. قازىرگى ۋاقىتتا قازاقستاننىڭ ماتەريالدىق ەمەس مادەني مۇرا يەلەرىنىڭ ينتەراكتيۆتى دەرەكتەر بازاسىن جاساۋ جۇمىسى جۇرگىزىلىپ جاتىر.
سونداي-اق ەكى سالالىق سەكتسيا ءوتىپ, وندا اۋىزشا جانە ەپيكالىق مۇرا ماسەلەلەرى, بەيىندى ماماندار دايارلاۋ, قۇجاتتىق مۇرانى دامىتۋ, ونى تسيفرلاندىرۋ جانە قورلارعا قولجەتىمدىلىكتى كەڭەيتۋ, سونداي-اق بالالار مەن جاسوسپىرىمدەردى تاربيەلەۋدە ءداستۇرلى ويىندار مەن فولكلورلىق سايىستاردى پايدالانۋ ماسەلەلەرى تالقىلاندى.
باعدارلامانىڭ ەكىنشى كۇنىنە قاناتقاقتى وڭىرلەردىڭ وبلىستىق بۋىن باسشىلارىنا ارنالعان جابىق وقىتۋ سەمينارى, جەرگىلىكتى دەڭگەيدە ماتەريالدىق ەمەس مادەني مۇرا ەلەمەنتتەرىن ايقىنداۋ جانە دامىتۋ جونىندەگى سەمينار-بريفينگ, سونداي-اق يۋنەسكو-نىڭ تەحنيكالىق گرانتىن ىسكە اسىرۋعا ارنالعان جۇمىس كەڭەسى جوسپارلانعان.
