سۋرەت: sputnik.kz
ماراپاتتارعا مەملەكەتتىك ورگاندار مەن ۇيىمدار قىزمەتكەرلەرى, اۋە كومپانيالارى مەن اۋەجايلار ماماندارى, ۇشۋ ەكيپاجدارىنىڭ مۇشەلەرى, جەرۇستى قىزمەتتەرىنىڭ ماماندارى جانە سالانىڭ باسقا دا وكىلدەرى ۇسىنىلدى.
مەملەكەتتىك ناگرادالاردى مەملەكەت باسشىسىنىڭ اتىنان پرەمەر-ءمينيستردىڭ ءبىرىنشى ورىنباسارى رومان سكليار تابىس ەتتى.
«بارلىق جۇمىستىڭ ناقتى ءارى ۇيلەسىمدى ۇيىمداستىرىلعانىن اتاپ وتكىم كەلەدى. بۇل لايىقتى وردەندەر, مەدالدار جانە پرەزيدەنتتىڭ العىسى سىزدەرگە الداعى كاسىبي وسۋگە, بار داعدىلاردى جەتىلدىرۋگە, جاڭا ءبىلىم مەن قابىلەتتەردى مەڭگەرۋگە قوسىمشا سەرپىن بەرەدى دەپ سەنەمىن. بۇل سىزدەرگە الداعى ۋاقىتتا دا وتانىمىزدىڭ وركەندەۋى جولىندا جەمىستى ەڭبەك ەتۋگە جىگەرلەندىرەدى», دەدى ر.سكليار.
بيىلعى اقپان ايىندا تاياۋ شىعىس وڭىرىندە اۋە كەڭىستىگىنىڭ جابىلۋىنا بايلانىستى مەملەكەت باسشىسىنىڭ تاپسىرماسىنا سايكەس وتانداستارىمىزدى ەلگە قايتارۋ بو-يىنشا اۋقىمدى جۇمىس جەدەل ۇيىمداستىرىلدى. قۇرىلعان ۆەدومستۆوارالىق توپتىڭ قۇرامىنداعى مەملەكەتتىك ورگاندار مەن ۇيىمدار وكىلدەرى ءتيىستى جۇمىستى قامتاماسىز ەتتى.
3–13 ناۋرىز ارالىعىندا 66 رەيس ورىندالىپ, 10,2 مىڭ ازامات ەلگە جەتكىزىلدى. تاسىمالداۋدى «Air Astana», «SCAT», «FlyDubai», «Air Arabia» اۋە كومپانيالارى دۋباي, شاردجا, دجيددا, مەدينا مەن ماسكاتتان الماتى, استانا, اتىراۋ, اقتاۋ, شىمكەنت باعىتتارى بويىنشا جۇزەگە اسىردى.
