قاشىقتان وقىتۋ تۋرالى قوعامدا جانە مۇعالىمدەر مەن اتا-انالار اراسىندا كوپتەگەن ساۋالداردىڭ تۋىنداعانىن جەتكىزگەن مينيستر:
ء– بىز سىني پىكىرلەردى ەستىپ تە, كورىپ تە وتىرمىز. دەگەنمەن, قاشىقتان ءبىلىم بەرۋگە كوشۋ – كوروناۆيرۋستىق ينفەكتسيانىڭ تارالۋىن ازايتۋعا باعىتتالعان شارالار اياسىندا جۇزەگە اسىپ جاتقانىن بارلىعى تۇسىنگەنى ءجون. وكىنىشكە وراي, باسقا تاڭداۋ جوق. وقۋ پروتسەسى توقتاتىلماۋى ءتيىس.
ءبىز وسىنداي جاعدايعا تاپ بولعان باسقا ەلدەردىڭ تاجىريبەسىن الدىن الا زەردەلەدىك. ءىس جۇزىندە ولاردىڭ بارلىعى قاشىقتان وقۋ رەجيمىنە كوشكەن: بۇكىل الەم بويىنشا 870 ميلليوننان استام وقۋشى وسىنداي فورماتتا ءبىلىم الۋدا. بارلىق مۇمكىندىكتەردى, اسپەكتىلەر مەن تاۋەكەلدەردى جان-جاقتى وي ەلەگىنەن وتكىزە وتىرىپ, ءبىز دە ۋاقىتشا قاشىقتان وقىتۋعا كوشۋ تۋرالى شەشىم قابىلدادىق, – دەدى.
ۆەدومستۆو باسشىسىنىڭ مالىمدەۋىنشە, قاشىقتان وقىتۋدى ىسكە اسىرۋ ەكى باعىت بويىنشا جۇرگىزىلمەك.
بىرىنشىدەن, تەلەارنالار ارقىلى ساباق وتكىزۋ. بۇل – ءتىپتى جاڭا فورمات. بالاپان جانە ەلارنا تەلەارنالارى بىزگە وزدەرىنىڭ ەفيرلىك ۋاقىتىن ۇسىندى. ءتۇسىرىلىم جۇمىستارى باستالىپ كەتتى. نەگىزگى پاندەر بويىنشا 2000-نان استام بەينەساباق ءتۇسىرۋ قاجەت.
– مەن كەشە ءتۇسىرىلىم جۇمىستارى جۇرگىزىلىپ جاتقان ستۋديادا بولدىم. ستسەناري جازۋشىلاردان, رەجيسسەرلەر مەن پەداگوگتەردەن تۇراتىن جۇمىس توبى ءاربىر شىعارىلىمدى مۇقيات پىسىقتاۋدا. ءبىزدىڭ ۇستازدار تەلەجۇرگىزۋشى رەتىندەگى مۇلدەم جاڭا ءرولدى مەڭگەرىپ جاتىر. بەينەساباقتار قازاق جانە ورىس تىلدەرىندە جازىلۋدا. بۇل وڭاي ءىس ەمەس ەكەنىن بىردەن ايتقىم كەلەدى, دەپ جازدى ا.ايماعامبەتوۆ.
ال ەكىنشى باعىت بويىنشا ارنايى مامانداندىرىلعان ينتەرنەت-پلاتفورمالارى ارقىلى ساباقتار وتكىزىلەدى. بۇل تسيفرلىق جۇيەلەر وقۋشىلارعا وتكەن ساباقتى نەمەسە بۇرىن تالقىلانعان تاقىرىپتى قايتا قاراۋعا, سونداي-اق ونلاين-ساباق وتكىزۋگە, كەرى بايلانىس ورناتۋعا, جەكە دارا وقىتۋ مەن تاپسىرمالاردى گەيميفيكاتسيالاۋعا زور مۇمكىندىك بەرەدى. سونىمەن قاتار, بۇل فورمات تەستىلەۋ جۇمىستارىن وتكىزۋگە جانە العان بىلىمدەرىن باعالاۋعا مۇمكىندىك جاسايدى.
مينيستر بۇرىن مۇنداي كومپانيالاردىڭ ءبىلىم بەرۋ كونتەنتىنە قول جەتكىزۋ اقىلى بولعانىن, وسى كەزەڭدە ءبىزدىڭ بالالار بارلىق كەرەك اقپاراتتى جانە پلاتفورمالاردى تەگىن پايدالانا الادى. ءتيىستى كەلىسىمگە قول جەتكىزىپ وتىرعانىن اتاپ ءوتتى. قوسا كەتەيىك, ءبىلىم بەرۋ رەسۋرستارىن قولدانۋعا مەگابايت الىنبايتىنى تۋرالى تولىعىراق بۇرىنعى ماتەريالىمىزدان وقي الاسىز.
