الايدا, مىنا ماسەلەنى العا تارتا كەتكەن ءجون, بۇل كۇندەرى قالادا دەزينفەكتسيالاۋ ءىسىن ءتيىمدى جۇرگىزۋدە كەدەرگىلەر بار.
قۇزىرلى مەكەمەلەردىڭ ايتۋىنشا, قالا اكىمدى كوپپاتەرلى ۇيلەردى دەزينفەكتسيالاۋدى 25 ناۋرىزدان باستادى. جانە كىرەبەرىستەردى زالالسىزداندىرۋ ءۇش بولىككە بولىنگەن, ياعني كۇن سايىن ءبىرى بولىگى تازارىپ وتىرۋ ءتيىس. الايدا, كەستە بويىنشا پودەزدەردى جىلدام دەزينفەكتسيالاۋعا كوپ جاعدايدا تۇرعىنداردىڭ ءوزى كەدەرگى كەلتىرەدى. سەرتيفيكات تالاپ ەتەدى, كىرگىزبەيدى. «سۇيىقتىقتى كوز الدىمىزدا ارالاستىر نەمەسە ءيىسى ناشار, باسقاسىمەن تازالا» سياقتى جايتتەر ءجيى قايتالانادى. سوندىقتان دا بريگادالارعا تۇنىمەن جۇرۋگە تۋرا كەلەدى.
كەرىسىنشە, قالا تۇرعىندارىنان «دەزينفەكتسيا جۇمىستارى قالاي-بولسا سولاي, سالاق ورىندالىپ جاتىر. تۇرعىندارعا ۇيدەن شىقپا دەپ حابارلاپ جاتقان جوق. ۇندەمەي كەلىپ ءار جەرگە ءبىر سەۋىپ كەتكەن. ونىسى قۇر سۋ سياقتى, مۇلدەم ءيىسى جوق» دەگەن شاعىمدار دا بار.
سونىمەن, تۇرعىن ءۇي ساياساتى باسقارماسى كوروناۆيرۋستىق ينفەكتسيانىڭ تارالۋىنا جول بەرمەۋ ءۇشىن ازاماتتاردى قابىلداۋدى ۋاقىتشا توقتاتتى, كەڭەس بەرۋ جانە قۇجاتتاردى قابىلداۋ ونلاين-رەجيمگە اۋىستىرىلدى. ازاماتتاردىڭ قولايلىلىعى ءۇشىن وسى ماقساتتا باسقارما عيماراتىنىڭ 1-قاباتىندا ينتەرنەتكە شىعاتىن كومپيۋتەرلەرمەن جابدىقتالعان ۋاقىتشا ورىندار ۇيىمداستىرىلدى.
بۇل رەتتە, باسقارمانىڭ بارلىق عيماراتى بويىنشا ءاربىر 2 ساعات سايىن دەزينفەكتسيالاۋ قۇرالدارىن پايدالانا وتىرىپ, سانيتاريالىق تازارتۋ جۇرگىزىلەدى. سونىمەن قاتار, انتيسەپتيكالىق قۇرالدارى بار سانيتايزەرلەر مەن دوزاتورلار ورناتىلدى.
باسقارما قىزمەتكەرلەرى باسشىلىق قۇرامدى قوسپاعاندا, اۋىسىمدىق جۇمىس رەجيمىنە اۋىستىرىلدى.
اۋدان اكىمى اپپاراتتارىمەن بىرلەسىپ, الماتى قالاسى تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ ازىرلەگەن الگوريتمىنە سايكەس, ءتيىستى شارالار قابىلداۋ ءۇشىن باسقارۋ ورگاندارىنىڭ (پيك) باسشىلارىنا ءتۇسىندىرۋ جۇمىستارى جۇرگىزىلدى.
اتاپ ايتقاندا:
- دەزينفەكتسيالاۋ قۇرالدارىن پايدالانا وتىرىپ, جالپىعا قولجەتىمدى ورىنداردى (كىرەبەرىستەر, تۇتقالار جانە ت. ب.) كۇن سايىن سانيتاريالىق تازالاۋ;
- كوروناۆيرۋستى ينفەكتسيانىڭ الدىن الۋ بويىنشا جادىنامالاردى كىرە بەرىستەرگە ورنالاستىرۋ;
- اۋلالار مەن اۋلا اۋماقتارىن دەزينفەكتسيالاۋ.
قالادا 8494 ءۇيدىڭ 23 613 پودەزد جانە 4082 اۋلا اۋماعى وڭدەلگەن. جۇمىستىڭ ۇلكەن كولەمىن ەسكەرە وتىرىپ, بارلىق اۋداندار بويىنشا دەزينفەكتسيالىق وڭدەۋ جۇرگىزۋ ولاردىڭ جالپى سانىنان كۇنىنە كەمىندە 33% قامتي وتىرىپ, 3 كۇنگە بولىنگەن. سونىمەن, ۇيلەر مەن اۋلالار اپتاسىنا 2 رەت كەستە بويىنشا وڭدەلەتىن بولادى.
2020 جىلدىڭ 26 ناۋرىزىندا جوسپارلانعان (2 792 ۇيدەگى) 8 267 كىرەبەرىستىڭ 96,6%-ى (7835) جانە 1148 اۋلا اۋماعىنىڭ 94,3%-ى (1082) وڭدەلدى. دەزينفەكتسيا جۇمىستارىنا 50 بريگادا, شامامەن 350 ادام جۇمىلدىرىلدى. قالعان جۇمىس كولەمى ءبىر كۇن ىشىندە اياقتالادى.
الماتى
