اتالعان حالىقارالىق ۇيىم مەكتەپتەرىن جابۋعا ءماجبۇر بولعان ەلدەردىڭ بارلىعىن جانە سول ەلدەردەگى جەكەمەنشىك ۇيىمداردى وقۋشىلارعا ءبىلىم بەرۋدى جالعاستىرۋعا, قانداي جاعداي بولماسىن بالالاردىڭ ءبىلىم الۋىن توقتاتپاۋعا شاقىردى. دۇنيەنى دۇرلىكتىرگەن دەرت ءبىلىم سالاسىنا دا ەداۋىر قيىندىق اكەلدى. بۇعان جوعارىداعى ىقپالدى ۇيىمنىڭ الەمدەگى وقۋشىلاردىڭ 87 پايىزى مەكتەپكە قاتىناي الماي قالعانىن جازعانىنان انىق كوز جەتكىزۋگە بولادى. يۋنەسكو وسىعان وراي ءبىلىم بەرۋ بويىنشا جاھاندىق كواليتسيا قۇردى.
يۋنەسكو-نىڭ باس ديرەكتورى ودرە ازۋلە:
– ءبىز بۇعان دەيىن ەشقاشان ءبىلىم بەرۋ ۇدەرىسىنىڭ دال وسىنداي كەڭ كولەمدە بۇزىلىسىمەن بەتپە-بەت كەلمەدىك. سەرىكتەستىك قارىم-قاتىناس – العا جىلجۋدىڭ جالعىز جولى. كواليتسيا وقۋشىلار مەن مۇعالىمدەردى عانا ەمەس, سونىمەن قاتار قالپىنا كەلتىرۋ پروتسەسى كەزىندە دە قولداۋ كورسەتەتىن ينكليۋزيۆتىلىك پەن تەڭدىككە باعىتتالعان شەشىمدەردى ىزدەستىرۋ ءۇشىن ۇيلەستىرىلگەن جانە يننوۆاتسيالىق ءىس-قيمىلدارعا شاقىرۋدى كوزدەيدى, – دەدى.
ايتا كەتەيىك, بۇگىندە Microsoft, GSMA, Weidong, Google, Facebook, Zoom, KPMG, Coursera سەكىلدى ءىرى جەكە سەكتورلار كواليتسياعا قوسىلىپ, Khan Academy, Dubai Cares, Fundación Profuturo كوممەرتسيالىق ەمەس ۇيىمدار مۇشە بولعان.
يۋنەسكو-نىڭ رەسمي سايتىندا الپاۋىت بي-بي-سي ارناسىنىڭ الەمدەگى وقۋشىلار مەن ستۋدەنتتەردىڭ قاۋىپتى ىندەت تۋرالى تانىمىن كەڭەيتۋگە اتسالىسىپ, كواليتسيانى قولداعانى جانە وسىنداي ۇلكەن مەديا كورپوراتسياسىنان وزگەلەردىڭ دە ۇلگى الۋى كەرەكتىگى جازىلعان. ال جازبانىڭ سوڭىندا كواليتسياعا قولداۋ كورسەتكىسى كەلەتىن ۇيىمدارعا, ازاماتتىق قۇرىلىمدارعا حابارلاسۋ ءۇشىن تومەندەگى انىقتاما مالىمەتتەرى كورسەتىلگەن:
كلەر و'حاگان – يۋنەسكو-نىڭ ءباسپاسوز قىزمەتى;
ەلەكتروندى پوشتا – c.o-hagan@unesco.org
تەلەفون ءنومىرى +33 01456 81729.
