ولاي بولسا, كارانتين كەزىندە اشىق ۋنيۆەرسيتەتتەردى اشىڭىز. قازىر ۇيدە وتىرىپ, سوناۋ اقش-تاعى نەمەسە انگلياداعى جوعارى وقۋ ورنىنىڭ لەكتسياسىن تىڭداۋعا بولادى. ءبىز الەمدەگى ۇزدىك ۋنيۆەرسيتەتتەردىڭ تەگىن ءدارىسىن الدىڭعى ماتەريالىمىزدىڭ بىرىندە جازعانبىز. ەندى اشىق ۋنيۆەرسيتەتتەرگە كەزەك كەلدى.
جالپى بۇل ۇعىم 1969 جىلى ۇلىبريتانياداعى اشىق ۋنيۆەرسيتەتتىڭ (Open University) قۇرىلۋىنان باستاپ پايدا بولدى. العاش رەت 1971 جىلى تالاپكەرلەرىن قابىلداعان بۇل ۋنيۆەرسيتەتتىڭ قازىرگى تاڭدا دۇنيە جۇزىندەگى 50-دان اسا ەلدە ستۋدەنتتەرى بار. ياعني قازىرگى قوعامعا, ينتەرنەتتىڭ زامانىنا جاڭالىق ەمەس. سونىڭ نەگىزىندە جاساقتالعان تەگىن كۋرستاردىڭ قورى دا كوپ. ايتالىق, اشىق ۋنيۆەرسيتەت ارقىلى ءبىلىم بەرەتىن www.open.edu پلاتفورماسىندا «دەنساۋلىق, سپورت, فيزيولوگيا», ء «بىلىم بەرۋ جانە دامىتۋ», «تاريح پەن ونەر», «تىلدەر», «اقشا جانە بيزنەس», «تابيعات پەن قورشاعان ورتا», «عىلىم, ماتەماتيكا جانە تەحنولوگيا», «الەۋمەت, ساياسات, قۇقىق» اتتى بولىمدەرگە جىكتەلگەن 900-گە جۋىق تەگىن كۋرستارعا قول جەتكىزۋگە مۇمكىندىك بار.
وسى ۇلگىدە جاسالعان «قازاقستاننىڭ اشىق ۋنيۆەرسيتەتى» بارىن وقىرمانداردىڭ ءبىرى بىلسە, ءبىرى بىلە بەرمەس. ويتكەنى ەلىمىزدىڭ جەتەكشى جوو-لارى مەن ماماندارى بىرلەسە ازىرلەگەن ونلاين-كۋرستارعا تەگىن قول جەتكىزۋ مۇمكىندىگىن ۇسىناتىن بۇل ءبىلىم بەرۋ پلاتفورماسى 2017 جىلى قۇرىلعان ۇلتتىق اۋدارما بيۋروسىنىڭ باستاماسىمەن ىسكە اسىرىلدى. وتاندىق بەلدى ۋنيۆەرسيتەتتەر مەن ءتۇرلى حالىقارالىق كومپانيالار قولداعان «قازاقستاننىڭ اشىق ۋنيۆەرسيتەتى» قولدانۋشىلارىنا «اقپاراتتىق تەحنولوگيالار», «بيزنەس», «گۋمانيتارلىق عىلىمدار», «جاراتىلىستانۋ عىلىمى» ساناتتارى بويىنشا ءتۇرلى تەگىن كۋرستاردى, الەمگە تانىمال ۋنيۆەرسيتەتتەر ماماندارىن دايارلاعان وقۋلىقتاردى, پايدالى TED ۆيدەولارىن قازاق تىلىندە ۇسىنادى. جۇمىستان دەمالىس العان بارلىق سالا قىزمەتكەرلەرى ءوزىن كاسىبي تۇرعىدا دامىتاتىن ماتەريالداردى تابا الادى جانە ەڭ باستىسى تەگىن پايدالانادى. تەك ينتەرنەتكە قوسىلعان قۇرىلعىڭىز بولۋى جانە پلاتفورماعا تىركەلۋ كەرەك.
ماسەلەن, ءوزىمىز بەلگىلى جۋرناليست قاينار ولجاي جۇرگىزەتىن «تەلەۆيزيا, راديو جانە جاڭا مەدياعا ءماتىن جازۋ» اتتى تەگىن كۋرسىن باستاپ كەتتىك.
