– يۋنەسكو-نىڭ اقپاراتىنا سايكەس, بۇگىنگى تاڭدا 107 مەملەكەتتە ورتا ءبىلىم بەرەتىن مەكتەپتەر تولىق جابىلعان. بۇل – 861 ميلليون وقۋشى ءبىلىم الۋىن توقتاتتى دەگەن ءسوز. بۇعان قوسا 12 ەلدىڭ كەيبىر قالالارىندا ورتا ءبىلىم بەرۋ وشاقتارى جۇمىس ىستەمەيدى. وسىعان بايلانىستى بىرقاتار مەملەكەتتىڭ الدىندا اتالعان ۇدەرىس سالدارىن ازايتۋ جانە ۇزدىكسىز ءبىلىم بەرۋدى قامتامسىز ەتۋ ءۇشىن مۇمكىندىك جاساۋ مىندەتى تۇر. وتاندىق ءبىلىم بەرۋ جۇيەسى ءۇشىن دە قاشىقتان وقىتۋ فورماتىنا كوشۋ – ۇلكەن سىناق, – دەدى مينيستر ءوزىنىڭ فەيسبۋكتەگى رەسمي پاراقشاسىندا.
ۆەدومستۆو باسشىسى قازىرگى تاڭدا ءبىلىم بەرۋدىڭ ءار دەڭگەيى ءۇشىن ءتۇرلى وقىتۋ جۇيەلەرى ۇسىنىلىپ جاتقانىن جەتكىزدى. ءبارىمىز باعامدايتىنداي, سونىڭ ىشىندە ەڭ ماڭىزىسى – مەكتەپتەر جايى. سەبەبى ورتا ءبىلىم بەرۋ جۇيەسى كاسىپتىك-تەحنيكالىق نەمەسە جوعارى ءبىلىم بەرۋ سالاسىنداي ەمەس, كۇردەلىرەك. ياعني ورتا ءبىلىم وشاقتارى عانا ەمەس, قازىر ۇيدە جۇمىس ىستەپ وتىرعان مۇعالىمدەر تۇگەل ينتەرنەتكە قولجەتىمدى ەمەس. ونىڭ ۇستىنە اتا-انالار دا بالالارىن تەگىس تەحنيكامەن قامتاماسىز ەتىپ وتىر دەي المايمىز.
وسى اتالعان ماسەلەنى شەشۋ ماقساتىندا مينيسترلىكتە ارنايى جۇمىس توبى قۇرىلعان. ونىڭ قۇرامىنا قاشىقتان ءبىلىم بەرۋ سالاسىندا جۇمىس ىستەيتىن «Bilimland», «Daryn.online», «كۇندەلىك», «Univer», «Platonus», «EduPage», بيل, «BTS education», «U-study» ي «AGS» سىندى ۇيىمداردىڭ وكىلدەرى جانە پەداگوگتەر, ادىسكەرلەر, مەكتەپ ديرەكتورلارى, ديرەكتورلاردىڭ وقۋ ءىسى جونىندەگى ورىنباسارلارى جانە جوو پرورەكتورلارى ەندى. اتالعان توپ تاپسىرمالار بەرۋدى, ولاردىڭ ورىندالۋىن تەكسەرۋدى, باعالاۋدى جانە كەرى بايلانىستى, سونداي-اق قاجەت بولعان جاعدايدا پەداگوگتەردىڭ ءوز سىنىبىمەن ونلاين-تالقىلاۋ, باعالاۋ بويىنشا نەمەسە بەينە-ستريمينگ سەرۆيستەرىن پايدالانا الۋىن قامتاماسىز ەتەتىن اقپاراتتىق جۇيەلەر ەنگىزۋ مىندەتىن قولعا العان.
ال ينتەرنەتكە, قۇرىلعىعا قولجەتىمدىلىگى جوق وقۋشىلاردى وقىتۋ ماسەلەسىن مينيستر سپۋتنيكتىك تەلەارنالار ارقىلىشەشۋ جۇمىستارىنىڭ ازىرلەنىپ جاتقانىن جازدى.
– تەلەارنالار ارقىلى ساباق وتكىزۋگە دايىندالىپ جاتىرمىز. وندا بەينە-ساباقتار ساباق كەستەسىنە ساي كورسەتىلەدى. بۇل تەتىك – اسىرەسە ينتەرنەت قۋاتى ءالسىز جانە قاجەتتى قۇرال-جابدىقتارعا قاتىستى قيىندىقتارى بار اۋىلدىق ءبىلىم بەرۋ ۇيىمدارى ءۇشىن وزەكتى.
ءبىز ءۇشىن بارلىق ساباق ورتا ءبىلىم بەرۋدىڭ مەملەكەتتىك جالپىعا مىندەتتى ستاندارتىنا ساي وقۋ باعدارلاماسى بويىنشا, ساباق كەستەسىنە ساي, تسيفرلىق ءبىلىم بەرۋ رەسۋرستارى بويىنشا ادىستەمەلىك قولداۋمەن جانە مۋلتيمەديالىق ماتەريالدارمەن قامتاماسىز ەتىلىپ, ۇستازدار ءۇشىن الدىن الا ازىرلەنگەن جوسپار بويىنشا جۇرگىزىلگەنى ماڭىزدى. باستىسى, بالالاردىڭ ءبىلىم الۋى ساپاعا اسەر ەتپەۋى قاجەت, – دەدى ا.ايماعامبەتوۆ.
