ەلوردا • 19 ناۋرىز، 2020

ەلورداداعى ستۋدەنتتەرگە وتەماقى تولەندى

144 رەتكورسەتىلدى

بۇل تۋرالى نۇر-سۇلتان قالاسى ءبىلىم باسقارماسىنىڭ باسشىسى شولپان قادىروۆا ەلىمىزدە جاريالانعان توتەنشە جاعدايعا بايلانىستى قابىلدانعان شارالار بويىنشا وتكەن ونلاين-بريفينگتە بايانداعان بولاتىن. 

ەلورداداعى ءبىلىم بەرۋ ۇيىمدارىندا ساقتىق شارالارىنىڭ كۇشەيتىلگەنى جونىندە جەتكىزگەن ش.قادىروۆا ءبىلىم بەرۋدىڭ ءار ساتىسى بويىنشا ەنگىزىلگەن وزگەرىستەرگە توقتالدى.

بۇعان دەيىن حابارلاعانمىزداي، باس قالا كارانتينگە جابىلعاندىقتان استانالىق مەكتەپكە دەيىنگى ۇيىمدار جۇمىسىن توقتاتتى.

«ورتا ءبىلىم بەرۋ ۇيىمدارىنا كەلسەك، ەلورداداعى 117 مەكتەپتىڭ وقۋشىلارى تۇگەلىمەن كوكتەمگى كانيكۋلعا كەتتى. ال مۇعالىمدەردىڭ بارلىعى قاشىقتىقتان جۇمىس ىستەۋگە كوشتى. تەك اكىمشىلىك-تەحنيكالىق قىزمەتكەرلەر بەلگىلەنگەن كەستەگە سايكەس جۇمىستارىن جالعاستىرىپ جاتىر»، دەدى ش.قادىروۆا. ونىڭ مالىمدەۋىنشە، پەداگوگيكالىق-پسيحولوگيالىق تۇزەتۋ كابينەتتەرى دە توتەنشە جاعداي ەنگىزىلگەننەن باستاپ قابىلداۋدى توقتاتقان. سونداي-اق وسى ۋاقىتقا جوسپارلانعان بارلىق (سپورتتىق، مادەني شارالار، وليمپيادالار مەن بايقاۋلار) ءىس-شارالار ازىرشە وتكىزىلمەيدى. كوكتەمگە بەكىتىلگەن ۇبت-نىڭ ۋاقىتى دا اۋىستىرىلدى، ناقتى كۇنى بەلگىلى بولعاندا حابارلانادى. «جاقىندا الەۋمەتتىك جەلىلەردە مەكتەپتەردى تەكسەرىپ، وقۋشىلار ءبىلىم وشاقتارىندا بولعان جاعدايدا اتا-انالارىنا ايىپپۇل سالىناتىنى تۋرالى اقپارات تارادى. بۇل – جالعان. نەگىزسىز اقپاراتقا سەنبەۋدى سۇرايمىز»، دەدى باسقارما باسشىسى. 

ۆەدومستۆو وكىلىنىڭ سوزىنە سەنسەك، باس قالاداعى 35 كاسىپتىك جانە تەحنيكالىق ءبىلىم بەرۋ ۇيىمدارى 16 ناۋرىزدان ستۋدەنتتەرىن قاشىقتىقتان وقىتا باستادى. بۇل تۋرالى ءۇش جاقتى (اتا-انا، وقىتۋشىلار مەن ءبىلىم الۋشىلار) حابارلاندىرۋ جۇرگىزىلدى. ينتەرنەتكە قول جەتكىزە الماي وتىرعان ستۋدەنتتەرگە وقۋلىقتار، دارىستىك ماتەريالدار مەن تاپسىرمالار جەتكىزىلەدى. كوللەدجدەر سانيتايزەرلەرمەن قامتاماسىز ەتىلگەن، دەزيفەكتسيالىق شارالاردى جۇرگىزۋگە قۇرالدار قورى جەتكىلىكتى.

«9 مىڭ 177 ستۋدەنت باسقا قالالاردان كەلگەن، ولار تۇرعىلىقتى جەرلەرىنە جىبەرىلدى. 157 ستۋدەنتتىڭ تاماقتانۋى ءۇشىن وتەماقى رەتىندە قاراجات قاراستىرىلىپ، بانك كارتالارىنا اۋدارىلدى. ستۋدەنتتەردىڭ ستيپەندياسى ساقتالادى»، دەدى ش.قادىروۆا. ونىڭ ايتۋىنشا، كاسىپتىك تاجىريبەلەردەن ءوتۋ دە كەيىنگە قالدىرىلدى.

ەلورداداعى 11 مەملەكەتتىك قوسىمشا ءبىلىم بەرۋ ۇيىمدارىنىڭ جۇمىستارى 16 ناۋرىزدان بەرى توقتاتىلدى. باسقارما باسشىسى استانالىق اتا-انالاردى بالالالارىن توتەنشە جاعداي كەزىندە قوسىمشا ۇيىرمەلەر مەن سەكتسيالارعا جىبەرمەگەنى ءجون ەكەنىن جەتكىزدى.  

 

سوڭعى جاڭالىقتار

ۇقساس جاڭالىقتار