مەكتەپكە دەيىنگى ءبىلىم. ءمينيستردىڭ حابارلاۋىنشا, بالاباقشالار ەلىمىزدەگى توتەنشە جاعدايعا بايلانىستى شتاتتىق رەجىمدە جۇمىس ىستەيدى. بالالاردىڭ مەكتەپكە دەيىنگى ۇيىمعا بارۋ-بارماۋىن اتا-انالار شەشەدى. كەلمەگەنى ءۇشىن بالاباقشادان شىعارىلمايدى, ياعني بالانىڭ ورنى ساقتالادى. قازىرگى تاڭدا بالالاردىڭ 40 پايىزى عانا مەكتەپكە دەيىنگى مەكەمەگە بارىپ ءجۇر.
ورتا ءبىلىم. وقۋشىلار 2020 جىلعى 16 ناۋرىزدان باستاپ 5 ساۋىرگە دەيىن كوكتەمگى دەمالىستا بولادى. مۇعالىمدەر اتالعان مەرزىمدە قاشىقتىقتان جۇمىس ىستەيدى. ال مەكتەپ ديرەكتورلارى مۇعالىمدەردىڭ قاشىقتىقتان جۇمىس ىستەۋى جانە كانيكۋل كەزىندە اتقارىلاتىن جۇمىس كولەمىنە ساي جالاقىنى تولىق تولەۋ تۋرالى اكتىلەردى قابىلدايدى. ەگەر كانيكۋلدان كەيىن دە وقۋشىلار مەكتەپكە بارا الماسا, ولاردى قاشىقتىقتان وقىتۋدىڭ مۇمكىندىكتەرىن مينيسترلىكتە قۇرىلعان ارنايى توپ قاراستىرماق. ا.ايماعامبەتوۆ مەكتەپ وقۋشىلارىن قاشىقتىقتان وقىتۋعا دايىندىقتىڭ 5 ساۋىرگە دەيىن اياقتالاتىنىن ايتتى. سونداي-اق پەداگوگتەردىڭ بىلىكتىلىگىن ارتتىرۋ كۋرستارى ونلاين-فورماتتا وتكىزىلەدى. كەيبىر كۋرستاردى وتكىزۋ بيىلعى جىلدىڭ ەكىنشى جارتىجىلدىعىنا اۋىستىرىلدى.
قوسىمشا ءبىلىم. 16 ناۋرىزدان باستاپ مەملەكەتتىك قوسىمشا ءبىلىم بەرۋ ۇيىمدارىنىڭ (وقۋشىلار مەن جاسوسپىرىمدەر سارايى, مۋزىكا, كوركەمسۋرەت, ونەر مەكتەپتەرى جانە تاعى باسقا) قىزمەتى توقتاتىلدى. ۆەدومستۆو جانىنداعى بالالاردىڭ قۇقىقتارىن قورعاۋ كوميتەتى قازىرگى جاعدايدى ەسكەرە وتىرىپ, اتا-انالارعا بالالارىن جەكەمەنشىك دامىتۋ ورتالىقتارىنا دا جىبەرمەۋگە كەڭەس بەرەدى.
كاسىپتىك جانە تەحنيكالىق ءبىلىم. كوللەدجدەردە قاشىقتىقتان وقىتۋ ماسەلەسى بويىنشا بىرقاتار قيىندىق بار. بارلىعىندا بىردەي مۇمكىندىك بولماي تۇر. سوعان قاراماستان كوللەدجدەردىڭ باسىم بولىگى ءتيىستى جۇيە بويىنشا جۇمىس ىستەپ كورگەن. قالعاندارى قاتارعا قوسىلىپ كەلەدى. قازىر ارنايى جۇيەلەرگە كونتەنت جۇكتەۋ, وقۋ-ادىستەمەلىك كەشەندى ەنگىزۋ, سونداي-اق ساندىق ءبىلىم بەرۋ رەسۋرستارى بويىنشا اۋقىمدى جۇمىس اتقارىلىپ جاتىر.
جوعارى ءبىلىم. قاشىقتىقتان وقىتۋ جۇيەسى وتاندىق ۋنيۆەرسيتەتتەردىڭ ءبىلىم بەرۋ ۇدەرىسى ءۇشىن جاڭالىق ەمەس. ءبىلىم جانە عىلىم مينيسترلىگى بۇيرىققا قول قويعان ساتتەن باستاپ, ارنايى تەحنولوگيالاردى پايدالانىپ جۇرگەن كەيبىر جوو-لار ونلاين-فورماتتا وقىتۋدى باستاپ كەتتى. وقۋ پروتسەسىن ۇيىمداستىرۋ ءۇشىن وقىتۋشىلار مەن ستۋدەنتتەرگە ەلەكتروندى پلاتفورمالارعا كىرۋگە جاعداي جاسالادى. وقىتۋ قۇرالى رەتىندە ۆيدەو-ساباقتار, دەربەس ونلاين-جۇمىس, ونلاين-كۋرستار پايدالانىلادى. بىزدە «Bilimland», «Google Classroom», «MOODLE», «Univer», «Platonus», «Canvas», «Daryn.online» سىندى جاقسى جۇيەلەر بار. سونداي-اق «Coursera» ءوز كۋرستارىن تەگىن ۇسىندى جانە «ZOOM» وقىتۋ بارىسىندا سەرۆيستى اقىسىز قولدانۋعا مۇمكىندىك بار.
مينيستر مالىمدەگەندەي, بيلەت نەمەسە قارجى تاپشىلىعى سىندى ءارتۇرلى جاعدايلارعا بايلانىستى قالادان كەتە المايتىن ستۋدەنتتەر جاتاقحانالاردا تۇرا بەرەدى. بىراق ولار تەك ءوز بولمەلەرىندە بولۋلارى ءتيىس.
ايتا كەتەيىك, توتەنشە جاعداي كەزىندە ءبىلىم الۋشىلار مەن تاربيەلەنۋشىلەردىڭ حالىقارالىق سپورتتىق, مادەني, تۋريستىك ءىس-شارالارعا قاتىسۋىنا جانە بۇقارالىق شارالاردى ۇيىمداستىرۋعا تىيىم سالىندى. سونىمەن قاتار جالپى ءبىلىم بەرەتىن پاندەر بويىنشا وقۋشىلاردىڭ رەسپۋبليكالىق وليمپياداسى مەن اۋىل مەكتەپتەرىنە ارنالعان «مىڭ بالا» ۇلتتىق زياتكەرلىك وليمپياداسىنىڭ IV كەزەڭىن جانە باسقا دا كونكۋرستاردى وتكىزۋ مەرزىمى كەيىنگە شەگەرىلدى.
