اقتاۋ قالاسى «ماڭعىستاۋ ارەنا» سپورت كەشەنىندە ۇستەل تەننيسىنەن جانە «كاسپي» فۋتبول كلۋبىندا فۋتبولدان شەبەرلىك ساعاتتارى ۇيىمداستىرىلدى. ماقساتى - وسال توپتاعى بالالاردى سپورتقا تارتۋ, قولداۋ كورسەتۋ, سالاۋاتتى ءومىر سالتىن قالىپتاستىرۋ. ءىس–شارا وڭىرلىك قحا ەرىكتىلەرىنىڭ, ەتنومادەني بىرلەستىكتەردىڭ, سپورت كەشەنى جاتتىقتىرۋشىلارىنىڭ مۇرىندىق بولۋىمەن وتكىزىلدى.
- «NEXT چەمپيونمىن» رەسپۋبليكالىق اكتسياسى اياسىندا ەرەكشە تۇلعاداعى بالالارعا ۇستەل تەننيسىنەن جانە بالالار ءۇيىنىڭ تاربيەلەنۋشىلەرىنە فۋتبولدان شەبەرلىك ساعاتتارىن وتكىزۋدى ۇيىمداستىردىق. دامۋ ەرەكشەلىگى, يا بولماسا باسقا فاكتورلار بولسىن, ء بىز ءۇشىن بارلىعى ماڭىزدى. سوندىقتان بۇگىنگى سپورتتىق شارالاردىڭ ماڭىزدىلىعى جوعارى دەپ سانايمىن. تەننيستى بالالار وتە كەرەمەت وينادى. سپورتقا, ونىڭ ىشىندە تەننيسكە قابىلەتتەرىنىڭ جوعارى ەكەندىگىن كورسەتتى جانە ويىن دا بالالارعا ۇنادى. وسى اكتسيانى وتكىزۋگە قولداۋ كورسەتكەنى ءۇشىن «ماڭعىستاۋ ارەنا» سپورت كەشەنى, «كاسپي» فۋتبول كلۋبى باسشىلارىنا, جاتتىقتىرۋشىلارعا, ەتنومادەني بىرلەستىك توراعالارىنا العىسىمدى بىلدىرەمىن. وسىمەن شەكتەلمەي, الداعى ۋاقىتتا دا سپورت سالاسى بويىنشا ۆولونتەرلىك قىزمەت جالعاسىن تاباتىن بولادى, دەيدى ماڭعىستاۋ وبلىسى قحا ەرىكتىسى رۋسلان باماتگەرەەۆ.
- وڭىرلىك قحا ەرىكتىلەرىنىڭ, «ماڭعىستاۋ ارەنا» سپورت كەشەنى باسشىسىنىڭ قولداۋىمەن رەسپۋبليكالىق «مەن كەلەسى چەمپيونمىن» اكتسياسىنا, اقتاۋ قالاسى №2 ورتا مەكتەپتە وقيتىن ەرەكشە تۇلعاداعى بالالاردى اكەلىپ وتىرمىز. بۇگىنگى اكتسيا اياسىندا ۇستەل تەننيسىنەن شەبەرلىك سىنىپ ساعاتتارىن ۇيىمداستاستىرىپ, ەرەكشە تۇلعاداعى بالالارعا قولداۋ كورسەتكەندەرى ءۇشىن وبلىستىق قحا-عا العىسىمىزدى بىلدىرەمىز. جاتتىقتىرۋشىلارعا بالالاردىڭ ويىندارى ۇنادى. ويتكەنى بالالار سپورتتىڭ وسى ءتۇرىن بۇرىننان دا ويناپ, ۇيرەنىپ جۇرگەندەرىن, قابىلەتى بار ەكەندىكتەرىن كورسەتە ءبىلدى, سپورتقا وتە جاقىن, وبلىستىق, رەسپۋبليكالىق, حالىقارالىق جارىستارعا قاتىسىپ, جۇلدەلى ورىندارعا يە بولىپ ءجۇر. سوندىقتان دا ۇيىمداستىرۋشى ەرىكتىلەر الداعى ۋاقىتتا ايىنا ءبىر رەت بالالارعا سپورتتىڭ وسى تۇرىنەن ۇيىرمە وتكىزۋگە ۇسىنىستارىن ءبىلدىردى. تاعى دا ءبىر قۋانتارلىق جاعداي, وڭىرلىك ەتنومادەني بىرلەستىكتەر وسى ەرەكشە تۇلعاداعى بالالارعا ارناپ راكەتكا, شاريكتەر, مۇمكىندىك بولىپ جاتسا ۇستەلدەر الىپ بەرۋ جولدارىن قاراستىرىپ, قولداۋ كورسەتەتىندىكتەرىن ايتتى, دەدى «ماڭعىستاۋ وبلىستىق ەرەكشە تۇلعالاردىڭ دەنە شىنىقتىرۋ جانە سپورت فەدەراتسياسى» قوعامدىق بىرلەستىگىنىڭ ءتورايىمى ماڭدايلى جارىلگاس.
ماڭعىستاۋ وبلىسى
