ايماقتار • 28 اقپان، 2020

ماڭعىستاۋدا وتكەن جىلى 88 ميلليارد تەڭگەگە جۋىق قاراجاتقا 71 جوبا جۇزەگە اسىرىلدى

28 رەتكورسەتىلدى

ماڭعىستاۋدا «قاراپايىم زاتتار ەكونوميكاسى» اياسىندا جەڭىلدەتىلگەن نەسيە بەرۋ باعدارلاماسى بويىنشا بىرقاتار جۇمىستار جۇرگىزىلدى، دەپ حابارلادى مو كاسىپكەرلەر پالاتاسى ءباسپاسوز قىزمەتى.

2019 جىلدىڭ قورىتىندىسى بويىنشا جالپى سوماسى 88 ميلليارد تەڭگەگە جۋىق قاراجاتقا 71 جوبا جۇزەگە اسىرىلدى. ولار تولىق ىسكە قوسىلعان جاعدايدا 1 095 جۇمىس ورنى قۇرىلاتىن بولادى. ماسەلەن، جاڭاوزەن قالاسىندا 2025 جىلعا دەيىن ىسكە قوسىلۋى ءتيىس قانت پەن نابات ونىمدەرىن شىعاراتىن «وردا وندىرىستىك بازاسى» جشس-ءى 50 ادامدى جاڭا جۇمىس ورنىمەن قامتىپ، جىلىنا 890 توننا جەرگىلىكتى ءونىم شىعارۋدى جوسپارلاپ وتىر.

ال، «ويماشا» جشس بولسا، تەحنيكالىق تۇز ءوندىرىسىن قولعا الماقشى. جوبا قۇنى 100 ميلليون تەڭگەنى قۇرايدى. جىلىنا 100 مىڭ توننا تەحنيكالىق تۇز شىعارۋ ارقىلى وڭىردە تولىقتاي يمپورتتى الماستىرا الادى. سونداي-اق، ەكسپورتقا شىعارۋ ۇلەسى ارتادى. 

ەكىنشى دەڭگەيلى بانكتەر مەن اگرو نەسيەلەۋ كورپوراتسياسى (انك) جالپى سوماسى 57 ميلليارد تەڭگەگە 38 جوبانى ماقۇلدادى. بانكتەر مەن انك قاراۋىندا سوماسى 1 230 ميلليون تەڭگەگە تاعى 7 جوبا بار.

-«قاراپايىم زاتتار ەكونوميكاسىنىڭ» نەگىزگى ماقساتى- مەملەكەتتىڭ قولداۋىمەن كاسىپكەرلىكتى دامىتۋ. مەملەكەتتىك ساتىپ الۋلاردا قازاقستاندىق ءونىمدى، جەرگىلىكتى شيكىزاتتى الۋعا مۇرىندىق بولۋ. سول ارقىلى وتاندىق كاسىپكەرلەردى باسەكەگە قابىلەتتى قىلىپ، نارىقتا جويىلىپ كەتپەۋىنە جاعداي جاساۋ. «قىزمەتتەر» سالاسىندا «ونىمدەر مەن تاۋارلار» ءتىزىمىن كەڭەيتۋ، اتاپ ايتقاندا، وبەكتىلەردى سالۋعا (قايتا جاڭارتۋعا) باعىتتالعان جوبالار شەڭبەرىندە نەگىزگى قۇرال-جابدىقتاردى ساتىپ الۋ سۇرالدى. ناتيجەسىندە دەنساۋلىق ساقتاۋ جانە ءبىلىم بەرۋ سالالارىندا 775 ميلليون تەڭگەگە 4 جوبا قابىلداندى، دەيدى مو كاسىپكەرلەر پالاتاسى ديرەكتورىنىڭ ورىنباسارى گۇلميرا قالمۇراتوۆا.

باسقوسۋ سوڭىندا مەملەكەتتىك مەكەمەلەرگە «قاراپايىم زاتتار ەكونوميكاسى» بويىنشا 2020 جىلى اتقارىلاتىن جۇمىستار ەسەبىن ناۋرىز ايىنىڭ 2-نە دەيىن وڭىرلىك كاسىپكەرلەر پالاتاسىنا تاپسىرۋعا تاپسىرما بەرىلدى.

 

 

ماڭعىستاۋ وبلىسى

سوڭعى جاڭالىقتار

ۇقساس جاڭالىقتار