ءوڭىردىڭ الەۋمەتتىك-ەكونوميكالىق دامۋىنىڭ قورىتىندىلارى تۋرالى وبلىس اكىمى حالىقپەن كەزدەسۋدەن ءبىر كۇن بۇرىن قوعامدىق كەڭەس وكىلدەرى الدىنداعى بايانداماسىندا ايتىپ بەرگەن-ءدى.
وبلىس باسشىسى اۋەلى الەۋمەتتىك جەلىلەردىڭ قوعامدىق ماسەلەلەردى انىقتاۋداعى ماڭىزىن اتاپ ءوتتى. قىزمەتىنە كىرىسكەن كۇننەن باستاپ وبلىس اكىمىنىڭ عالامتورداعى بارلىق جەلىدە جەكە پاراقشاسى بار. وسى كۇنگە دەيىن پاراقشاسىنا 5 مىڭنان استام حات-حابارلاما, ءوتىنىش تۇسكەن.
– تۇرعىندار جازعان ماسەلەلەرگە كوز سالعاندا, ءبىرىنشى كەزەكتە باسپانا ماسەلەسى وتكىر تۇرعانىن كورەمىز. وڭىردە 27 مىڭ ادام تۇرعىن ءۇي كەزەگىندە تۇر. ولاردىڭ قاتارىندا 10 مىڭ مەملەكەتتىك قىزمەتشى مەن بيۋدجەتتىك سالا وكىلدەرى, 7500 وتباسى بار. وبلىس اكىمدىگى تۇرعىن ءۇي كەزەگىن تەك جاڭا قۇرىلىس ستراتەگياسىن جاساۋ ارقىلى قىسقارتا الادى. ياعني باسپاناعا مۇقتاج تۇرعىندارعا, قۇرىلىس قاي جەردە تۇرعىزىلاتىنىنا, ينفراقۇرىلىم جەلىلەرىن جۇرگىزۋ ماسەلەلەرىنە باسا نازار اۋدارىلۋى ءتيىس, – دەدى ءا.سقاقوۆ.
وتكەن جىلى وڭىردە جالپى اۋماعى 332,5 مىڭ شارشى مەتردى قۇرايتىن تۇرعىن ءۇي پايدالانۋعا بەرىلدى. ناتيجەسىندە وبلىستا 10 تۇرعىن ءۇي سالىنىپ, 706 ادام پاتەرگە يە بولدى.
– 2020 جىلى بيۋدجەتتەن «نۇرلى جەر», «Nurly Ertis», «وڭىرلەردى دامىتۋ», «بجك-2020» جانە باسقا دا باعدارلامالار بويىنشا 140 نىساننىڭ قۇرىلىسى مەن قايتا قۇرۋعا 54,5 ملرد تەڭگە باعىتتالادى, – دەدى ءوڭىر باسشىسى. – تۇرعىن ۇيمەن قامتۋ ۇلەسى ءبىر تۇرعىنعا 22,9 شارشى مەتردى قۇرايدى. وسى جىلى كوپ پاتەرلى 38 تۇرعىن ءۇي سالىنادى.
سونداي-اق دارىگەرلەر مەن مۇعالىمدەردىڭ باسپانالى بولۋى ءۇشىن بيىل مەملەكەت تاراپىنان بەرىلەتىن تۇرعىن ءۇي سەرتيفيكاتى 3 ەسەگە كوبەيەدى.
«باقىتتى وتباسى» باعدارلاماسى ارقىلى ءتيىمدى تالاپتار نەگىزىندە وتكەن جىلى 253 وتباسى پاتەر العان, بيىل 500 مىڭ شارشى مەتر تۇرعىن ءۇي پايدالانۋعا بەرىلەدى. ەكىنشى ماسەلە, جىل سايىن قايتالاناتىن كوممۋنالدىق شارۋاشىلىق تۇيتكىلدەرى. ونىڭ كوپتىگى سونداي ءا.سقاقوۆتىڭ الەۋمەتتىك جەلىدەگى پاراقشالارىنا ساعاتىنا 120 ءوتىنىش تۇسەدى ەكەن. ولاردىڭ باسىم بولىگى – كوممۋنالدىق شارۋاشىلىق سالاسىنا, پاتەرلەرگە جىلۋدىڭ جەتپەيتىنىنە قاتىستى.
بيىل اتاۋلى الەۋمەتتىك كومەكتى تاعايىنداۋ جۇيەسى وزگەرگەنى بەلگىلى. جاڭا ەرەجەلەرگە سايكەس, شىن مانىندە مۇقتاج وتباسىلارعا قارجىلاي كومەك, بالالارعا ارنالعان الەۋمەتتىك پاكەت جانە كوپ بالالى وتباسىلارعا جاردەماقى بەرىلەدى. اۋدان مەن قالا اكىمدەرى الەۋمەتتىك كومەكتىڭ نە سەبەپتى وزگەرگەنىن جانە جاڭا فورماتقا ساي تالاپتاردى تۇرعىندارعا جان-جاقتى ءتۇسىندىرۋى ءتيىس. اكىمدەر الەۋمەتتىك جەلىلەر ارقىلى تۇرعىندارمەن بايلانىستا بولسا, وبلىستىق اكىمدىككە جازىلاتىن ارىز-شاعىمداردىڭ دەنى جەرگىلىكتى جەردە شەشىمىن تابار ەدى. ياعني بۇل اۋدان, قالا اكىمدەرى مەن تۇرعىندار اراسىنداعى ءالى دە ءوزارا بايلانىستىڭ جوعىن كورسەتەدى.
– ادامدار الەۋمەتتىك جەلىگە بۇكىل ارىز-شاعىمدارىن, وتىنىشتەرىن ءار اۋىلدان جازادى. Instagram وزگە ەلدەردە دەمالىس, باسقا دا جەرلەرگە بارعان جاڭالىقتارىمەن بولىسەتىن الاڭ بولسا, بىزدە Instagram كوممۋنالدىق شارۋاشىلىق ماماندارىنا ارىز جازاتىن جاشىككە اينالعانداي. ءتىپتى, ينتەرنەت قولدانۋشىلار ناقتى جۇمىس جۇرگىزە الماي وتىرعان كەيبىر اۋدان, قالا اكىمدەرىن ورىندارىنان الۋدى سۇرايدى, – دەيدى وبلىس اكىمى. وسى ورايدا وبلىستىق اكىمدىكتە «احۋالدىق-ساراپتامالىق ورتالىق» اشۋ قاجەت. ورتالىقتا تۇرعىنداردىڭ كوممۋنالدىق سالاعا قاتىستى ماسەلەلەرىن قارايتىن ماماندار قىزمەت كورسەتىپ, بىرىڭعاي تەلەفون ءنومىرى ىسكە قوسىلادى.
وبلىستا ەكولوگيالىق ماسەلەلەر جەتكىلىكتى. وسى ورايدا ستيحيالىق قوقىس ورىندارى تۋرالى ايتا كەتكەن ءجون. وتكەن جىلدىڭ قورىتىندىسى بويىنشا وبلىس اۋماعىندا 717 مىڭ توننا زياندى قالدىق شىعارىلعان. جالپىۇلتتىق سوتسيال-دەموكراتيالىق پارتياسى وبلىستىق فيليالىنىڭ توراعاسى اجار ساعىندىقوۆا اكىمدىك قىزمەتكەرلەرىنىڭ قوعام پىكىرىنە قۇلاق اسپاي, قورشاعان ورتاعا زيانىن تيگىزەتىن قۇرىلىس جۇمىستارىن باستايتىنىنا نارازى. بۇل ماسەلەنى «بەرەگينيا-بيو» قوعامدىق قورىنىڭ وكىلى تاتيانا پونومارەۆا دا قولدادى. اكىم الداعى ۋاقىتتا جاڭا قۇرىلىستار سالۋ ماسەلەسىندە قوعام بەلسەندىلەرىنىڭ پىكىرى دە نازارعا الىناتىنىن ايتتى.
ال «ەكوم» قوعامدىق بىرلەستىگىنىڭ توراعاسى سۆەتلانا موگيليۋكتىڭ ايتۋىنشا, شەتەلدىك ينۆەستورلار وڭىرگە سودا زاۋىتىن سالعىلارى كەلەتىنىن حابارلاپتى. جوبانىڭ قورشاعان ورتاعا زيانى كوپ. ءا.سقاقوۆ بۇل رەتتە ينۆەستورلاردى «تازا جوبالارعا» تارتۋعا شاقىراتىنىن جەتكىزدى.
پاۆلودار ءوڭىرى قاتەرلى ىسىككە شالدىققاندار سانى بويىنشا ەلىمىزدە الدىڭعى قاتاردا. وبلىس ورتالىعىندا سالىنعان ونكولوگيالىق ديسپانسەر ءالى ىسكە قوسىلعان جوق. تۇرعىندار جەرگىلىكتى دارىگەرلەردىڭ ونكولوگيالىق اۋرۋلاردى سوڭعى ساتىسىندا عانا انىقتايتىنىن ايتادى. ءوڭىر باسشىسى جاڭادان سالىنعان ونكولوگيالىق ديسپانسەردە زاماناۋي قوندىرعىلار ورناتىلعانىن, ونكولوگيالىق اۋرۋلاردى ەمدەۋگە جاعداي جاسالاتىنىن, سكرينينگتىك تەكسەرۋلەردى ءجيى جۇرگىزۋ كەرەگىن اتاپ ءوتتى.
جاس انا ءاسيا سابىر اۋتيزمگە شالدىققان بالاسىن ەمدەتۋ ءۇشىن نۇر-سۇلتان قالاسىنداعى «اسىل-ميراس» ورتالىعى فيليالىنىڭ اشىلۋىنا قولداۋ جاساۋىن وتىنسە, قالا تۇرعىنى اللا اكيموۆا ماۋسىم سايىن كوز اشتىرمايتىن شىبىن-شىركەيدەن قۇتىلۋ جولىن سۇرادى.
ەسەپتى كەزدەسۋدە كوڭىلگە قونعانى, بيىل 18 اۋىلعا رەسپۋبليكالىق بيۋدجەتتەن 3 ملرد 400 ملن تەڭگە قارجى بولىنبەك. باياناۋىل اۋدانىنىڭ تورايعىر اۋىلىنا ورتالىقتاندىرىلعان سۋ قۇبىرى جۇيەسىنىڭ قۇرىلىسىن جۇرگىزۋگە 300 ملن تەڭگە قاراجات ءبولىنىپ, جۇمىس باستالماق.
وبلىستىق كولىك قىزمەتكەرلەرى وداعىنىڭ باسشىسى ۆاسيلي رۋداكوۆ قالا سىرتىنداعى 6 اۋىلعا قاتىنايتىن اۆتوبۋستاردىڭ شىعىنى اقتالمايتىنىن, ونى سۋبسيديالاۋ تۋرالى سۇرادى.
– كوپشىلىكتىڭ كوكەيىندە جۇرگەن ماسەلەلەردى ءبىر كەزدەسۋ بارىسىندا تالقىلاپ, شەشۋ مۇمكىن ەمەس. بارلىق سۇراقتى قاراستىرىپ, تالداپ, ىسكە كىرىسەمىز. وسى وڭىردە تۋىپ-ءوستىم. ءوڭىر تۇرعىندارىنىڭ ءال-اۋقاتىن جاقسارتىپ, ەكونوميكالىق-الەۋمەتتىك سالالاردى دامىتۋ, وسى ۋاقىتقا دەيىن جەتكەن جەتىستىكتەردى ساقتاپ, وبلىسىمىزدى ودان ءارى وركەندەتۋ – مەنىڭ مىندەتىم. كۇش-جىگەرىمدى وسىعان جۇمسايتىن بولامىن, – دەدى وبلىس باسشىسى.
پاۆلودار وبلىسى
