جيىندى اشقان مەملەكەتتىك حاتشى ابايدىڭ 175 جىلدىعى مەن ءال-ءفارابيدىڭ 1150 جىلدىعىن مەرەكەلەۋدىڭ باستاپقى سالتاناتتى راسىمدەرى نۇر-سۇلتان مەن الماتى قالالارىندا باستالعانىنا نازار اۋداردى.
« ۇلى تۇلعالاردىڭ مەرەيتويلارى وتكەن ايدا سالتاناتتى جاعدايدا اشىلدى. اتاپ ايتساق, 21 قاڭتاردا نۇر-سۇلتان قالاسىنداعى «استانا وپەرا» تەاترىندا ابايدىڭ 175 جىلدىق مەرەيتويى وزىندىك مازمۇنىمەن, سونداي-اق 29 قاڭتاردا الماتى قالاسىنداعى ءال-فارابي اتىنداعى قازاق ۇلتتىق ۋنيۆەرسيتەتىندە وتكەن جيىندا ءال-ءفارابيدىڭ 1150 جىلدىق مەرەيتويىن تويلاۋ باستالدى», دەدى ق.كوشەرباەۆ.
مەملەكەتتىك حاتشى ۇلى ويشىلدار اباي مەن ءال-ءفارابيدىڭ ۇلاعاتتى مۇرالارىن زەردەلەي كەلە, ولاردىڭ ىزگىلىك يدەيالارىنىڭ تۇپكى نەگىزى ەلدىڭ بىرلىگى مەن ىنتىماعىمەن ۇندەسەتىنىنە تاعى دا كوز جەتكەنىنە توقتالدى.
كوميسسيا وتىرىسىندا مەملەكەت باسشىسى قاسىم-جومارت توقاەۆتىڭ حالىققا جولداۋى مەن «اباي جانە XXI عاسىرداعى قازاقستان» اتتى ماقالاسىندا جاڭا مىندەتتەرگە, سونىڭ ىشىندە مەرەيتويلىق ءىس-شارالار باعدارلارى ناقتى بەلگىلەنۋىنە ەرەكشە ەكپىن بەردى. مەملەكەتتىك كوميسسيا مۇشەلەرى مەن مەملەكەتتىك ورگاندار اباي مەن ءال-ءفارابيدىڭ رۋحاني مۇرالارىن ناسيحاتتاۋ بارىسىندا زيالى قاۋىم مەن وتانداستارىمىزدىڭ بۇقارالىق اقپارات قۇرالدارىندا كەڭىنەن جاريالانعان پىكىرلەرى مەن ۇسىنىستارىن ەسكەرۋى ءتيىس.
ء«بىزدىڭ ەندىگى ماقساتىمىز مەملەكەت باسشىسى قاسىم-جومارت توقاەۆتىڭ حالىققا جولداۋىندا اتاپ وتكەنىندەي, ءال-ءفارابيدىڭ 1150 جىلدىق, اباي قۇنانباي ۇلىنىڭ 175 جىلدىق مەرەيتويلارىن, عۇلاما تۇلعالارىمىزدىڭ ەڭبەكتەرىن حالىق اراسىندا ىسىراپشىلدىققا جول بەرمەي كەڭىنەن دارىپتەۋىمىز كەرەك. مەملەكەت باسشىسىنىڭ تاياۋدا جارىق كورگەن «اباي جانە XXI عاسىرداعى قازاقستان» اتتى ماقالاسىندا بەلگىلەنگەن كەلەلى مىندەتتەرگە وراي, مەملەكەتتىك كوميسسيا جۇمىسىنىڭ جاۋاپكەرشىلىگى ودان ءارى ارتا ءتۇستى دەپ ويلايمىن. اتالعان ماقالاعا ءباسپاسوز بەتىندە ءۇن قوسقان زيالى قاۋىم وكىلدەرى مەن وتانداستارىمىزدان اباي مۇراسىن ناسيحاتتاۋعا بايلانىستى كوپتەگەن ۇسىنىس كەلىپ ءتۇستى. جۇرتشىلىقتىڭ بۇل ۇسىنىسىن بارشا ورتالىق جانە جەرگىلىكتى اتقارۋشى ورگاندار جۇمىس بارىسىندا قاپەرگە الۋى ءتيىس», دەدى ق.كوشەرباەۆ.
جيىندا مەرەيتويدى وتكىزۋدىڭ جالپى رەسپۋبليكالىق جوسپارلارى وڭتايلاندىرىلىپ بەكىتىلگەنى, قازىرگى تاڭدا ونىڭ جۇزەگە اسىرىلىپ جاتقانى ايتىلدى. سونداي-اق ق.كوشەرباەۆ وتكەن اپتادا قورداي اۋدانىندا ورىن العان جاعدايعا بايلانىستى قايتىس بولعانداردىڭ وتباسىلارىنا جانە تۋعان-تۋىستارىنا كوڭىل ايتىپ, ەرەن تىرلىكتى, ەگەمەن بىرلىكتى, تاتۋلىقتى تۋ ەتكەن حالقىمىزدىڭ ىنتىماق-بىرلىگىنەن ايرىلماۋىن تىلەدى. وسى ورايدا, اباي مەن ءابۋ ناسىر ءال-ءفارابيدىڭ دە ۇرپاققا مۇرا ەتىپ قالدىرعان جاۋھار ويلارىنىڭ تۇپكى نەگىزى ەلدىڭ بىرلىگىن ساقتاۋعا ارنالعانىن ەسكە سالىپ ءوتتى.
«اباي «ادامزاتتىڭ ءبارىن ءسۇي, باۋىرىم دەپ» اماناتىن ايتسا, ءال-فارابي «ناعىز باقىتقا كەنەلتەتىن ءىس ادامداردى ءبىر-بىرىنە كومەكتەسۋ ءۇشىن بىرىكتىرەتىن قالا – قايىرىمدى قالا. ال باقىتقا جەتۋ جولىندا ءبىر-بىرىنە قول ۇشىن بەرەتىن قوعام – قايىرىمدى قوعام» دەپ وسيەتىن قالدىرعان», دەدى مەملەكەتتىك حاتشى.
وتىرىستا مادەنيەت جانە سپورت ءمينيسترى اقتوتى رايىمقۇلوۆانىڭ, ءبىلىم جانە عىلىم ءمينيسترى اسحات ايماعامبەتوۆتىڭ, سىرتقى ىستەر ءمينيسترى مۇحتار تىلەۋبەردىنىڭ, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆتىڭ, ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى عالىمقايىر مۇتانوۆتىڭ ەسەپتەرى تىڭدالدى.
جيىن سوڭىندا ورتالىق جانە جەرگىلىكتى اتقارۋشى ورگاندارعا مەرەيتويلىق ءىس-شارالاردى وتكىزۋدە ىسىراپشىلدىققا جول بەرمەۋ, ولاردى جوعارى يدەيالىق جانە ناقتى قۇندىلىقتارمەن قامتاماسىز ەتۋ جونىندە تاپسىرمالار بەرىلدى.
