جامبىل جاباەۆ تۋرالى كىتاپتى قازاقستاننىڭ تۇركياداعى ەلشىلىگى, كەچيورەن مۋنيتسيپاليتەتى جانە ەۋرازيا جازۋشىلار وداعى تۇرىكشەگە اۋدارعان ەدى.
جىر ءدۇلد ۇلى جامبىل ەسكە الىنعان القالى كەشكە قازاقستاننىڭ تۇركياداعى ەلشىسى ابزال ساپاربەك ۇلى, كەچيورەن مۋنيتسيپاليتەتى باسشىسى تۋرگۋت التىنوك, ەۋرازيا جازۋشىلار وداعى توراعاسى ياكۋب ومەروعلۋ, تۇركسوي باس حاتشىسىنىڭ ورىنباسارى بيلال چاكىدجى, ەكوەۋرازيا قاۋىمداستىعى توراعاسى حيكمەت ەرەن, دەپۋتاتتار, ديپلوماتيالىق ميسسيا وكىلدەرى, قازاقستاندىق جاستار مەن جەرگىلىكتى حالىق قاتىستى.
كەشتىڭ اشىلۋ سالتاناتىندا ءسوز سويلەگەن كەچيورەن مۋنيتسيپاليتەتى باسشىسى ت.التىنوك تاريحىمىزدىڭ تەرەڭ قويناۋىنان باستاۋ العان باۋىرلاستىعىمىز بارلىق سالالاردا دامىپ كەلە جاتقانىن تىلگە تيەك ەتىپ, تاۋەلسىزدىك جىلدارىنان باستاپ ەلباسى ن.نازارباەۆتىڭ ءتۇبى ءبىر تۇركى حالىقتارىنىڭ ىنتىماقتاستىعىنا قوسقان ۇلەسىن اتاپ ءوتتى. جامبىل جاباەۆتىڭ قازاق حالقىنىڭ مادەنيەتى مەن رۋحانياتىنىڭ ايرىلماس بولشەگى ەكەندىگىن باسا ايتقان ت.التىنوك ەكى ەل اراسىنداعى ىنتىماقتاستىقتىڭ ماڭىزىنا توقتالدى.
جىر الىبى تۋرالى كىتاپتىڭ تۇرىكشە اۋدارماسىنىڭ ۇيلەستىرۋشىسى يا. ومەروعلۋ جامبىل جاباەۆ شىعارماشىلىعىن زەرتتەۋگە مول ۇلەس قوسقان پروفەسسور مىرزاتاي جولداسبەكوۆ شىعارمالارىنىڭ تەرەڭدىگىنە توقتالا وتىرىپ, قازاق ادەبيەتى تۋرالى وي ءوربىتتى. اتاۋلى ەڭبەك ارقىلى تۇرىك وقىرماندارىنىڭ قازاق حالقىن جاڭا قىرىنان تانيتىندىعىنا نازار اۋدارعان جازۋشىلار وداعى توراعاسى كىتاپتىڭ جارىققا شىعۋىنا ۇلەس قوسقان بارشاعا العىسىن ءبىلدىردى.
كەش بارىسىندا انكارا حادجى بايرام ءۋالي ۋنيۆەرسيتەتىنىڭ وقىتۋشىسى دجەميلە كىنادجى جانە اۋدارماشى ۋفۋك تۋزمان قازاق ادەبيەتى, تۇركىتىلدەس حالىقتار مادەنيەتىنىڭ ۇقساستىقتارى جانە ادەبي شىعارمالاردى اۋدارۋ جۇمىستارى تۋرالى تالدامالىق بايانداما جاسادى.
سونداي-اق سالتاناتتى شارا سوڭىندا جۇزگە جەتكەنشە جۇرەگىنەن جىر ساۋلاعان ۇلتىمىزدىڭ ۇلى جىراۋى جامبىل جاباەۆتىڭ جىرلارى «وتاۋ» تۇركى الەمىنىڭ ءان مەن بي قوعامداستىعى كۇيشىسىنىڭ ورىنداۋىمەن كەشتى اسەم اۋەنمەن تەربەلەتتى.
