بولاشاقتا ەلىمىزدە مۇنداي كەلەڭسىز وقيعالاردى بولدىرماۋ ءۇشىن تەك قازاقستان حالقى اسسامبلەياسى عانا ەمەس, قوعام بولىپ جاستارىمىزعا تاربيە بەرۋ ءىسىن قولعا الۋىمىز قاجەت. جاستارعا تاربيە بەرۋ مەن ءتۇسىندىرۋ جۇمىستارى دۇرىس جۇرگىزىلگەندە مۇنداي بۇزاقىلىقتارعا جول بەرىلمەس ەدى. ءبىزدىڭ باستى مەملەكەتتىك قۇندىلىعىمىز – ۇلتتار اراسىنداعى بىرلىك پەن تاتۋلىق, اۋىزبىرشىلىك. سول سەبەپتى بەرەكە-بىرلىگىمىزدى بۇزاتىندار, مەملەكەتىمىزدىڭ مۇددەسىنە زيان كەلتىرەتىندەر زاڭ جۇزىندە جاۋاپقا تارتىلۋى ءتيىس دەپ ويلايمىن.
اۋعانستانداعى سوعىسقا قاتىسقان جاۋىنگەر-ينتەرناتسيوناليست رەتىندە ايتارىم, ونداي زۇلمات سوعىس بولماسىن, ەلىمىز تىنىش بولسىن دەيمىن. اۋعانستاندا مەن قىزمەت ەتكەن اسكەري بولىمشەدە كەڭەس وداعىنداعى بارلىق ۇلت وكىلدەرى بولدى. ۆزۆودتا 17 ادام 10 ۇلتتان ەدىك. ءبارىمىز ءبىر وتباسىنىڭ بالاسىنداي قىزمەت ەتتىك. وزدەرىڭىز بىلەتىندەي, 15 اقپان – ۇكىمەت قاۋلىسىمەن اۋعانستان دەموكراتيالىق رەسپۋبليكاسىنان كەڭەس اسكەرلەرىنىڭ شەكتەۋلى كونتينگەنتىنىڭ شىعارىلعان كۇنى – مەرەكە كۇنى دەپ بەلگىلەندى. وسى مەرەكە كۇنى جانە باسقا ۋاقىتتاردا دا اۋعان سوعىسىنىڭ ارداگەرلەرى مەكتەپتەردە, ارنايى ءبىلىم بەرەتىن وقۋ ورىندارىندا, جوو-دا پاتريوتتىق مازمۇندا ءىس-شارالار وتكىزەدى. مۇنداي ءىس-شارالار وسكەلەڭ ۇرپاقتىڭ بويىندا پاتريوتتىق سەزىم ۇيالاتىپ, رۋحاني جانە تاريحي قۇندىلىقتاردى قاستەرلەۋگە ۇيرەتەدى. جاستاردىڭ سوعىس جايىندا ارداگەرلەردىڭ ءوز اۋزىنان ەستۋى باسقاشا اسەر قالدىرادى. وسىنداي تاربيەلىك ءىس-شارالارعا كوپ ءمان بەرەتىن بولساق, جوعارىداعىداي كەلەڭسىز جاعدايلار ورىن الماس ەدى. بۇزاقىلىق ۇلت تاڭدامايدى. الەۋمەتتىك جەلىلەردە ءار ءتۇرلى پىكىرلەر ايتىلۋدا. ءبىز سابىرلىق تانىتۋىمىز كەرەك.
وزدەرىڭىزگە بەلگىلى, بيىل ەكىنشى دۇنيەج ۇلىك سوعىستاعى جەڭىسكە 75 جىل تولادى. اتا-بابالارىمىز ءار ءتۇرلى ۇلتتارمەن بىرگە ءجۇرىپ سوعىستى, جەرىمىزدى باسقىنشىلاردان ازات ەتتى. ەلىمىزدىڭ تىنىشتىعى ءۇشىن كۇرەستى. ال, اۋعان جەرىندە ازامات سوعىسى ءالى جالعاسۋدا. سوعىستى كىتاپتان وقىپ, كينودان كورىپ ەمەس, ءوز كوزىمەن كورگەن كۋاگەر رەتىندە ايتارىم, ەشقانداي جانجال, سوعىس بولماسىن, ەلىمىز امان, جۇرتىمىز تىنىش بولسىن.
قازىر ەلىمىز جىل وتكەن سايىن ەكونوميكالىق, الەۋمەتتىك, مادەني جاعىنان دامىپ كەلە جاتىر. مەملەكەت تاراپىنان حالىققا ارنالعان كوپتەگەن باعدارلامالار جۇزەگە اسىرىلۋدا. ەلىمىزدىڭ بولاشاعى, مەملەكەتتىلىگىمىزدىڭ نىعايۋى تۇراقتىلىق پەن بەيبىتشىلىككە بايلانىستى. سول سەبەپتى قوعام بولىپ, ەل بولىپ تىنىشتىقتى ساقتاۋعا ءتيىسپىز. ۇلتارالىق, دىنارالىق كەلىسىمدى نىعايتىپ, ورتاق ءۇيىمىز – قازاقستاندا بىرلىك پەن تاتۋلىقتا ءومىر ءسۇرۋىمىز قاجەت.
جانكەلدى ماحاشوۆ,
اۋعانستانداعى سوعىس ارداگەرلەرىنىڭ «اۋعانستان ارداگەرلەرى» رەسپۋبليكالىق قوعامدىق بىرلەستىگىنىڭ توراعاسى
