سەميناردا بايانداما جاساۋعا كەلگەن نازارباەۆ ۋنيۆەرسيتەتى مەن ءال-فارابي اتىنداعى قازاق ۇلتتىق ۋنيۆەرسيتەتىنىڭ زەرتتەۋشىلەرى, وزگە دە قوناقتار الدىمەن سەمەي مەديتسينا ۋنيۆەرسيتەتىنىڭ زاماناۋي ماتەريالدىق-تەحنيكالىق بازاسىمەن تانىستى. وقۋ ورنى بولاشاق دارىگەرلەردىڭ تاجىريبەدەن وتۋىنە جانە ماڭىزدى سالادا عىلىمي زەرتتەۋ جۇمىستارىن جۇرگىزۋىنە ساي سوڭعى تەحنولوگيامەن جابدىقتالعان. سونىڭ ىشىندە ماسكەۋدەن الدىرعان ادام اناتومياسىن 3D فورماتىندا كورۋگە, قاراۋعا, دەنەنىڭ كەز كەلگەن بولىگىن انىق باقىلاۋعا مۇمكىندىك بەرەتىن تسيفرلىق اپپارات 1-2-كۋرس ستۋدەنتتەرىنە كوپ كومەكتەسەتىن كورىنەدى. سونداي-اق بولاشاق دارىگەرلەر تاجىريبە جينايتىن ارنايى اۋرۋحانا دا بار.
سەمينارعا دەنساۋلىق ساقتاۋ ۆيتسە-ءمينيسترى ولجاس ءابىشوۆ, جاس عالىمدار, دوكتورانتتار مەن ماگيسترانتتار قاتىستى.
و.ءابىشوۆ عالىمداردىڭ باسىن بىرىكتىرىپ, ورتاق ماسەلەلەردى بىرگە تالقىلاپ, تاجىريبە الماسۋعا باعىتتالعان شارانىڭ ەلوردا مەن الماتىدا عانا ەمەس, وڭىردە ءوتۋىنىڭ ماڭىزى زور ەكەنىن جەتكىزدى.
- عىلىم جولىندا ناقتى ناتيجەگە جالعىز جەتۋ مۇمكىن ەمەس. سول سەبەپتى باستىسى - بىرىگۋ. ءار زەرتتەۋشىنىڭ مەديتسينا عىلىمىن دامىتۋعا ۇلەس قوسقانىنا مۇددەلىمىز, سوندىقتان ءبىز مينيسترلىك تاراپىنان كەز كەلگەن قولداۋعا دايىنبىز. بۇگىندە ستۋدەنتتەر مەن بولاشاق عالىمدارمەن تەكسەرىس پەن تاپسىرما تۇرىندە ەمەس, الەۋەتىن ارتتىرۋعا بارلىق جاعداي جاساۋ ارقىلى جاڭاشا قارىم-قاتىناستى قولعا الدىق. ماسەلەن, مەن الەۋمەتتىك جەلىدە ارنايى اشىلعان چاتتا ستۋدەنتتەردىڭ بارلىق پىكىرىن ءوزىم وقىپ وتىرامىن. عىلىم جولى اۋىر بولسا دا, بەرىلمەۋگە شاقىرامىن, - دەدى ول.
ال جاس عالىمدار اليانسىنىڭ ءتورايىمى ءاسيا ەرمۇحامبەتوۆا بىرلەستىكتىڭ قالاي قۇرىلعانى, نەگىزگى ماقساتى مەن اتقارىلعان جۇمىستارى جونىندە باياندادى. قازىرگى تاڭدا جاس عالىمداردىڭ الاڭىنا اينالعان اليانسقا ەلىمىزدەگى جانە شەتەلدەردەگى 200-دەن اسا عالىم, زەرتتەۋشىلەر, دوكتورانتتار مەن ماگيسترانتتار مۇشە.
23 جاسىندا دەنەدەگى تىرتىقتاردى جاسۋشالىق تەراپيا ارقىلى ەمدەيتىن Cellular therapeutics كومپانياسىنىڭ نەگىزىن قالاعان PhD بولات مۇحتار ۇلى ستۋدەنتتەرگە ءوز تاجىريبەسىمەن ءبولىستى. سونىمەن قاتار بولاشاق دارىگەرلەردى شىعىنى تولەنەتىن تاجىريبەدەن وتۋگە شاقىردى.
قازاقستاندا عىلىمي تۇرعىدا زەرتتەلمەي كەلگەن مەديتسينانىق ماسەلەنىڭ ءبىرى - قانت ديابەتى توڭىرەگىندە نيۋ يورك ۋنيۆەرسيتەتىنىڭ ماگيستراتۋراسىندا ءبىلىم الىپ, بريتاندىق كولۋمبيا ۋنيۆەرسيتەتىندە ءىس-تاجىريبەدەن ءوتىپ كەلگەن PhD دوكتورانت باقىتجان الجان ۇلى ينسۋلين سينتەزدەيدىن جاسۋشالاردى الۋدىڭ جاڭا ءتۇرىن تانىستىردى. ادام باعانالى جاسۋشالارىنىڭ دنق-سىن الەمدە كەڭ تاراعان Crispr ادىسىمەن وزگەرتىپ, جاڭا جاسۋشالار الىنادى. بۇل جاسۋشالار ينسۋلين بولەدى.
قورشاعان ورتانىڭ جاي-كۇيىنە مونيتورينگ جۇرگىزۋدىڭ ءتيىمدى جولىن, ازىرلەمەسىن زەرتتەگەن ءال-فارابي اتىنداعى قازاق ۇلتتىق ۋنيۆەرسيتەتىنىڭ پوستدوكتورانتى ناسيبا بايماتوۆا الماتى, تالدىقورعان, ۆەتنامداعى حوشيمەن قالالارىنىڭ اۋا قۇرامىنداعى ۇشقىش ورگانيكالىق قوسىلىستار (VOCs) مولشەرىن انىقتاۋمەن اينالىسادى. ۇشقىش ورگانيكالىق قوسىلىستار قۇرامىنا كىرەتىن بەنزول قاتەرلى ىسىككە شالدىقتىرادى. ن.بايماتوۆا زەرتتەگەن جۇمىستىڭ ناتيجەسىندە الماتىداعى بەنزولدىڭ ورتاشا مولشەرى - 64 مكگ/م3. بۇل الەمدەگى ەڭ لاس قالالاردىڭ ءبىرى سانالاتىن جاڭا دەليدە 87 مكگ/م3 كورسەتكەن. اۆتور ءوزىنىڭ ازىرلەگەن, سونداي-اق, قازىرگى تاڭدا ستۋدەنتتەرىمەن بىرگە ءارى قاراي جالعاستىرىپ, جەتىلدىرىپ جاتقان ادىستەمەسىن مۇددەلى مەكەمەلەرگە بەرۋگە دايىن.
سەمەي
