ولار وسىنشا بۇزۋشىلىقتاردى تىركەمەگەن بولسا جۇرگىزۋشىلەر بۇرىنعىداي جۇگەن-قۇرىقسىز جوسي بەرگەن بولار ەدى. كەيبىر جۇرگىزۋشىلەر جول بەلگىلەرى مەن تاڭبالارىن اياق استى ەتىپ, ەلەمەيدى. سونىڭ كوبى جول پوليتسياسى قاتارىندا تانىستارى بار نەمەسە قالتالارىندا سالماقتى قىزمەتتىك كۋالىكتەرى بار جۇرگىزۋشىلەر. بۇرىن وندايلارعا ء«اي دەر اجە, قوي دەر قوجا بولمايتىن». ال اۆتوماتتاندىرىلعان باقىلاۋشىلار سەنىڭ كىم ەكەنىڭە, بەدەلىڭ مەن مانسابىڭا قارامايدى. سارت ەتكىزىپ بۇزۋشىلار اراسىنا تىركەي قويادى, سوسىن بۇل تىزىمنەن قانشا مىقتى بولساڭ دا ايىپپۇلسىز بوسانا المايسىڭ.
پەتروپاۆلدا ءبىر ايدىڭ ىشىندە عانا تەحنيكالىق قۇرىلعىلاردىڭ نازارىنا بىرنەشە رەت ىلىنگەن جۇرگىزۋشىلەر بار. كوشە قيىلىستارىنان وتكەندە ەرەجە بۇزعان نۇر-سۇلتان قالاسىنىڭ 42 جاستاعى تۇرعىنى بىردەن ءۇش بۇزۋشىلىق ءۇشىن ايىپپۇل تولەۋگە ءماجبۇر بولدى. ول اباي مەن نازارباەۆ كوشەلەرىنىڭ قيىلىسىندا ءبىر كۇندەگى 10 مينۋت ارالىعىندا ەكى رەت جول ەرەجەسىن بۇزعان.
رەسەيلىك ەسەپتە تۇرعان كولىكتى مىنگەن باسقا جۇرگىزۋشى دە ءدال وسى قيىلىستا ەكى رەت زاڭ بۇزۋشىلىققا جول بەرگەن. ايتا كەتۋ كەرەك, بۇرىن مۇندايلار ءتىپتى قۇتىرىپ كەتكەن. ويتكەنى, رەسەيدىڭ ەسەبىندە تۇرعان كولىكتەردى ءبىزدىڭ اۆتوماتتى باقىلاۋشى تىركەي المايتىن. قازىر «اقىلدى» كامەرالار بارلىق شەتەلدىك ەسەپتە تۇرعان كولىكتەر جاسايتىن بۇزۋشىلىقتاردى تىركەي باستادى. وسىندايلار ءبىر ايدىڭ ىشىندە ينتەللەكتۋالدىق كوشە قيىلىستارىندا 74 بۇزۋشىلىققا جول بەرگەن.
پوليتسەيلەر ايتىپ وتكەندەي, توقتاۋ سىزىعىنان ءوتىپ كەتۋ ءۇشىن اكىمشىلىك كودەكستىڭ 601-بابىمەن جاۋاپكەرشىلىك قاراستىرىلعان. «جول بەلگىلەرىمەن جانە جول تاڭبالارىمەن بەلگىلەنگەن تالاپتاردى ساقتاماۋ ءۇشىن 3 اەك كولەمىندە ايىپپۇل كوزدەلەدى. ال, وسى بۇزۋشىلىق ءبىر جىل ىشىندە قايتالاپ جاسالعان جاعدايدا جۇرگىزۋشى 10 اەك كولەمىندە ايىپپۇل تولەيدى. سونداي-اق حابارلاما العان ساتتەن باستاپ 7 كۇن ىشىندە ايىپپۇلدىڭ 50 پايىزىن تولەۋگە بولاتىنىن ەستەرىڭىزگە سالامىز», - دەيدى سقو پد اكىمشىلىك پوليتسيا باسقارماسىنىڭ باستىعى, پوليتسيا پودپولكوۆنيگى جاسۇلان وسپانوۆ.
قىزىلجار
