اباي • 29 قاڭتار، 2020

اقىن تويى تۋعان توپىراعىندا جالعاستى

71 رەتكورسەتىلدى

بيىلعى جىلدىڭ باستى مەرەيتويلارىنىڭ ءبىرى – اباي قۇنانباي ۇلىنىڭ 175 جىلدىعى 21 قاڭتاردا ەلباسى نۇرسۇلتان نازارباەۆ پەن مەملەكەت باسشىسى قاسىم-جومارت توقاەۆتىڭ قاتىسۋىمەن ارقا تورىندە سالتاناتتى تۇردە باستالعان ەدى. الاشتىڭ استاناسىنان باستاۋ العان مەرەيتويلىق شارالار ەستافەتاسىن 22 قاڭتاردا اقىننىڭ تۋعان توپىراعى شىعىس قازاقستان وبلىسى بىردەن ءىلىپ اكەتىپ، ءوڭىردىڭ قالالارى مەن اۋدان­دارىندا بىرقاتار تاعىلىمدى شارالار ۇيىمداستىرىلدى.

ۇلى اقىننىڭ مەرەيلى مەرەيتويى­نا ارنالعان شارا­لار لەگى وبلىس ور­تالىعى – وسكەمەن قالاسىندا دا جال­عاستى. شاھارداعى زيالى قاۋىم وكىل­دەرى، اقساقالدار، جاستار، قا­لانىڭ قا­راپايىم تۇرعىندارى رەسپۋبليكا الاڭىنداعى حاكىم ەسكەرتكىشىنە گۇل شوقتارىن قو­يىپ، اقىن رۋحىنا تاعزىم ەتتى. مىڭعا جۋىق ادام جينال­عان سالتاناتتى شارا وسكەمەن قالالىق ىشكى ساياسات، مادەنيەت جانە تىلدەردى دامىتۋ ءبولىمىنىڭ باسشىسى قالقامان ءساريننىڭ قۇتتىقتاۋ سوزىمەن اشىلدى. «ارقا تورىنەن باستاۋ العان اقىن تويى بۇگىن مىنە، التايدا، اباي ەلىندە جالعاسىپ جاتىر. وبلىس اكىمى دانيال كەنجەتاي ۇلى اتاپ وتكەندەي،  بيىل وڭىرىمىزدە اباي تويىنا ارنالعان 500-دەن استام ءىس-شارا وتەدى. وسكەمەن قالاسى اكىمدىگىنىڭ دە ءوز جوسپارلارى بار. قالا كولەمىندە 100-گە جۋىق ءىرىلى-ۇساقتى مادەني ءىس-شارا اباي اتامىزدىڭ 175 جىلدىق مەرەيتويىنا ارنالادى. سوندىقتان ءبىز ۇلى اقىننىڭ جەرلەستەرى رەتىندە موينىمىزداعى جاۋاپكەرشىلىكتى جاقسى سەزىنۋىمىز كەرەك»، دەدى ول.

بۇدان كەيىن وسكەمەندەگى س.امان­جولوۆ اتىنداعى شىعىس قازاقستان مەملەكەتتىك ۋني­ۆەرسيتەتى رەكتورىنىڭ كە­ڭەس­شىسى، پروفەسسور سىلام­بەك ورا­زالين ءسوز الىپ، جۇر­ت­شى­لىقتى مەرەيتويمەن قۇتتىقتاپ، ابايدىڭ «ەسىڭدە بار ما جاس كۇنىڭ» ولەڭىن مانەرلەپ وقىپ بەردى. سونىمەن قاتار ا.پۋشكين اتىنداعى وب­لىس­تىق كىتاپحانادا فيلولوگيا عىلىمدارىنىڭ كانديداتى ليۋتسيا ابدۋللينانىڭ «زا­ما­ناۋي وقۋداعى اباي» اتتى ين­تە­راكتيۆتى، اۆ­تور­لىق ءدارىس-اڭ­گىمەسى مەن جۋرناليست، ابايتانۋشى، سوزجۇمباق قۇراستىرۋشى قاليبەك التىباەۆتىڭ جەتەك­شى­­ل­ىگىمەن «مەن ءبىر جۇمباق ادام­مىن...» سوزجۇم­باق سايىسى وتكىزىلىپ، شاراعا كەلۋشىلەر اباي شىعارماشىلىعى بويىن­شا لاتىن الىپبيىندە ديكتانت جازدى. ال ورالحان بوكەي اتىنداعى قالالىق كىتاپحانادا ابايتانۋ­شى عالىمدار، زيالى قاۋىم وكىل­د­ەرى باس قوسىپ، اۋەلى 1954 جىلى تۇسىرىلگەن «اباي» تۇڭعىش دەرەك­تى ءفيلمىن تاماشالاپ، پرەزيدەنت قاسىم-جومارت توقاەۆتىڭ «اباي جانە XXI عاسىرداعى قازاقستان» ماقالاسىن جان-جاقتى تالقىلاپ، ويلارىن ورتاعا سالدى.

الاشتىڭ رۋحاني استاناسى اتانعان سەمەي قالاسىندا اباي تويىنىڭ باستالۋىنا وراي ەلىمىزگە ەسىمدەرى كەڭىنەن تانىمال ونەرپازداردىڭ قاتىسۋىمەن ۇلكەن كونتسەرت ءوتتى. مادەني شا­راعا وبلىس اكىمىنىڭ ورىنباسارى الىشەر مارحابات قاتىسىپ، الەمدىك دەڭگەي­دەگى وي الىبىنىڭ مەرەيتويىن جو­عارى دەڭگەيدە وت­كىزۋ اقىننىڭ جەر­لەستەرى ءۇشىن ۇلكەن جاۋاپكەرشىلىك جۇك­تەي­تىندىگىن اتاپ ءوتتى.

كونتسەرتتە ەرلان رىسقالي، گۇلميرا سارينا، ءادىل تۇر­عانباەۆ، بەرىك وماروۆ سىندى ءداستۇرلى انشىلەرمەن قاتار «استانا وپەرا» تەاترىنىڭ مەدەت شو­­تاباەۆ، جۇپار عاب­دۋللينا سەكىلدى ونەر­پازدارى وبلىس اكىمىنىڭ سيم­فو­نيالىق وركەسترى، سەمەي قالا­سىن­داعى ءا.قاشاۋباەۆ اتىنداعى فيلار­مونيا­سىنىڭ بيبىگۇل اتىنداعى قازاق ۇلت اسپاپتار وركەسترىنىڭ سۇيەمەل­دەۋىمەن اباي اندەرىن اۋەلەتە شىرقادى.

 

شىعىس قازاقستان وبلىسى

 

سوڭعى جاڭالىقتار

ۇقساس جاڭالىقتار