الەم • 23 قاڭتار، 2020

SCIJ كلۋبىنىڭ 67-ءشى وتىرىسى ءوتىپ جاتىر

16 رەتكورسەتىلدى

20-25 قاڭتار ارالىعىندا سوچيدەگى «روزا حۋتور» كۋرورتىندا الەمنىڭ 27 مەملەكەتىنەن كەلگەن 130 جۋرناليست-شاڭعىشىنىڭ قاتىسۋىمەن SCIJ (Ski Club International des Journalistes) كلۋبىنىڭ 67-ءشى وتىرىسى ءوتىپ جاتىر. بۇل تۋرالى مادەنيەت جانە سپورت مينيسترلىگىنىڭ ءباسپاسوز قىزمەتى حابارلادى.

بيىلعى كەزدەسۋدى قازاقستان مەن رەسەيدەگى SCIJ كلۋبىنىڭ فيليالى ۇيىمداستىرىپ وتىر. كلۋب مۇشەلەرى وسى ارالىقتا جۋرناليستيكا سالاسىنداعى وزەكتى تاقىرىپتارعا ارنالعان دوڭگەلەك ۇستەلدەر، ىسكەرلىك كەزدەسۋلەر وتكىزىپ، ءوز ەلىنىڭ مادەني جانە تۋريستىك الەۋەتىمەن تانىستىرادى. سونىمەن قاتار تاۋ شاڭعىسى جانە شاڭعىمەن جارىسۋدان باسەكەلەر وتەدى.

باسقوسۋدا قازاقستاننىڭ تۋريزم سالاسىنداعى اتقارىپ جاتقان جۇمىستارىمەن وسى ءىس-شارانىڭ سەرىكتەسى Kazakh Tourism ۇلتتىق كومپانياسى تانىستىردى.

ايتا كەتەيىك، SCIJ جۋرناليست-شاڭعىشىلار كلۋبى 1955 جىلى فرانتسيانىڭ مەريبەل تاۋ-شاڭعى بازاسىندا قۇرىلعان. سول جىلدان بەرى ءداستۇرلى جيىن ەۋروپا، سولتۇستىك جانە وڭتۇستىك امەريكانىڭ 70-كە جۋىق شاڭعى بازاسىندا وتكەن. قازىر قۇرامىنا 32 ەلدىڭ 2000-عا جۋىق باق وكىلى كىرەدى. قازاقستان اتالعان كلۋبقا 2012 جىلى قوسىلىپ، وسى ۋاقىتا دەيىن ۇيىم جۇمىسىنا بەلسەندى اتسالىسىپ كەلەدى.

-«بۇگىنگى تاڭدا ءبىزدىڭ ەلىمىز تۋريزم يندۋسترياسىن دامىتۋعا ەرەكشە كوڭىل ءبولىپ وتىر. قازىر ىشكى ءتۋريزمدى جانداندىرۋعا باعىتتالعان جوبالار جۇزەگە اسىرىلىپ جاتىر. الداعى ۋاقىتتا الەمنىڭ تۇكپىر-تۇكپىرىنەن كەلەتىن تۋريستەر سانىن ارتتىرعىمىز كەلەدى. بۇل باعىتتاعى ماقساتىمىز قازاقستاندى ورتالىق ازياداعى تۋريستىك الەۋەتى جوعارى مەملەكەتكە اينالدىرۋ» دەدى SCIJ كلۋبى جينالىسىندا ءسوز سويلەگەن Kazakh Tourism ۇلتتىق كومپانياسى ماركەتينگ، كوممۋنيكاتسيالار جانە تسيفرلاندىرۋ دەپارتامەنتىنىڭ باسشىسى تالعات امانباەۆ. سونداي-اق ول 2021 جىلى SCIJ كلۋبىنىڭ كەزەكتى وتىرىسىن «شىمبۇلاق» شاڭعى كۋرورتى وتكىزۋگە دايىن ەكەنىن جەتكىزدى.

جىل سايىن وتكىزىلەتىن بۇل ءىس-شارا تاۋ شىڭعىسى مەن شاڭعىمەن جارىسۋدان جۋرناليستەر اراسىنداعى بەيرەسمي الەم چەمپيوناتى سانالادى.

سوڭعى جاڭالىقتار

ۇقساس جاڭالىقتار