جاڭا وزگەرىستەر ەنگىزىلگەن ۋاقىتتان كەيىن ءبىر-اق اپتا وتكەندە پەتروپاۆل قالاسىنىڭ ەكى تۇرعىنى ءبىر تۇندە ۇستالدى. شەتەلدىك كولىكتىڭ جۇرگىزۋشىسى ءبىر فاراسى جانباي كەلە جاتقاندىقتان اباي كوشەسىندە پاترۋلدىك پوليتسيا قىزمەتكەرلەرىنىڭ نازارىنا ىلىنەدى. پوليتسەيلەر جۇرگىزۋشىگە اقاۋدى جويۋ قاجەت ەكەنىن ايتۋ ءۇشىن كولىكتى توقتاتادى. سويتسە, 32 جاستاعى قالا تۇرعىنى كولىكتى ماساڭ كۇيدە جۇرگىزىپ كەلە جاتقان بولىپ شىقتى. ال 1986 جىلى تۋعان باسقا جۇرگىزۋشى سول ءتۇنى ينتەرناتسيونال كوشەسىمەن الكوگولدى ىشىمدىك ءىشىپ الىپ, جۇيتكىگەن. ەكى كولىك تە ايىپ تۇراعىنا قويىلدى. تۇنگى سەرۋەنگە قۇمارتقاندار سوتتىڭ شەشىمىمەن 15 تاۋلىككە اكىمشىلىك قاماققا الىندى جانە 7 جىلعا كولىك باسقارۋ قۇقىقتارىنان ايرىلدى.
ەگەر وسىلار ءبىر جىل ىشىندە قايتادان ماساڭ كۇيىندە كولىك تىزگىنىنە وتىرسا, 20 تاۋلىككە قاماققا الىنادى جانە 8 جىلعا كولىك باسقارۋ قۇقىعىنان ايرىلادى. ال جول-كولىك وقيعاسىنا كىنالى ماس جۇرگىزۋشىلەر ءۇشىن بولەك جاۋاپكەرشىلىك قاراستىرىلعان. «ماساڭدىق دەڭگەيىن انىقتاۋ بويىنشا كۋالاندىرۋدان ءوتۋ تۋرالى زاڭدى تالاپتى ورىنداۋدان باس تارتقان جاعدايدا جۇرگىزۋشىنىڭ كولىك قۇرالىن باسقارۋ قۇقىعىنان ايىرىلۋ مەرزىمى 3 جىلدان 8 جىلعا دەيىن كوبەيدى, سونداي-اق 15 تاۋلىككە قاماققا الۋ ەنگىزىلدى», - دەيدى سقو پد اكىمشىلىك پوليتسيا باسقارماسىنىڭ باستىعى پوليتسيا پودپولكوۆنيگى جاسۇلان وسپانوۆ.
