ايماقتار • 20 قاڭتار، 2020

تۇركىستان وبلىسىندا اپپارات جينالىسى ءوتتى

304 رەتكورسەتىلدى

تۇركىستان وبلىسى اكىمى ومىرزاق شوكەەۆتىڭ تاپسىرماسىنا سايكەس جاڭا باعدارلاما پايدا بولدى. بۇل تۋرالى وبلىس اكىمدىگىنىڭ ءباسپاسوز قىزمەتى حابارلادى.

«قامقورلىق» ايماقتىق باعدارلاماسى وڭىردە ءومىر ءسۇرىپ جاتقان كومەككە اسا مۇقتاج جاندارعا دەمەۋ بولماق. بۇل شارا مەملەكەت تاراپىنان بەرىلەتىن جاردەماقى مەن كومەكتەن بولەك جۇزەگە اسادى. تۇرمىس تاۋقىمەتىن تارتقان مۇنداي وتباسىلارعا جان-جاقتى قامقورلىق كورسەتۋ ارقىلى، كەدەيلىكتىڭ شەڭبەرىنەن شىعۋعا مۇمكىندىك بەرەدى. ولارمەن اۋدان، اۋىل اكىمدەرى تىكەلەي جۇمىس جۇزگىزەتىن بولادى.

جوقشىلىقتا ءومىر ءسۇرىپ جاتقان جاندارعا جەرگىلىكتى قازىنادان ەلىمىزدە بەكىتىلگەن ەڭ تومەنگى كۇنكورىس دەڭگەيىنىڭ مولشەرىندەگى قاراجات ءبولىنىپ، وتباسىنىڭ ەڭبەككە قاۋقارى بار مۇشەلەرى جۇمىسقا تارتىلادى. ولاردى انىقتاۋ ءۇشىن ارنايى كوميسسيا قۇرىلماق. ونىڭ قۇرامىنا اۋىل اقساقالدارى مەن جەرگىلىكتى بەلسەندىلەر دە قوسىلادى. اتالعان شاراعا دەمەۋشىلەر دە اتسالىسادى. جيىندا وبلىس باسشىسى كومەككە اسا ءزارۋ جانداردىڭ اياقتان تۇرۋىن باقىلاۋدا ۇستاپ، ونداي وتباسىلاردى جەكە ارالايتىنىن قاداپ ايتتى.

ءماجىلىس بارىسىندا «پەداگوگ مارتەبەسى تۋرالى» زاڭ جوباسى جايلى ايتىلىپ، وبلىستىڭ ءبىلىم سالاسىنداعى بىرقاتار ماسەلەلەر تالقىلاندى. وڭىردە دارىندى بالالارعا ارنالعان 8 اۋداندا مەكتەپ اشۋ ماسەلەسى شەشىلۋدە. بەس كوللەدج «جاس مامان» جوباسىنا ەنىپ، ولاردى نەگىزگى قۇرال-جابدىقتارمەن قامتاماسىز ەتۋگە رەسپۋبليكالىق بيۋدجەت ەسەبىنەن 1،6 ملرد تەڭگە قارجى بولىنگەن. 3 كوللەدج سەنىمگەرلىك باسقارۋعا بەرىلۋدە. مەكتەپ وقۋشىلارىنىڭ سانى جىل سايىن 20 مىڭعا ارتادى. وسىعان وراي بىرقاتار اۋدانداردا جاڭا ءبىلىم ۇياسىن سالۋ ماسەلەسى وزەكتى. كومپيۋتەرمەن قامتاماسىز ەتۋ جاعى دا شەشۋدى تالاپ ەتەدى. سونداي-اق، مەكتەپتەردە قوسىمشا ءبىلىم بەرۋ ماقساتىندا سپورت ۇيىرمەلەرى مەن وقۋشىلار سارايلارى اشىلادى. ايماق باسشىسى بارلىق اۋدان اكىمدەرىنە ءبىلىم سالاسىنا كوڭىل ءبولىپ، ماڭىزدى ماسەلەلەردى شەشۋدى تاپسىردى.

سوڭعى جاڭالىقتار

ۇقساس جاڭالىقتار