ايماقتار • 26 جەلتوقسان، 2019

تىرلىگى بەرەكەلى ءوڭىر – تۇركىستان وبلىسىندا تۇرعىن ءۇي قۇرىلىسى 30 پايىزعا ءوستى

29 رەت كورسەتىلدى

جىل سوڭى ەسەپ-قيساپپەن، ياعني ون ەكى اي بويعى ەڭبەك قورىتىندىلانىپ، الداعى ۋاقىتقا جاڭا جوسپارلار جاسالۋىمەن ەرەكشەلەنەتىنى ءمالىم. بۇل ورايدا تۇركىستان وبلىسىندا اۋىز تولتىرا ايتارلىق جۇمىستار اتقارىلىپ، جىل وڭ وزگەرىستەرگە تولى بولدى. جۋىردا پرەزيدەنت قاسىم-جومارت توقاەۆتىڭ قابىلداۋىندا بولىپ، اتقا­رىل­عان جۇمىستاردىڭ قورىتىندىسىن بايانداعان تۇركىستان وبلىسىنىڭ اكىمى ومىرزاق شوكەەۆ ايماقتا ءوندىرىس سالاسى 5،5 پايىزعا، اۋىل شارۋاشىلىعى مەن ينۆەستيتسيا 25 پايىزعا، تۇرعىن ءۇي قۇرىلىسى 30 پايىزعا وسكەنىن اتاپ ءوتتى. ال كەلەسى 2020 جىلدىڭ قازان ايىنا تۇركىستان قالاسىنىڭ رەسمي تانىستىرىلىم ءراسىمى جوس­پار­لانىپ وتىر.

يندۋستريالىق ايماعى كوپ ءوڭىر

جالپى بيىلعى ون ءبىر ايدا وبلىستا 450،3 ملرد تەڭگەگە ونەركاسىپ ءونىمى ءوندىرىلىپ، ناقتى كولەم يندەكسى وتكەن جىلدىڭ سايكەس كەزەڭىندە 105،5 % بولعان. ال وندىرىلگەن ونەركاسىپ ءونىم كولەمىنىڭ 43،8% ۇلەسىن قۇرايتىن تاۋ-كەن ءوندىرۋ سالاسىندا وندىرىلگەن ءونىمى كولەمى 197،4 ملرد تەڭگەنى قۇرادى. سونداي-اق وڭدەۋ ونەركاسىبى (ۇلەسى 49،2%) ءونىمىنىڭ ناقتى كولەم يندەكسى – 102،2% نەمەسە ءونىم كولەمى 221،6 ملرد تەڭگە بولىپ وتىر. وبلىس ەكونوميكاسىن دامىتۋعا 331،5 ملرد تەڭگە ينۆەستيتسيا باعىتتالعان نەمەسە 2018 جىلدىڭ ءتيىستى كەزەڭىنەن 25،1%-عا ارتقان. كاسىپكەرلىك ەلىمىزدىڭ الەۋمەتتىك-ەكونوميكالىق جانە ساياسي ومىرىندە ماڭىزدى ءرول اتقاراتىنى ءمالىم. بۇل ورايدا وڭىردە جۇمىس ىستەپ تۇرعان شاعىن جانە ورتا كاسىپكەرلىك سۋبەكتىلەرىنىڭ سانى 2019 جىلعى 1 جەلتوقسانعا 141،5 مىڭ بىرلىكتى نەمەسە 2018 جىلدىڭ ءتيىستى كەزەڭىمەن سالىستىرعاندا 113،4%-دى قۇرادى. ەڭ الدىمەن، اۋىل تۇرعىندارىن تۇراقتى جۇمىسپەن قامتىپ، سا­لىق بازاسىن قۇراي، جەرگىلىكتى بيۋدجەتتى نىعاي­تاتىن كاسىپكەرلىكتى دامىتۋ ساناعا سىڭگەن پاتەر­ناليستىك پيعىل مەن ماسىلدىقتان ارىلۋعا مۇمكىندىك بەرەدى. شاعىن جانە ورتا بيزنەستىڭ دامۋىندا وڭىردە جۇمىس ىستەپ كەلە جاتقان يندۋستريالىق ايماقتاردىڭ اتقارار ءرولى ەرەكشە. ايتا كەتەلىك، ەلىمىزدەگى يندۋستريالىق ايماعى كوپ ءوڭىردىڭ ءبىرى – تۇركىستان وبلىسى. «Turkistan» يندۋستريالىق ايماقتاردى باسقارۋشى كومپانياسى» سەرىكتەستىگى مالىمەت­تەرى بويىنشا بۇگىندە تۇركىستان وبلىسىندا 9 يندۋستريالىق ايماق بار. وڭىردەگى اۋدان، قالالاردى قوسقاندا جالپى اۋماعى 445 گەكتاردى قۇرايدى. ودان بولەك 310 گەكتارعا جۋىق جەر رەزەرۆتە تۇر. قازىرگى تاڭدا اۋماعى 273 گەكتار بولاتىن تۇركىستان، كەنتاۋ قالالارى مەن سوزاق، شاردارا، تۇلكىباس، قازىعۇرت جانە ماقتاارال اۋداندارىنداعى 7 يندۋستريالىق ايماقتىڭ ينفراقۇرىلىمى جاسالعان. بۇدان بولەك اۋماعى 172 گەكتاردى الىپ جاتقان بايدىبەك جانە ورداباسى اۋدانىنداعى «بادام» يندۋستريالىق ايماعىندا ينفراقۇرىلىم جۇرگىزىلىپ جاتىر.

وڭىردەگى يندۋستريالىق ايماقتاردا 40،9 ملرد تەڭگە بولاتىن 58 جوبا جۇزەگە اسادى دەپ جوس­پارلانعان. وندا 3600-دەن استام ادام جۇ­مىسپەن قامتىلماق. ايتا كەتەلىك، 2019 جىلدىڭ ءىىى توقسانىندا ەكونوميكالىق تۇرعىدان بەلسەندى حالىق سانى 796،9 مىڭ ادام بولسا، جۇمىسسىزدار سانى – 40،4 مىڭ، جالپى جۇمىسسىزدىق دەڭگەيى 5،1%-دى قۇرادى. يندۋستريالىق ايماقتارداعى 58 جوبانىڭ 27-ءسى تولىق ىسكە اسقان. ءوندىرىس ورىندارىندا 1362 ادام جۇمىسپەن قامتىلىپتى. جالپى بارلىق يندۋستريالىق ايماقتىڭ ينجەنەرلىك ينفرا­قۇ­رىلىمىنا قازىنادان 7،2 ملرد تەڭگە قاراستىرىلعان. تاراتىپ ايتار بولساق، 2013 جىلى قۇرىلعان «تۇركىستان» يندۋستريالىق ايماعى العاشىندا 40 گەكتار بولسا، قالا اكىمىنىڭ شەشىمىمەن تاعى دا 310 گەكتارعا ۇلعايدى. مۇندا 20 جوبا جۇزەگە اسىپ، 1091 ادام جۇمىسپەن قامتىلعان. ونىڭ قاتارىندا لامينات وندىرەتىن «GrandMiks» جك، شىنىجەلىم ارماتۋرا مەن تەمىر-بەتون شىعاراتىن «ميراس دامۋ لتد» جشس، جابىن پليتاسى مەن تاۋارلى-بەتون وندىرەتىن «ايبەك لتد» جشس جانە سول سياقتى قۇرىلىس ماتەريالدارىن وندىرەتىن بىرقاتار زاۋىت جۇمىس ىستەپ تۇر. ودان بولەك رۋحاني استانادا جيھاز، بىلعارى ونىمدەرى دە نارىققا شىققان. جۇزەگە اسىپ وتىرعان 7 جوبا بويىنشا 330 جۇمىس ورنى اشىلعان. ال وڭىردەگى جەر كولەمى ەڭ ءىرى ايماق سوزاق اۋدا­نىن­داعى يندۋستريالىق ايماقتا 1144 ملن تەڭگە­نى قۇرايتىن 5 جوبا جۇزەگە اسىپ، 279 ادام جۇ­مىس­قا تارتىلماق. اۋماعى 35 گەكتار بولاتىن «شاردارا» يندۋستريالىق ايماعىندا 1125 ملن تەڭگەنى قۇرايتىن 3 جوبا جۇزەگە اسىپ وتىر. ين­دۋس­تريا­لىق ايماقتىڭ ءبىر ارتىقشىلىعى، مۇندا ەلەكتر ەنەرگياسى ارزان، اۋىزسۋ جانە سۋارمالى جەر بار. «ماقتاارال» يندۋستريالىق ايماعىندا 1330 ملن تەڭگەنى قۇرايتىن 5 جوبا جۇزەگە اسۋدا. «قازىعۇرت» يندۋستريالىق ايماعى 40 گەكتار جەردى الىپ جاتىر. مۇندا 186 جۇمىس ورنى بار 6 جوبا ىسكە اسىرىلۋدا. ال يندۋستريالىق ايماقتى دامىتۋ كەزىندە نەگى­زىنەن ونەركاسىپكە، جاڭا تەحنولوگيالارعا، سونداي-اق جۇمىس ىستەپ تۇرعان وندىرىستەر جەلىسىن كەڭەيتۋگە باسىمدىق بەرىلگەن كەنتاۋدا 261 ادامدى جۇمىسپەن قامتيتىن 10 جوبا جۇزەگە اسپاق. جالپى اۋماعى 115 گەكتار بولاتىن «بادام» يندۋستريا­لىق ايماعىندا 8 جوبا اياسىندا 1189 ادامدى جۇمىسپەن قامتۋ كوزدەلگەن. «بادام» – يننو­ۆاتسيالىق تەحنو­لو­گيالارعا سەر­پى­لىس جاساپ جاتقان بىردەن-ءبىر يندۋستريالىق ايماق. قازىر وندا ءارتۇرلى قۇرىلىس ماتەريالدارىن وندىرەتىن زاۋىتتاردان بولەك، تراكتور شى­عاراتىن كاسىپورىن جانە 1600 توننالىق مۇزدات­قىش قويماسىمەن بىرگە باۋ-باقشا القابى بار.

وڭىردە قۇرىلىس جۇمىستارى دا بيىل ەرەكشە قارقىن الدى. اسىرەسە وبلىس ورتالىعى تۇركىستاندا قۇرىلىس جۇمىستارى باسەڭدەگەن ەمەس. جالپى جىل باسىنان بەرگى 11 ايدا وڭىردە قۇرىلىس جۇمىستارىنىڭ كولەمى 129،9 ملرد تەڭگە بولعان نەمەسە وتكەن جىلدىڭ ءتيىستى كەزەڭىنە 116،4% ارتقان. قۇرىلىس قارقىنىنا ارىس قالاسىندا ورىن العان توتەنشە جاعدايدىڭ دا اسەر ەتكەنىن ايتا كەتەلىك. ەل تۇرعىندارىنىڭ تاتۋلىعى مەن بىرلىگىنىڭ ءبىر كورىنىسى ىسپەتتى بولعان ارىستاعى جاعدايدان كەيىن قالانى قالپىنا كەلتىرۋ جۇمىستارى جۇرگىزىلىپ، تۇرعىن ۇيلەر، الەۋمەتتىك نىساندار بوي كوتەردى. جالپى وبلىستا تۇرعىن ءۇي قۇرىلىسىن دامىتۋعا 52،4 ملرد تەڭگە ينۆەستيتسيا باعىتتالعان نەمەسە وتكەن جىلدىڭ سايكەس كەزەڭىنەن 56،9% ارتقان. پايدالانۋعا بەرىلگەن تۇرعىن ءۇيدىڭ جالپى الاڭى 495 مىڭ شارشى مەتردى قۇراپ، وتكەن جىلدىڭ ءتيىستى كەزەڭىنەن 32،1% ءوستى.

 اۋىل شارۋاشىلىعى ونىمدەرىنىڭ ەكسپورتى ارتتى

تۇركىستان ءوڭىرىنىڭ قاي اۋدانىن الساق تا وزىندىك تابيعي ەرەكشەلىگى بار، بەرەكەلى ايماق. حالقى ەڭبەكقور، ساۋداعا بەيىم، باسەكە­لەس­تىك­كە قابىلەتتى وڭىردە بيىلعى 11 ايدا اۋىل شارۋاشىلىعىنىڭ جالپى ءونىم كولەمى 593،2 ملرد تەڭگەنى قۇرادى، ياعني وتكەن جىلدىڭ سايكەس كەزەڭىمەن سالىستىرعاندا 3،4%-عا ارتتى. ونىڭ ىشىندە وسىمدىك شارۋاشىلىعى – 346،7 ملرد. تەڭگەنى (103،5%)،  مال شارۋاشىلىعى  –  243،6 ملرد تەڭگەنى قۇرادى (103،3%). سالاعا تارتىلعان ينۆەستيتسيا 27،9 ملرد تەڭگە بولىپ، وتكەن جىلدىڭ ءتيىستى كەزەڭىمەن سالىستىرعاندا 2،5 ەسەگە ارتقان. اۋىل شارۋاشىلىعى داقىل­دا­رىنىڭ ەگىس كولەمى وتكەن جىلعا قاراعاندا 13،3 مىڭ گەكتارعا ارتىپ، 827 مىڭ گەكتارعا جەتتى. ەگىستىكتى ءارتاراپتاندىرۋ جۇمىستارى بو­يىنشا مال ازىقتىق داقىلدار 11 مىڭ گەك­تارعا ۇل­عايىپ، جالپى كولەمى 201 مىڭ گەك­تار­عا جەتتى. «ەلباسى نۇرسۇلتان نازارباەۆ اگرو­ونەركاسىپ كەشەنى الدىنا، الداعى 5 جىلدا ەڭبەك ونىمدىلىگى مەن قايتا وڭدەلگەن اۋىل شارۋا­شىلىعى ونىمدەرى ەكسپورتىن 2،5 ەسەگە ارت­تىرۋ مىندەتىن قويعان بولاتىن. وسى باعىتتا بيىل تۇركىستان وبلىسىندا اۋقىمدى جۇمىستار اتقا­رىلدى. ماسەلەن، اگروقۇرىلىمدار ماساقتى داقىلداردىڭ تۇسىمدىلىگىن 20 تسەنتنەرگە جەتكىزىپ، 462 مىڭ توننا استىق باستىردى. وتكەن جىلمەن سالىستىرعاندا ونىمدىلىك ءار گەكتاردان 5،2 تسەنتنەرگە ءوسىپ، قامباعا 125 مىڭ توننا قىزىل ءدان ارتىق قۇيىلدى. كوكونىس باقشالارىنان 3 ملن توننا ءونىم جينالىپ، رەكوردتىق كورسەتكىشكە قول جەتكىزىلدى. جۇگەرىنىڭ تۇسىمدىلىگى ارتىپ، گەكتارىنا 47،3 تسەنتنەردەن ءونىم بەردى. سونىڭ ارقاسىندا 218 مىڭ توننا ءونىم الىندى. ماقتا تۇسىمدىلىگى 27 تسەنتنەرگە ۇلعايىپ، 347 مىڭ توننا «اق التىن» جينالدى. ماقتا تەرىمىنە 339 كومباين جۇمىلدىرىلىپ، ءشيتتى ماقتانىڭ 75 پا­يىزى كومباينمەن تەرىلدى. اۋا رايىنىڭ قولايلى بولۋىنا بايلانىستى جانە شارۋالاردىڭ ەسەلى ەڭبەگىنىڭ ارقاسىندا ءبىر جارىم جىلدىق مال ازىعى دايىندالىپ، جەمشوپ قورى 4 ملن تونناعا جەتكىزىلدى. سالاعا وزىق تەحنولوگيالاردى ەنگىزۋدىڭ ناتيجەسىندە ەڭبەك ونىمدىلىگى ارتتى. ماسەلەن، جاڭبىرلاتىپ، تامشىلاتىپ سۋارۋ ءادىسى جاڭادان 7 مىڭ گەكتارعا ەنگىزىلىپ، جالپى كولەمى 16،8 مىڭ گەكتارعا جەتتى»، دەيدى وبلىستىق اۋىل شارۋاشىلىعى باسقارماسىنىڭ باسشىسى نۇربەك بادىراقوۆ.

رەسپۋبليكاداعى جىلىجايلاردىڭ 80 پايىزى تۇركىستان وبلىسىندا ەكەنى ءمالىم. سونداي-اق وڭىردە جاڭادان 673 گەكتارعا قارقىندى باۋ ەگىلىپ، بارلىعىن قوسقاندا اۋماعى 3،4 مىڭ گەكتارعا وسكەن. ناتيجەسىندە 190 مىڭ توننا جەمىس-جيدەك پەن ءجۇزىم ءوندىرىلدى، بۇل رەسپۋبليكاداعى ۇلەستىڭ 57 پايىزىنا تەڭ. 2019 جىلدىڭ 1 جەلتوقسانىنا وبلىستاعى شارۋاشىلىقتاردىڭ بارلىق ساناتتارىنداعى ءىرى قارا مال سانى – 960،1 مىڭ باستى نەمەسە وتكەن جىلدىڭ سايكەس كەزەڭىنە – 104، 2%، قوي مەن ەشكى – 4 217،7 مىڭ نەمەسە 101، 7%، جىلقى – 317،8 مىڭ نەمەسە 109%، تۇيە  –  28،7 مىڭ باستى نەمەسە 107،5% قۇرادى. باسقارما باسشىسىنىڭ ايتۋىنشا، شەتەلدەن 3910 اسىل تۇقىمدى ءىرى قارا ۇرعاشى مال ساتىپ الىنىپ، وتكەن جىلمەن سالىستىرعاندا 1،8 ەسەگە ارتقان. قولدا بار 403 مىڭ ۇرعاشى مالدىڭ 136 مىڭى نەمەسە 34 پايىزى تۇقىمدىق تۇرلەندىرۋگە قاتىسىپ، بۇل بويىنشا بەرىلگەن تاپسىرما 103 پايىزعا ارتىق ورىندالعان. سىيىمدىلىعى 8 مىڭ باس بولاتىن 5 جاڭا مال بورداقىلاۋ الاڭى اشىلىپ، وسىنداي الاڭداردىڭ جالپى سىيىمدىلىعى 164 مىڭ باسقا جەتكەن. بۇدان بولەك ءىرى قارا مال ۇستايتىن 8 جاڭا وتباسىلىق ءسۇت فەرماسى اشىلىپ، 2 تاۋارلى-ءسۇت فەرماسى كەڭەيتىلدى. وبلىستىڭ بارلىق شارۋاشىلىق ساناتتارىندا 200،6 مىڭ توننا – ەت (تىرىدەي سالماقتا)، 672،9 مىڭ توننا – ءسۇت، 173،9 ملن دانا جۇمىرتقا ءوندىرىلدى.

وڭىردە اۋىل شارۋاشىلىعى ونىمدەرىنىڭ ەكسپورتى دا ارتىپ كەلەدى. مىسالى، وسىمدىك شارۋاشىلىعىندا بارلىعى 394 مىڭ توننا، مال شارۋاشىلىعىندا 28 مىڭ توننا ءونىم شەتەلدەرگە شىعارىلىپ، ەكسپورت كولەمى 157،3 ملن اقش دوللارىن قۇراعان. «اتاپ ايتقاندا، 15،2 مىڭ توننا ءىرى قارا مال، 3،7 مىڭ توننا قوي ەتى رەسەي، وزبەكستان، تاجىكستان، ازەربايجان ەلدەرىنە ەكسپورتتالدى. ال 394 مىڭ توننا كوكونىس، باقشا ونىمدەرى رەسەي، بەلارۋس، لاتۆيا، ليتۆا، گەرمانيا، ۋكراينا مەملەكەتتەرىنە جونەلتىلدى. بۇدان بولەك، بالىق شارۋاشىلىعىن مەملەكەت تاراپىنان قولداۋدىڭ ناتيجەسىندە بارلىعى 2 390 توننا بالىق ونىمدەرى گەرمانيا، ليتۆا، رەسەي، وزبەكستان جانە چەحياعا ەكسپورتتالدى. الداعى كەزەڭدە قىتاي ەلىنە تۇيە ءسۇتىنىڭ ونىمدەرىن ەكسپورتتاۋ جوسپارلانىپ وتىر»،  دەيدى باسقارما باسشىسى. جالپى 2019 جىلدىڭ قاڭتار-قازان ايلارىندا تۇركىستان وبلىسىنىڭ سىرتقى ساۋدا اينالىمىنىڭ كولەمى 279،6 ملن. اقش دوللارىن قۇراپ، وتكەن جىلدىڭ سايكەس كەزەڭىنەن 15،6%-عا ارتقان. ونىڭ ىشىندە ەكسپورت، تيىسىنشە – 203،4 ملن اقش دوللارىن نەمەسە 9،1%-عا ارتقان، يمپورت – 76،2 ملن اقش دوللارىن نەمەسە 137،7%-دى قۇرادى.

 695 جوبا ىسكە اسىرىلۋدا

وڭىردە وبلىس اكىمى ومىرزاق شوكەەۆتىڭ باس­تاماسىمەن اۋىل شارۋاشىلىعى سالاسىندا 18 باعىتتى قامتيتىن جالپى قۇنى 89،4 ملرد تەڭگە بولاتىن 695 جوبا ىسكە اسىرىلۋدا. قازىرگى تاڭدا قۇنى 31،3 ملرد تەڭگەنى قۇرايتىن 590 جوبا پايدالانۋعا بەرىلىپ، 2 287 جاڭا جۇمىس ورنى اشىلعان. ونىڭ ىشىندە ءبىر القاپتان جىلىنا 2-3 ءونىم الۋ جوباسى مەن قۇنى 3،1 ملرد تەڭگە بولاتىن 107 جوبا جۇزەگە اسىرىلىپ، 39 ملرد تەڭگەنىڭ ءونىمى ءوندىرىلدى. الداعى ۋاقىتتا ءاربىر اۋىلدىق وكرۋگتە 10 جوبادان جۇزەگە اسىرۋ جوسپارى تۇزىلگەن. سونداي-اق «تۇركىستان وبلىسىنىڭ الەۋمەتتىك-ەكونوميكالىق دامۋىنىڭ 2024 جىلعا دەيىنگى كەشەندى جوسپارى» اياسىندا تۇركىستان قالاسى اۋماعىندا ازىق-ت ۇلىك بەلدەۋىن قالىپتاستىرۋ جوباسى جۇزەگە اسىرىلا باستادى. بۇل ورايدا جالپى قۇنى 70 ملرد تەڭگە بولاتىن 8 ءىرى ينۆەستيتسيالىق جوبانى ىسكە اسىرۋ كوزدەلىپ وتىر. سونىڭ ناتيجەسىندە قوسىمشا 30 ملرد تەڭگەنىڭ اۋىل شارۋاشىلىعى ءونىمى ءوندىرىلىپ، 2 500-دەن استام جاڭا جۇمىس ورنى قۇرىلادى. بيىلدىڭ وزىندە 4 ءىرى ينۆەستيتسيالىق جوبانى ىسكە اسىرۋدىڭ العاشقى كەزەڭدەرى باستالعان. اتالعان ءىرى جوبالاردى ىسكە اسىرۋ ءۇشىن قالا اۋماعىنداعى القاپتار زاماناۋي تەحنولوگيا­لارمەن ىلعالداندىرىلىپ، جاسىل بەلدەۋ جۇيەسى قالىپتاستىرىلماق. وسىلايشا تۇركىستان قالاسىنىڭ كليمات ىلعالدىعىن جاقسارتىپ، وبلىس ورتالىعىندا حالىقتىڭ ءومىر ءسۇرۋ دەڭگەيىن كوتەرۋ، جايلى جاعداي جاساۋ باعىتىندا يگى ىستەر قولعا الىنۋدا.

تۇركىستان وبلىسى تابيعي ءوسىمى جوعارىلى­عى­مەن دە ەرەكشەلەنەدى. وڭىردە 2019 جىلدىڭ 1 قاراشاسىنداعى مالىمەت بويىنشا، وبلىس حال­قىنىڭ سانى 2 013،9 مىڭ ادامدى قۇراپ، وتكەن جىلدىڭ ءتيىستى كەزەڭىنەن 2،1%-عا ارتتى. ال 2019 جىلعى ءىى توقساندا وبلىس حالقىنىڭ ءبىر ايدا ورتا ەسەپپەن جان باسىنا شاققانداعى اتاۋلى اقشالاي تابىسى 52 446 تەڭگە بولىپ، وتكەن جىلدىڭ سايكەس كەزەڭىمەن سالىستىرعاندا 17،1%-عا، ناقتى اقشالاي تابىس 11،5%-عا وسكەن. وڭىردە الەۋمەتتىك نىساندار قاتارى ارتۋمەن بىرگە قۇرال-جابدىقتار دا جاڭارتىلۋدا. بۇل ورايدا مەملەكەتتىك قولداۋ كولەمى دە ارتقانىن ايتا كەتەلىك. ناقتىراق ايتساق، دەنساۋلىق ساق­تاۋ سالاسى بويىنشا 2019 جىلى بيۋدجەت ەسە­بىنەن 9 نىساننىڭ قۇرىلىسىنا 6،1 ملرد تەڭگە، ونىڭ ىشىندە رەسپۋبليكالىق بيۋدجەت ەسە­بىنەن 5،0 ملرد تەڭگە، وبلىستىق بيۋدجەت ەسەبىنەن 1،1 ملرد تەڭگە جانە مەديتسينا مەكە­مە­لەرىنىڭ ماتەريالدىق-تەحنيكالىق بازاسىن جاقسارتۋ ماقساتىندا 7،6 ملرد تەڭگە، قاراس­تى­رىل­دى. ناقتىلاي كەتسەك، وڭىردەگى 747 مەملە­كەت­تىك مەكەمەنىڭ 31-ءى اۋرۋحانا، 716-سى امبۋلا­تور­لى-ەمحانالىق مەكەمە، مەديتسينالىق پۋنكت، فەلد­شەرلىك-امبۋلاتوريالىق پۋنكت. ال بالالار­دى مەكتەپكە دەيىنگى بىلىممەن قامتۋ دەڭگەيى 1 جاس­تان 6 جاسقا دەيىن – 93،5%، 3 جاستان 6 جاسقا دەيىن 97،9%-دى قۇراپ وتىر. جالپى وبلىس بويىنشا 899 ورتا ءبىلىم بەرۋ مەكتەپتەرىندە 467،7 مىڭ وقۋشى ءبىلىم الۋدا. بارلىق مەكتەپتەر بايلانىس جانە ينتەرنەت جۇيەلەرىنە قوسىلعان جانە 2 675 ينتەراكتيۆتى تاقتالار ورناتىلعان.

 

تۇركىستان وبلىسى

 

سوڭعى جاڭالىقتار

شىعىس قازاقستان «جاسىل» ايماقتا

ايماقتار • بۇگىن، 12:15

دوللار ارزانداپ، مۇناي قىمباتتادى

ەكونوميكا • بۇگىن، 11:36

قىركۇيەكتە حالىق ساناعى باستالادى

قازاقستان • بۇگىن، 09:47

بۇگىن ەلىمىزدە قاتتى ىستىق بولادى

قازاقستان • بۇگىن، 09:05

بەكىرەگە قويىلعان بەلگى

ايماقتار • بۇگىن، 07:45

«COVID-19» سپەكتاكلى قويىلدى

ونەر • بۇگىن، 07:43

ەركىن جۇرگىڭ كەلسە، ەكپە سالدىر

مەديتسينا • بۇگىن، 07:22

شابان قيمىل شاڭ قاپتىرماسىن

تەحنولوگيا • بۇگىن، 07:20

نە ەكسەڭ، سونى ورارسىڭ

قازاقستان • بۇگىن، 07:17

«استانا» ۇزاپ بارادى

فۋتبول • بۇگىن، 07:07

كوك تۇركىنىڭ كوزى

تاريح • كەشە

ۇقساس جاڭالىقتار