ارينە, بورىك دەگەن ءسوز بارىمىزگە ۇنايدى. ول, اسىرەسە, ءبىزدىڭ مىناۋ شاعىن اڭگىمەمىزگە ەرەكشە كورىك بەرىپ تۇرار ەدى. قاراڭىزشى: «باس پەن بورىك». قانداي جاراسىمدى!
بىراق ءبىزدىڭ باسقا بورىك قونباعالى قاش-شان. سوندىقتان دا, بۇگىنگى ءسوز – كادىمگى قاراپايىم قالپاق تۋرالى عانا بولماق.
ەڭ باستى ماسەلە, سول قۇرىماعىردىڭ قايتا-قايتا باستان ءتۇسىپ قالا بەرەتىندىگى عوي.
ناقتىسىن ايتسام, ءجيى-ءجيى جوعالتامىن. جىلى جەرگە كىرگەن بويدا ۇمىتام. قاشان شەشىپ, قايدا قويعانىمدى بىلمەيمىن. تەك باسىم جاۋراعاندا عانا ەسىمە ءتۇسىپ, قاپ دەپ سانىمدى ءبىر سوعامىن. بىراق كەش...
سودان سوڭ, امال جوق, تاعى دا جاڭا قالپاق ساتىپ الۋعا تۋرا كەلەدى. شىنىمدى ايتسام, بازارعا بارعان سايىن ەڭ ارزانىن تاڭدايمىن. سەبەبى ارزان نارسەنى جوعالتساڭ, ونىڭ وكىنىشى دە ارزانداۋ بولادى.
ءيا, ءيا, ءسىز ويلاعانداي, قىمبات قالپاق تا الىپ كوردىم. بىراق, قىمبات دۇنيەنى ۇمىتۋ قيىن دەگەن ءسوزدىڭ ءوزى دە, راسىن ايتسام, شىندىقتان الىستاۋ ما دەپ قالدىم. سەبەبى جىلى جەرگە بارعان باس سول باياعىسىنشا بىلجىراپ, ءبارىبىر ۇمىتىپ كەتە بەرەدى. سوندىقتان قىمبات قالپاقتىڭ وزىنەن گورى وكىنىشى الدەقايدا قىمباتقا تۇسەدى.
ونىڭ ۇستىنە قايتا-قايتا جوعالتىپ, قايتا-قايتا جاڭاسىن ساتىپ الا بەرگەن سوڭ ارزان قالپاقتىڭ ءوزى دە وتباسىلىق بيۋدجەتتىڭ ءبىر شەتىن وڭدىرماي وپىرىپ كەتەدى. ەندى نە ىستەسەم ەكەن؟..
«بۇعان ءوزى, باس كىنالى مە, قالپاق كىنالى مە؟»
مىنە, وسىنداي سۇراق تۋعان سوڭ, وعان ارينە, جاۋاپ ىزدەيسىڭ. ەسىڭە قايداعى-جايداعىلار تۇسەدى.
انە, سول كەزدە ويلايسىڭ, ءاي, وسى, ۇمىتشاق باس پەن قالپاقتىڭ اراسىنداعى بايلانىس سەكىلدى تۇراقسىز قارىم-قاتىناس كەيبىر ادامداردىڭ اراسىندا دا بار-اۋ دەپ.
ويتكەنى بىرەۋدى بىرەۋدىڭ الگى قالپاق سەكىلدى قاجەت كەزىندە عانا پايدالانىپ, قاجەت ەمەس كەزىندە تەز-اق ۇمىتىپ كەتەتىنىن كۇندە بولماسا دا, كۇنارا كورىپ ءجۇرمىز ەمەس پە.
