...ءۇن قوسادى
مەنىڭ تۋىم, مەنىڭ وتانىم
Nur Otan پارتياسى مەملەكەتتىك تۋدى كەڭىنەن ناسيحاتتاۋ جانە قازاقستاندىق جاستار اراسىندا پاتريوتتىق سەزىمدى قالىپتاستىرۋ ماقساتىندا «مەنىڭ تۋىم, مەنىڭ وتانىم!» پاتريوتتىق اكتسياسىن قولعا العان بولاتىن.
پارتيانىڭ اۋداندىق فيليالى مەن ماڭعىستاۋ اۋداندىق جاستار رەسۋرستىق ورتالىعى بىرلەسىپ اۋدان ورتالىعىنداعى «ازامات» سپورت كەشەنىندە, شوقىر بولتەك ۇلى اتىنداعى سپورت كەشەنىندە, ماڭعىستاۋ تەحنيكالىق كوللەدجىندە, شەبىر اۋىلىندا اتالعان اكتسيانى وتكىزدى. مۇندا ءسوز العان Nur Otan پارتياسى اۋداندىق فيليالى توراعاسىنىڭ ءبىرىنشى ورىنباسارى ايبارشا اسامادينقىزى «مەملەكەتتىك رامىزدەر – مەملەكەتتىڭ قوعامدىق ساناسىن جانە وڭ ءيميدجىن قالىپتاستىرۋعا اسەر ەتەتىن نەگىزگى يدەولوگيا كوزى» ەكەنىنە توقتالدى.
اۋدانداعى تۇراقتى وتكىزىلەتىن ءتۇرلى شارالار مەن اكتسيالاردىڭ, قوعامدىق ماڭىزى بار شارالاردىڭ ۇيىمداستىرۋشىسى «ماڭعىستاۋ اۋداندىق جاستار رەسۋرستىق ورتالىعىنىڭ» باسشىسى, اۋداندىق قوعامدىق كەلىسىم كەڭەسىنىڭ توراعاسى اللابەرگەن قونارباەۆ ۇلكەن ساياسي ماڭىزعا يە بۇل شارا – ءاربىر قازاقستاندىقتى اسقان پاتريوتتىق سەزىمگە بولەيتىنىن ايتتى.
شاراعا قاتىسقان سامبودان الەم چەمپيونى الىبەك جەڭىسوۆ سپورتشىلار جەڭىستەرىنىڭ ارقاسىندا وليمپيا ويىندارى مەن الەمدىك دودالاردا بەيبىت ولكەنىڭ كوك بايراعى كوك اسپاندا جەلبىرەپ, كەۋدەدە ماقتانىش سەزىمىن ۇيالاتاتىنىن اتاپ ءوتتى.
ەلەونورا بيگەلدىقىزى,
اۋداندىق «ەرىكتىلەر كورپۋسىنىڭ» جەتەكشىسى
ماڭعىستاۋ وبلىسى,
ماڭعىستاۋ اۋدانى
...جاڭالىعىن جەتكىزەدى
جاڭا مەكتەپ پايدالانۋعا بەرىلدى
تۇركىستان وبلىسىنىڭ كەنتاۋ قالاسىنا قاراستى اقىن-تۇما ەلدى مەكەنىندە جاڭا مەكتەپ پايدالانۋعا بەرىلدى. شالعاي اۋىلدىڭ وقۋشىلارى ەكىنشى توقساندى جاڭا ءبىلىم ۇياسىندا وقىپ جاتىر.
وسى ۋاقىتقا دەيىن اتالعان ەلدى مەكەندە ءبىر قاباتتى باستاۋىش مەكتەبى عانا بولعان. ال جوعارى سىنىپ وقۋشىلارى اۋىلدىڭ ورتالىعىنا قاتىناپ ءبىلىم الىپ كەلگەن. ەندى مۇنداي قيىندىقتار ارتتا قالدى. «وڭىرلەردى دامىتۋ» باعدارلاماسى اياسىندا رەسپۋبليكالىق بيۋدجەتتەن قارجى ءبولىنىپ, اۋىلدا 300 ورىندىق جاڭا مەكتەپ بوي كوتەردى. اقىن-تۇما اتىنداعى ءبىلىم وشاعىن سالۋ جۇمىستارى وتكەن جىلى باستالىپ, اعىمداعى جىلدىڭ تامىز ايىندا اياقتالدى. جالپى اۋماعى 6949 شارشى مەتردى قۇرايدى. ەندى اۋىل بالالارى زامان تالابىنا ساي ءبىلىم الاتىن بولدى.
ايتا كەتەيىك, زاماناۋي ۇلگىدە سالىنعان عيماراتتا كۇندەلىكتى ساباقتارعا قاجەتتى قۇرال-جابدىقتارمەن قاتار, زەرتحانالىق, ءپان كابينەتتەرى بار. سپورت زال مەن اسحاناسى دا قاراستىرىلعان.
اينۇر اقباەۆا
تۇركىستان وبلىسى
...اسەرىمەن بولىسەدى
ءبىز – وقيتىن ءوڭىردىڭ تۇرعىندارىمىز
س.جيەنباەۆ اتىنداعى وبلىستىق جاسوسپىرىمدەر كىتاپحاناسىندا «رۋحاني جاڭعىرۋ» باعدارلاماسى نەگىزىندە «وقيتىن ولكە» اكتسياسى اياسىندا سارىشولاق بورانباي ۇلىنىڭ «تىلەۋقاباق» ءانىنىڭ شىعۋ تاريحى جايىندا ء«اننىڭ ءسوزى – تاريحتىڭ ءوزى» اتتى ادەبي-مۋزىكالىق كەش وتكىزىلدى. قازىرگى كەزدە اقىن-جازۋشىلارىمىزدى ەسكە الىپ, ەسىمدەرىن جاڭعىرتىپ ءجۇرمىز. «وقيتىن ولكە» اكتسياسى 2011 جىلدان باستاپ اقتوبە وڭىرىندە جىل سايىن ۇيىمداستىرىلىپ كەلەدى. اكتسيا اياسىندا وتكىزىلگەن شارانىڭ باستى ماقساتى – كوپشىلىك كوپ بىلە بەرمەيتىن, ءحىح عاسىردىڭ ءىى جارتىسى, حح عاسىردىڭ باسىندا اقتوبە وڭىرىندە ءومىر سۇرگەن اقىندار ىشىندەگى ەڭ كورنەكتىسى – سارىشولاق بورانباي ۇلىنىڭ شىعارمالارىن ناسيحاتتاۋ, قالىڭ كوپشىلىككە تانىستىرۋ بولىپ تابىلادى. سارىشولاق جاس كەزىنەن ونەرگە اۋەس بولعان, ءارتۇرلى اسپاپتاردا ويناۋمەن بىرگە ءان دە سالعان, ارابشا وقىپ حات تانىعان. اۋىزشا دەرەكتەرگە قاراعاندا, جىرشى سارىشولاق – كەدەي, ءتىلى وتكىر, ءسوزى مىردەي, ايتىسقان ادامىن جەڭبەي تىنبايتىن ادام بولعان. ونىڭ جىر جولدارى مەن وتكىر سوزدەرى حالىق اراسىندا كەڭ تاراپ, ەلدى سۇيسىنتكەن ەكەن. ۇيىمداستىرىلعان كەشتە سارىشولاق بورانباي ۇلىن ناسيحاتتاۋشى, زەرتتەۋشى, فيلولوگيا عىلىمدارىنىڭ دوكتورى, پروفەسسور جۇبانازار اسانوۆ ءوز زەرتتەۋ ەڭبەكتەرىنە سۇيەنىپ, كوپتەگەن جاڭا مالىمەتكە قانىق قىلدى. سونىمەن قاتار اقىندار نۇرلىبەك قالاۋوۆ پەن تالعات تىلەۋلەس جەرلەس جىرشى, كومپوزيتور تۋرالى كوپتەگەن دەرەكتەمە كەلتىرىپ, اڭگىمە ءوربىتتى. الداعى ۋاقىتتا «وقيتىن ولكە» اكتسياسى اياسىندا ءىس-شارالار جاسالىپ, جاستارىمىز كوپتەگەن مالىمەت الادى دەگەن ويدامىز.
شىرايلىم قۇداسوۆا,
س.جيەنباەۆ اتىنداعى وبلىستىق جاسوسپىرىمدەر كىتاپحاناسىنىڭ قىزمەتكەرى
اقتوبە
...ساقتاندىرادى
سەنىمگە سەلكەۋ تۇسپەسە ەكەن...
ۋنيۆەرسيتەت قابىرعاسىندا ءجۇرىپ تانىسقان ءبىر قۇربىم بار. سوڭعى كەزدەرى تىم جاقىن ارالاسا قويماساق تا كوپ قۋانىشىن «ينستاگرامنان» باقىلاپ, بىرگە قىزىقتاپ وتىرامىن. اقىلىن كوپ جاعدايدا ەموتسيا بيلەسە دە, ءوزى سونداي جاقسى قىز. وسىدان ءبىر-ەكى جىل بۇرىن ءبىر جىگىتپەن ۇزاق كەزدەستى. «ينستاگرامى» سونىڭ فوتوسىنا تولدى. سودان كۇندەردىڭ ءبىر كۇنىندە سول جىگىت بەينەلەنگەن فوتولاردىڭ بارلىعى جوق بولدى. ايتپاسا دا بەلگىلى جاعدايدىڭ ورىن العانى تۇسىنىكتى. بىراق ادەمى قىزدار ۇزاق جالعىزسىراماسا كەرەك. كوپ ۇزاماي قۇربىمنىڭ تاعى ءبىر سىمباتتى جىگىتپەن تۇسكەن فوتولارى بىرتىندەپ شىعا باستادى. تاعى ۋاقىت ءوتتى. ەكىنشى جىگىتتى ءۇشىنشى جىگىت الماستىردى. ءسويتىپ قۇربىمنىڭ تىرلىگى باياعىدا ەستىگەن ءبىر انەكدوتتى ەسىمە ءتۇسىردى. ء«بىر كەلىنشەك 10-شى رەت كۇيەۋگە شىققالى تۇرىپ, قۇربىلارىنا ايتادى ەكەن: ء«وستىپ-ءوستىپ, بۇزىلىپ كەتەتىن ءتۇرىم بار», – دەپ. ءبىز, ارينە, شەكسىز سۇيەمىز. ءتىپتى سول اداممەن بىرگە شاڭىراق كوتەرىپ, بىرگە قارتاياتىنىمىزعا دەيىن سەنىمدىمىز. بىراق بىزدەگى سەنىم جىگىتتىڭ ويىنداعى جوسپارىمەن ساي بولارىنا كىم كەپىل؟! جاقسى قىزدار ءجۇز جىگىتپەن جۇرمەيدى. تۇسىنگەن ادامعا بۇدان ارتىق ايتارىم جوق.
كلارا ەرماعامبەتوۆا
