اۋدانداعى ءورت ءسوندىرۋ بەكەتىنە حابار جەتىسىمەن, ولار ەكى مينۋتتىڭ ىشىندە وقيعا ورنىنان تابىلعان. از ۋاقىتتىڭ ىشىندە ءورت اۋىزدىقتالعانمەن, وقىس وقيعا ءتورت جاندى جالماپ ۇلگەرگەن ەدى.
كەشكى اقشام جامىراعان كەزدە ۇلكەن وتباسى داستارقان باسىنا وتىرادى. وتباسىنداعى ون كىسىنىڭ سول كۇنى توعىزى ۇيدە بولاتىن. قوستاناي وبلىستىق توتەنشە جاعدايلار دەپارتامەنتىنىڭ باستىعى تالعات كاكىموۆتىڭ ايتۋىنا قاراعاندا, كۇندەلىكتى پايدالانىپ جۇرگەن گاز تاۋسىلىپ قالادى دا, ولار دالاداعى باللوندى ۇيگە كىرگىزەدى. مولشەردەن ارتىق تولتىرىلعان باللون ۇيگە كىرگىزگەندە تەمپەراتۋرانىڭ كۇرت وزگەرۋىنەن جارىلادى دا, ءورت شىعادى. اس ۇيدە جۇرگەن 1985 جىلعى ايەل مەن 2019 جىلى تۋعان قوس نارەستە جانە اس ۇيمەن قابىرعالاس بولمەدەگى 1938 جىلعى قارت انا سول جەردە ءتىل تارتپاي كەتەدى. ءۇي يەسى باسقا بولمەدەگى بالالارىن الىپ شىعادى, بىراق ولاردىڭ بارلىعى دا ءتۇرلى دارەجەدە كۇيىك جاراقاتىن الدى. زارداپ شەككەندەردىڭ اراسىندا 10, 8 جانە 5 جاسار ءۇش بالانىڭ دەنەسىن 10 پايىزدان 40 پايىزعا دەيىن كۇيىك شالدى. ال 22 جاستاعى ايەل مەن 34 جاستاعى ەر كىسىنىڭ دەنەسى 70 پايىزعا دەيىن كۇيىپ قالدى.
العاشقى كەزدە امانگەلدى, جانگەلدين اۋداندىق جانە ارقالىق قالالىق اۋرۋحانالارىنىڭ فەلدشەرلىك بريگادالارى بارىپ, جەدەل كومەك كورسەتتى. توسىن وقيعا بولعان كۇننىڭ ەرتەڭىنە جانە ءبىر كۇننەن كەيىن زارداپ شەككەندەر سانيتارلىق ۇشاقپەن قوستاناي قالاسىنداعى وبلىستىق اۋرۋحانا مەن وبلىستىق بالالار اۋرۋحاناسىنا جەتكىزىلەدى. ال قازىر ولاردىڭ بارلىعى دا رەسپۋبليكالىق سانيتارلىق اۋە كەمەسىمەن جەدەل تۇردە نۇر-سۇلتان قالالىق اۋرۋحانالارىنا جەتكىزىلىپ, ەم الىپ جاتىر.
قوستاناي
