ورازبەك بەسكەمپىروۆ تاجىريبەلى مەملەكەتتىك قىزمەتكەرلەردىڭ ءبىرى سانالادى. بۇل سالاداعى جۇمىس ءوتىلى – 16 جىل. بۇگىندە عابيت مۇسىرەپوۆ اتىنداعى اۋداندا قازىناشىلىق بولىمگە جەتەكشىلىك ەتىپ, مىندەتىن تالاپقا ساي اتقارىپ كەلەدى. وسى مەرزىم ىشىندە قىزمەتىنە قاتىستى بىردە-ءبىر شاعىم تۇسپەگەن. كاسىبي ىسكەرلىك, ادامدارمەن قارىم-قاتىناس, مىنەز-قۇلقى جاعىنان جاعىمدى تۇردە سيپاتتالادى. ولاي بولسا, اياقاستى ءمۇلت كەتىپ, «اتىڭ شىقپاسا جەر ورتەنىڭ» كەبىن قۇشقانى قالاي؟ الدە اينەكتەي شىتىناپ, سىزداۋىقتاي سىزداپ بارىپ جارىلعان «جارانىڭ» بىزگە بەيمالىم سىرلارى بار ما؟
وبلىستىق مەملەكەتتىك قىزمەت ىستەرى دەپارتامەنتى باسقارما باسشىسىنىڭ مىندەتىن اتقارۋشى رۋسلان جۇماعۇلوۆ قىزمەتتىك تەكسەرۋ بارىسىندا و.بەسكەمپىروۆتىڭ جەرگىلىكتى بانكتەر مەن شاعىن نەسيە ۇيىمدارى ارقىلى راسىمدەگەن نەسيە مولشەرى 4 ميلليون تەڭگەنى قۇراپ, ۋاقىتىلى وتەي الماعانىن جەتكىزدى. سوت ورىنداۋشىلار مەن كوللەكتورلار قارىزدىڭ وتەلۋىن تالاپ ەتىپ, مەكەمەگە قايتا-قايتا تەلەفون قوڭىراۋلاتسا كەرەك. مۇنىڭ ءوزى ۇجىمداعى مورالدىق-پسيحولوگيالىق احۋالعا, قالىپتى ەڭبەك جاعدايىنا كەرى اسەرىن تيگىزىپ, مامانداردىڭ مازاسىن الىپ, رەنىشىن تۋدىرعان كورىنەدى. باستى «ايىپ» وسى! ءبولىم باسشىسىنىڭ ايتار ءوز ءۋاجى بار. ول نەسيەنىڭ كوپ بولىگى بالالارىنىڭ ەم-دومىنا, سونداي-اق جالعا العان پاتەردىڭ كوممۋنالدىق تولەمدەرىن تولەۋگە جۇمسالعانىن, تولەمنەن باس تارتىپ, جالتارىپ جۇرمەگەنىن, قازىرگى ۋاقىتتا بۋحگالتەريا ارقىلى ماجبۇرلەپ ءوندىرىپ الۋ شاراسى قولدانىلىپ جاتقانىن ايتا كەلىپ, كەلەسى جىلى تولىق جاباتىنىنا سەندىردى.
وسى جەردە كەڭەس مۇشەلەرىنىڭ ۇستانىمى ەكىگە جارىلعانىن ايتا كەتكەن ءجون. «مەملەكەتتىك قىزمەتكەردىڭ جەكە باسىنا قاتىستى قۇپيالىلىقتى كوللەكتورلاردىڭ جالپاق جۇرتقا جاريالاۋى تۇسىنىكسىز. ماسەلەگە تەرەڭىرەك ۇڭىلگەنىمىز ءجون سەكىلدى. جالاقىسى ماردىمسىز شەنەۋنىكتى كىنالاۋ وڭاي. مەنىڭشە, الدىمەن نەسيەنى ونلاين-رەجىمدە شۇلەن تاراتقانداي وڭدى-سولدى ۇلەستىرە بەرەتىن شاعىن نەسيە ۇيىمدارىنا زاڭدىق تۇرعىدان توسقاۋىل قويۋدىڭ ناقتى جولدارى ويلاستىرىلماسا تالايلار جاپا شەگۋى ابدەن مۇمكىن. العان نەسيەنىڭ جارتىسىنداي پايىزدىق ۇستەمە بەلگىلەۋ س ۇلىكشە سورۋ دەگەن ءسوز. ادامدار قىسىلعاننان كەيىن ولاردىڭ قىزمەتىنە امالسىز جۇگىنىپ, ونىڭ اقىرى وسىنداي تىعىرىقتارعا تىرەپ جاتادى. زاڭ نورمالارىمەن قاتار ادامگەرشىلىك ار-وجدان بار ەكەنىن دە ۇمىتپاۋىمىز كەرەك. سوندىقتان شاعىن نەسيە ۇيىمدارىنا زاڭدىق تۇرعىدان شەكتەۋلەر مەن تىيىمدار سالىنعانى ءجون», دەدى تاجىريبەلى زاڭگەر ينەسسا قۋانوۆا.
دەپارتامەنت باسشىسى ەلەنا ستەپانەنكونىڭ پىكىرى باسقاشا ءوربىدى. ونىڭ ايتۋىنشا, و.بەسكەمپىروۆ ادەپ نورمالارىنا جات قىلىقتارعا بارعان. كەز كەلگەن باسشى ءوزىنىڭ ءىس-ارەكەتىمەن جانە مىنەز-قۇلقىمەن قوعام تاراپىنان ايتىلاتىن سىنعا سەبەپكەر بولماۋى ءتيىس. ۇجىمدا قولايسىز جاعداي تۋدىرعانى ءۇشىن وعان تارتىپتىك جازا قولدانۋ تۋرالى ۇسىنىس قولداۋ تاپتى.
تالقىلاۋشىلار مەملەكەتتىك قىزمەتشىلەردىڭ ادەپ كودەكسىندەگى تالاپتارعا سۇيەنگەنى انىق. كودەكستە جاۋاپتى تۇلعالاردىڭ مىنەز-قۇلقىنىڭ نەگىزگى ستاندارتتارى بەلگىلەنىپ, حالىقتىڭ مەملەكەتتىك ورگاندارعا سەنىمىن نىعايتۋدى, مەملەكەتتىك قىزمەتتە ءوزارا قارىم-قاتىناستىڭ جوعارى مادەنيەتىن قالىپتاستىرۋدى, مەملەكەتتىك قىزمەتشىلەردىڭ ادەپسىز مىنەز-ق ۇلىق جاعدايلارىنىڭ الدىن الۋدى دىتتەيدى. دەگەنمەن «تاياقتىڭ ەكى ۇشى بار» دەمەكشى, قارسى تاراپتىڭ, ياعني كوللەكتورلاردىڭ ازاماتتىڭ جەكە باسىنا قاتىستى مالىمەتتى جۇرتشىلىققا جاريا ەتۋى دۇرىس ەمەس دەۋشىلەردىڭ قاراسى مول. شىنىندا دا, داۋدىڭ باسى نەسيەنى ءوندىرىپ الۋعا جاۋاپتى تۇلعالاردىڭ جۇمىس ورنىنا قايتا-قايتا تەلەفون سوعۋىنان باستاۋ الىپ تۇرعانى بەلگىلى. وسى جەردە نەسيە الۋ قۇپيالىعىن ورەسكەل بۇزۋ, ەش سەبەپسىز ۇجىم مۇشەلەرىنىڭ مازاسىن الۋ فاكتىلەرى كورىنىس تاپقانىن اڭعارۋ قيىن ەمەس. جانە دە ەڭ باستىسى ەرىكسىز ءوندىرىپ الۋ شاراسى بويىنشا قارىزدى وتەۋ ۇدەرىسى الدەقاشان قولعا الىنعان. ونىڭ ۇستىنە جۇمىس پروتسەسىنىڭ السىرەپ, ناشارلاپ كەتكەنى جايلى دالەلدەردىڭ جەتكىلىكسىز ەكەنى دە كوزگە انىق شالىنادى.
جاۋاپكەرشىلىكتەن قاساقانا جالتارعان باسشىلاردى تارتىپتىك جاۋاپكەرشىلىككە تارتۋ كەرەك. بىراق و.بەسكەمپىروۆتەن ونداي ءىس-ارەكەت سەزىلمەيدى. بولارى بولىپ, بوياۋى سىڭگەننەن كەيىن جازالاۋ شەشىمىنىڭ قابىلدانۋى تۇسىنىكسىز.
سولتۇستىك قازاقستان وبلىسى
