جارما اۋدانىنىڭ جۇرتشىلىعى بيىل تاۋەلسىزدىك مەرەكەسىن ەرەكشە كوڭىل-كۇيمەن قارسى الدى. ۇلىق مەرەكە قارساڭىندا اۋدان ورتالىعى – قالباتاۋ اۋىلىندا ەكى پاتەرلى 5 تۇرعىن ءۇي پايدالانۋعا بەرىلدى.
بۇل باسپانالار كوپ بالالى انالار مەن مۇگەدەك جاندارى بار وتباسىلارعا سالتاناتتى تۇردە تابىس ەتىلدى. تۇرعىن ۇيلەردى «نۇرلى جەر» باعدارلاماسى بويىنشا جەكە كاسىپكەر دينارا يساباەۆا سالعان ەكەن.
تاعى ءبىر جاعىمدى جاڭالىق, 13 جەلتوقساندا بەلتەرەك اۋىلىندا جوندەۋدەن وتكەن مادەنيەت ءۇيى سالتاناتتى تۇردە اشىلدى.
جيىرما جىلداي قاراۋسىز قالعان عيماراتتى قايتا قالپىنا كەلتىرۋگە اۋداندىق بيۋدجەتتەن 7 ميلليون تەڭگەدەن استام قارجى ءبولىنىپتى.
«تاۋەلسىزدىكتىڭ 28 جىلدىعىن لايىقتى قارسى الۋ ماقساتىندا اۋداندا بىرقاتار يگى ىستەر جۇزەگە اسىرىلدى. ەلىمىزدىڭ باستى مەرەكەسىن بەلتەرەك اۋىلى تۇرعىندارى ەرەكشە ىقىلاسپەن قارسى الدى. مادەني شارالاردىڭ وتاۋىنان 20 جىلداي قول ءۇزىپ قالعان اۋىل تۇرعىندارى وسى وڭىرگە جاساعان ساپارىم بارىسىندا اتالمىش ماسەلەنى كوتەرگەن بولاتىن.
اۋىل اقساقالدارى مەن اق جاۋلىقتى انالار مادەنيەت وشاعىنىڭ تۇساۋىن كەسىپ, اۋداندىق مادەنيەت ءۇيىنىڭ ونەرپازدارى كونتسەرتتىك باعدارلاما ۇسىندى. وسىعان دەيىن اۋدان بويىنشا جەرگىلىكتى جەرلەردە 19 كلۋب جۇمىس ىستەپ تۇرعان بولسا, بۇگىن ولاردىڭ قاتارى تاعى ءبىر كلۋبپەن تولىعىپ وتىر. كەلەشەكتە وسى باعىتتاعى جۇمىستاردى جالعاستىرىپ, اۋدان ورتالىعىنان شالعاي جاتقان ەلدى مەكەندەرگە ءمان بەرىلەتىن بولادى» دەيدى جارما اۋدانىنىڭ اكىمى احمەتقالي نۇرعوجين.
شىعىس قازاقستان وبلىسى,
جارما اۋدانى
