شىمكەنت قالاسى اكىمدىگىنىڭ قولداۋىمەن وتكەن «قازاق ەلىنىڭ ۇمىتىلماس تۇلعالارى» اتتى كونفەرەنتسيادا اتاقتى عالىم, قوعام جانە مەملەكەت قايراتكەرىنىڭ ءومىرى مەن ساياسي قىزمەتى, رەسپۋبليكانىڭ الەۋمەتتىك-ەكونوميكالىق جاعدايىن قالىپتاستىرۋ جانە دامىتۋ بارىسىنداعى ەڭبەكتەرى تانىستىرىلدى.
قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا.نازارباەۆتىڭ «بولاشاققا باعدار:رۋحاني جاڭعىرۋ» جانە « ۇلى دالانىڭ جەتى قىرى» اتتى باعدارلامالىق ماقالالارىندا ايتىلعان مۇراتتارمەن ۇندەس شاراعا ەلىمىزبەن قاتار الىس-جاقىن شەتەلدەردەن عالىمدار مەن تاريحشىلار, ەل دامۋىنا ۇلەس قوسقان مارتەبەلى قوناقتار قاتىستى. سونداي-اق, كونفەرەنتسياعا ۇلى تۇلعانىڭ ماسكەۋلىك نەمەرەسى ۆلاديمير رىسقۇلوۆ پەن الماتى قالاسى مەن تۇلكىباس اۋدانىندا تۇراتىن ۇرپاقتارى كەلدى. تاريحقا تاعزىم جاساعان شارا تۇرار رىسقۇلوۆتىڭ ەسكەرتكىشىنە گۇل شوعىن قويۋدان باستالدى.
سالتاناتتى جيىندا ءسوز العان عالىمدار تۇرار رىسقۇلوۆتىڭ قىسقا عانا عۇمىرى مەن جارىق جۇلدىزداي جارقىن ءومىرىن, تاۋەلسىز قازاقستانعا قالدىرعان باعا جەتپەس بايلىعىن, ناعىز پاتريوتيزم مەن بولاشاق ۇرپاق ءۇشىن جانقيارلىق كۇرەستىڭ ۇلگىسى بولعان ازاماتتىعى حاقىندا بايانداما جاسادى. قازاقستاننىڭ دامۋىمەن قاتار ورتالىق ازيا رەسپۋبليكالارىنىڭ, رەسەي فەدەراتسياسىنىڭ جانە موڭعوليانىڭ ەكونوميكالىق وسۋىنە, قارىشتاپ دامۋىنا ۇلكەن ۇلەس قوسقانىن اتاپ ءوتتى.
«عىلىمي كونفەرەنتسيانىڭ ماقساتى – تۇرار رىسقۇلوۆتىڭ بەينەسىنە تاعى دا ءبىر توقتالۋ بولدى. ونىڭ باستاماسىمەن ەلىمىزدە تۇركىستان-ءسىبىر ياعني تۇركىسىب تەمىرجولى سالىنعان. سونداي-اق قۋاتتى وندىرىستىك ورتالىقتار قاراعاندى قالاسىنىڭ كومىر ءوندىرۋ جانە مەتاللۋرگيا كەشەنى, شىعىس جانە وڭتۇستىك قازاقستاننىڭ ءتۇستى مەتاللۋرگياسى, باتىس قازاقستاننىڭ مۇناي-گاز سالاسى وندىرىسكە ەنگىزىلدى. قازاقستان مەن ورتا ازيا اۋماعىندا بۇكىلوداقتىق ماڭىزى بار ءىرى ۇلتتىق قورىقتار قۇرىلدى»,- دەدى وقمۋ رەكتورى, قر ۇلتتىق عىلىم اكادەمياسىنىڭ اكادەميگى, تاريح عىلىمدارىنىڭ دوكتورى داريا قوجامجاروۆا.
شىمكەنت
