«وسىدان 100 جىل بۇرىن, دالىرەك ايتقاندا 1919 جىلدىڭ 17 جەلتوقسانىندا الاشتىڭ سول تۇستاعى استاناسى ورىنبور شاhارىندا «ۇشقىن« دەگەن گازەت دۇنيەگە كەلدى.
العاشقى سانى بەرەن اقىن بەرنياز كۇلەەۆتىڭ:
"...التىن التاي, ەدىل, جايىق, سارىارقا –
ساۋىت كيىپ, ساداق تارتقان ەر بار ما;
ارۋ ازىپ, ەر ۇركەك بوپ, جەر توزىپ,
جاۋعا جاعا جىرتتىرماعان ەل بار ما؟
التى الاشتىڭ قىزىل تۋىن قولىڭا ال,
ەرتەدە ەركىن وتكەن كۇنىن ويىڭا ال.
ەلدى جەردەن, ەردى ەرىكتەن ايىرعان,
دۇشپانىڭدى تابان تىرەپ جولىڭا ال..." دەپ باستالاتىن وتتى جىرىمەن, ايرىقشا ارناۋىمەن جارىق باسىلىم ارتىنشا "ەڭبەكشى قازاق" بوپ وزگەرىپ, قازاققا "قازاق" اتىن قايتارۋعا ۇلەس قوستى.
قازاقتىڭ قابىرعالى قايراتكەرلەرى مەن قارىمدى قالامگەرلەرى قىزمەت اتقارعان گازەت توقسانىنشى جىلى «ازاتتىق. تەڭدىك« دەگەن ۇران مەن «ەگەمەندى قازاقستان« دەگەن اتاۋدى تاڭداپ الىپ, ەلىمىزگە ەگەمەندىكتى سۇيىنشىلەدى. وسىلايشا ەلدىككە قىزمەت ەتكەن ەل گازەتى Egemen Qazaqstan بۇگىن 100 جاسقا تولىپ وتىر!», دەپ جازدى دارحان قىدىرالى.
بيىل Egemen Qazaqstan گازەتى ءوزىنىڭ 100 جىلدىعىن كەڭ كولەمدە رەسپۋبليكا اۋماعىندا اتاپ ءوتتى.
«بيىل اباي ەلىنەن, الاش قالاسىنان باستالعان باس باسىلىمنىڭ عاسىرلىق تويى ورىنبوردا ءتامامدالدى. الماتى مەن ەلوردادا, جەر-جەردە كوپتەگەن شارالار ۇيىمداستىرىلىپ, وتكەنگە تاعزىم ەتتىك. وسى شارالارعا اتسالىسقان, قولداۋ كورسەتكەن, تىلەكشى بولعان بارشا دوستارعا العىس ايتامىن! ءتاڭىر جارىلقاسىن! ەلىمىزدىڭ ءجۇز جىلدىق جىلناماسى بولعان اعا گازەتتىڭ مەرەيلى مەجەسى قۇتتى بولسىن! جاڭا عاسىرعا قادام باسقان ەگەمەننىڭ جولى ۇزاق بولىپ, ەلىمىزبەن بىرگە جاساي بەرسىن!», - دەدى «Egemen Qazaqstan رەسپۋبليكالىق گازەتى» اكتسيونەرلىك قوعامىنىڭ باسقارما توراعاسى دارحان قىدىرالى Facebook-تەگى پاراقشاسىندا.
