سەسسيادا وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى جومارت ءامىرحانوۆ بايانداما جاسادى. ول ءوز بايانداماسىندا وبلىستىڭ الداعى ءۇش جىلعا ارنالعان بيۋدجەتىنىڭ جالپى كولەمى 1,8 تريلليون تەڭگەنى قۇرايتىن شىعىس بولىگىنىڭ جوباسىن قاراستىرۋعا ۇسىندى.
2020 جىلعا ارنالعان بيۋدجەت جوباسى 579 ملرد. تەڭگە سوماسىندا انىقتالدى, بۇل 2019 جىلدىڭ بەكىتىلگەن بيۋدجەتىنەن 27,9 پايىزعا نەمەسە 126 ملرد. تەڭگەگە ارتىق. بايانداماشىنىڭ ايتۋىنشا, جوسپارلانعان قاراجاتتىڭ ەڭ كوپ ۇلەسى الەۋمەتتىك سالاعا – 23,2%, تۇرعىن ءۇي جانە ينجەنەرلىك كوممۋنيكاتسياعا -18,6%, سۋمەن قامتاماسىز ەتۋ – 4,1%, گازبەن قامتاماسىز ەتۋگە – 2,7% جانە باسقالارىنا – 51,4% كولەمىندە بولىنگەن. جالپى الدىمىزداعى ءۇش جىلدا الەۋمەتتىك سالانى دامىتۋعا 1,2 تريلليون تەڭگە كوزدەلۋدە, بۇل وبلىس بيۋدجەتى كولەمى 60 %-دان استامىن قۇرايدى.
بيۋدجەت جوسپارىنىڭ جوباسىمەن تانىسقان دەپۋتاتتار, ونى ءبىراۋىزدان قولداپ, داۋىس بەردى.
سونىمەن قاتار وسى باسقوسۋدا كەلەسى سەسسيانىڭ توراعاسى سايلانىپ, وعان دەپۋتات مۇحيت ۇمبەتوۆ بەكىتىلدى.
- ەرتەرەكتە رەسپۋبليكادان بولىنەتىن قارجىدان وبلىستىڭ مەنشىكتى كىرىسى الدەقايدا تومەن بولعان جىلدار دا بولدى. ال قازىر ءبىزدىڭ وبلىستىڭ مەنشىكتى كىرىسى - 248 ملرد. تەڭگەگە جەتتى. بۇعان ءبىز ينۆەستيتسيا تارتۋ ارقىلى, جاڭا وندىرىستەر اشۋ ارقىلى قول جەتكىزىپ وتىرمىز. ەلباسى شەت ەلدەرمەن ىسكەرلىك بايلانىس ورناتىپ, وڭىرلەرگە ينۆەتيتسيا تارتۋعا جول اشىپ بەردى. كۇنى كەشە پرەزيدەنتىمىز قاسىم-جومارت توقاەۆتىڭ شەتەلدىك ءىرى ينۆەستورلارمەن كەزدەسۋلەرىندە الماتى وبلىسىنداعى ەكى ءىرى «باۋمانن» جانە «لۋكويل» ينۆەستيتسيالىق جوبالارىنىڭ تالقىلانعانى دا ءبىزدى ەرەكشە قۋانتادى. كەلەسى جىلدىڭ بيۋدجەتىن قالىپتاستىرۋدىڭ الدىندا اۋدان, قالا اكىمدەرىنىڭ, وبلىستىق باسقارما باسشىلارىنىڭ جوبالارىمەن تانىستىق, ۇسىنىستارىن تىڭدادىق. كەلەسى جىلى ەلدى مەكەندەردى گازداندىرۋعا ەرەكشە نازار اۋدارىلادى. ەڭ باستىسى, وتكەن جىلى ماگيسترالدى گاز قۇبىرىن تارتتىق, اترس-تەر سالدىق, ەندى اۋدان, قالا ىشىلىك گاز تارتۋ جۇمىستارىن قۋزاۋ كەرەك. 2020 جىلى وسى ماقساتقا باعىتتالعان قارجىعا قوسىمشا تاعى دا قاراجات بولەمىز. الماتى وبلىسىندا 2020 جىلدى گازداندىرۋ جىلى دەۋگە بولادى. قازىر قاپاشاعاي قالاسىندا بۇل جۇمىستا العا جىلۋشىلىق بار. ينۆەستورلار ءوز قارجىسىنا زارەچنىي اۋىلىنا گاز جەتكىزدى. كەيبىر اۋدانداردا بۇل جۇمىس مۇلدە جۇرمەي جاتىر. ورىنباسارىم باعدات مانزوروۆ پەن وبلىستىق ەنەرگەتيكا جانە تۇكش باسقارماسىنا وسى ىسپەن تۇبەگەيلى اينالىسۋدى تاپسىرامىن. اكىمدەردىڭ, ءتيىستى باسقارمانىڭ كەلەسى جىلعى جۇمىستارىن ءدال وسى گازداندىرۋداعى اياق الىسىنا قاراپ باعالايمىن, - دەدى ا. باتالوۆ.
وعان قوسا وبلىستا تۇرعىن ءۇي سالۋ دا قارقىن الاتىن بولدى. ماسەلەن, كەلەسى جىلى تالدىقورعاندا 22 ءۇي سالىنا باستايدى. وبلىس باسشىسى تۇرعىن ۇيگە سۇرانىس كوپ قاراساي, ىلە, تالعار اۋداندارىندا دا تۇتاس شاعىن اۋداندار سالۋ كەرەكتىگىن دە ايتتى. پرەزيدەنت قاسىم-جومارت توقاەۆتىڭ جولداۋىندا ءۇش اۋىسىمدى مەكتەپتەردى جويۋ تۋرالى ايتىلعانىن ەسكە سالا وتىرىپ, وڭىردە 38 مەكتەپ ءۇش اۋىسىمدى ساناتىندا ەكەنىن تىلگە تيەك ەتتى. سوعان سايكەس وبلىستا كەلەسى جىلى 32 مەكتەپ سالىنادى. قالعانىن مەكتەپتى كەڭەيتۋ, ياعني جاپسارجاي سالۋ ارقىلى شەشۋگە بولادى. سول سياقتى ينجەنەرلىك ينفراقۇرىلىمداردى دامىتۋ, مەكتەپتەرگە بالالاردى تاسىمالداۋعا جانە تالدىقورعان قالاسىنىڭ قوعامدىق كولىكتەرىن جاڭالاۋعا زاماناۋي اۆتوبۋستار ساتىپ الۋ, «وڭىرلەردى دامىتۋ» جانە «اۋىل – ەل بەسىگى» باعدارلامالارى بويىنشا ەلدى مەكەندەردى كوركەيتۋ, شاعىن جانە ورتا بيزنەستى قولداۋ سياقتى ماڭىزدى جۇمىستاردى اتقارۋ ودان ءارى دە جالعاستىرىلاتىنىن جەتكىزدى.
- وسى ىستەردىڭ بارلىعىن ءبىز دەپۋتاتتارمەن بىرلەسىپ اتقارىپ كەلەمىز. تاۋەلسىزدىك مەرەكەسى قارساڭىندا دا جاقسى جاڭالىقتارىمىز كوپ. مەرەكەگە وراي ەڭبەك سىڭىرگەن بىرقاتار ازاماتتاردى مەملەكەتتىك ناگرادالارمەن ماراپاتتايمىز, قالالىقتارعا جاڭا پاتەر كىلتتەرىن بەرەمىز. وسىنداي قۋانىشتى كۇندەرىمىز كوپ بولسىن! بارشاڭىزدى تاۋەلسىزدىك مەرەكەسىمەن قۇتتىقتايمىن, - دەدى ا. باتالوۆ.
